Lukaas 10 - Kuumeet Sinɔ Tɔɔnuk Ad Majaŋeeroŋk

Wosɛyɛ Yeese Nomtaanak Sigɛ Pɔlpɔlɛ Joop Jiitik Aarin A Pɛɛyk

¹ Saadi baŋiya, daamɓa Suumii joop ɔgɔ a pɔlpɔlɛ joop jiitik a aarin a pɛɛy. Nɛɓa wosɛyɛ sɛɛg a pɛɛy pɛɛy kɛnɔ ɗoyurkun katamɛya a nyona sinaanakɔɔ kegeeɗ Yeeseek.

² Nɛɓa tonu sɛɛga kɛ, "Obi ɗama sinɛ ɗootɛɛkiŋ, mayakana ijaager gɛɛnɛ tekerŋ. Agut sini in kalɛyɛ ɗumaat ɗamata sinaana ɗootɛɛkik kɛnɔ wosɛyki ijaageer ɗootaana sinaana ɗamatoŋk.

³ In kɛɛɗɛɛ, wosɛya kɔnu okokɔ jiŋkuyɛɛkoŋk tuwookaka kɔɔra.

⁴ Kat diilɛɛ kosɛ, maŋk wooj, maŋk saamɛyɛ. Kat ɛtɛɛ gopɛ tak nɔ digogoyikɛ a joop.

⁵ "Saakɔɔ guugunyarɗɔ godeya omaltaak, in tɛɛnan toniirɛ kɛ, 'Digoy woyse.'

⁶ Nɛ ɔkɔn lakɛ iɗit sinɔ ɗɛyɛ a boŋu digoyk saadiŋ, nɛ mɛlgeeɗiŋ. Ma ɔkɔn kɛɛŋ, nɛ in murku iinaka.

⁷ In beeɗɛɛ woy sinaanɛ, a ɗamar ɛ uteer any sinɛ kɔna gaɓɛɛk baŋɛ. Ɗɛyɛ a koyɛɛ wori ijaagentaaŋ. Kat weeweriikɛɛ woy omalte waa omalta.

⁸ "Saa mɛlɛrɗɔ katamɛya omaltaak, ɔkɔn kɔnu boŋur jooŋ, in ɗamɛɛ any sinɛ kɔna gaɓɛrk.

⁹ In ebɔdɛ gortaanak sigɛ ɓɛɛlɛr saadik. In tonɛɛ sɛɛga kɛ, "Wɔɔŋku burɛ Waakoyotoŋk son lak iinakikiŋ."

¹⁰ Mayakana ɔkɔn mɛlɛɛr katamɛya omalta ɛkɔnu kir boŋiiɗiŋ, in ŋaarirɛɛ soona bakaanyŋɔŋk nɛ toniir kɛ,

¹¹ 'Tɛntɛŋɛɛrii aasi kɔna duudur katamɛ noŋkuk sinɛ lakii derakɛk. Mayakana in ɗegerɛ kɛ wɔɔŋku Burɛ Waakoyotoŋkuŋ.'

¹² Tona kɔnaaŋ, ɓeny sinaanɛkoy pirdiyoŋk katamɛ sini balaageeɗkoy pirdi nɛɛkɛ sinɛɓa Sɛdoomuk.

Goop Yeese Katamɛɛ Sigɛ Kir Ŋaadit Sɛɛnik

¹³ "Durikoy kɔna, iinaka joop Korajiinik! Durikoy kɔna, iinak joop Beetɛ saydaak! Sɔɔriyɛ sigɛɓa ijaagɛ sɛɛg iinakɛ kɔɔr, ɔkɔnɓa ijaagɛ sɛɛg joopa Tiiroosuk a Sidoonaak, gunɓa dokurɗe nɛ kadir abiyak wuɗakoŋk ɗeeŋk, nɛ bokuyer ɛɛk taɗaput nɛ weeriki tikiyɛɛkɛ Waakoyota.

¹⁴ Mayakana ɓeny sinaanɛkoy pirdiyoŋk iinakɛ sɔgɔɔsɔyk balaageeɗkoy pirdi nɛɛkɛ Tiiroos a Sidoonaa.

¹⁵ Iin, Kipirnahoom! Ɗɛyin a ɓɔŋgɔɔrun ɛɛk dariya? Kina gayɛ guugunyunkoy siioola.

Weeriiki Nomtaanak Sigɛ Pɔlpɔlɛ Joop Jiitik A Pɛɛyk

¹⁶ "Iɗit sinɛ kɔna tiiɗik, tiiɗigeeɗ Eet. Iɗit sinɔkɔnu ki boŋiɗik, ki boŋiɗ Eet. Iɗit sinɔ ki boŋiɗ Eetik, ki boŋiɗ Waakoyo sinɛ kanti wosɛykik."

¹⁷ "Nomtaanak sigɛ pɔlpɔlɛ joop jiitik a aarin pɛɛyk yaaɓa sɛɛgaŋ, nɛɓa weeriiki nɛ tonur Yeeseya kɛ, "Suumi naŋk, tiiɗi aasi tina wɛɛŋa sigɔ somkaanakik tiriyaakɛ goonɛk."

¹⁸ Nɛɓa sɛŋk tonu sɛɛga kɛ, "Dɛna setan a ɗirki dari a ito talal."

¹⁹ Sisɔ gaɓaakɔ kɔna ɓaŋkawuka kɛnɔ torookari kookowɛ a rokokooweenak ɛ kɛnɔ lɔsɛɛr ɓaŋkawuka setanik. Kɛɛ any sinɔkɔɔ kɔnu ari a meeŋɔŋk ara.

²⁰ Mayakana kat kɔna yaa agut sinɔ kɔna tiiɗiɗ wɛɛŋa sigɔ somkaanakik, ma in kɔna yaa agut sinɔkɔ taapɛɛɗɛ tiriya goŋk darik.

Yaaŋɛ Yeese Yaaka Nɛɛk

²¹ Saaɓak yaaɓa ɓayɛ Yeeseek Wɛɛŋakɛ sigɔɔgɛ Geetitaanakik, nɛɓa tonu kɛ, "Iin, Baabɛɛ sinɛ Suumi dariyoŋk a ɗookoŋkuk, pɔɔsaniŋ agut sinɔkɔ dugeeɗin any sini joope sigɔɔgɛ ɗegerar ɛɛkik, makɔ yaaŋin tɔɔmɔkaak. Ii, Baabɛ, egekɔ sini ɗɛyan nook.

²² Gaɓɛɓata Baabɛ any baŋɛ, kɛɛ iɗit sinɔ ɗeger Tɔɔn nɛɛkik ɗegeera Ɛpɛn dakɛɗa, kɛɛ iɗit sinɔ ɗeger Ɛpɛnik ɗegeera Tɔɔn nɛɛk dakɛɗa a iɗit sinɔ ɗɛyɛ a Tɔn nɛɛkɛ yaaŋgeeɗŋɔŋk."

²³ Kolɛɛnyɛɓa Yeese son lak nomtaanak gɛɛŋkik nɛ tonu sɛɛga mowan kɛ, "Geetitaanak taamɛ sigɛ dɛnɛr any sinɛ dɛnɛɛrik.

²⁴ Tona kɔnaaŋ, ɗɛyɛrkɛɓa joop pɛrkaakoŋk a tapaak a ɓɔɔkaaŋ a gun dɛnɛr any sinɛ dɛnɛɛrik, nɛɓa kir taanta, ɗɛyɛrkɛɓa a gun tiyɛr any sinɛ tiyɛɛrik, nɛɓa kir weenta."

Iɗit Sɛmaariyaak Sinɔ Mentanŋɔŋk

²⁵ Ɓeny omalte ŋaarɓa iɗit om sinɔ ɗeger higi Muuseek kɛnɔ paari Yeesee nɛɓa tongeeɗ kɛ, "Rɔɔriytaano, nɔkoy laŋiiɗa wɛɛŋa sigɛkoy nɔkoy nɔkoyk ara jikon?"

²⁶ Nɛɓa Yeese tongeeɗ kɛ, "Taapɛɛɓa higii Muuseek ɛk? Ambabunkan nɛkanna mɛlɛ ɛk?"

²⁷ Nɛɓa sɛŋk tongeeɗ kɛ, "Tonu higi nɛɛkɛ kɛ, 'Poru Jooh Waakoyo nook ɓayɛ nook baŋɛ, wɛɛŋa gooŋk baŋɛ, ɓaŋkawuka nook baŋɛ, a koɓi nook baŋɛ.' 'Poru iɗit sinɛ beeɗiir jɔkikentik oko sinɛ poriiɗin ɛɛk nookuk.' "

²⁸ Nɛɓa Yeese tongeeɗ kɛ, "Jumurunkɔ a liki. Ijaag ɓɔre oko sinɛk beeɗinkoy wɛɛŋakɛ."

²⁹ Nɛɓa iɗit sinɛ ɗɛyɛ a ari ɛɛk nɛɛk a mentan taamɛkɛ joopoŋk, tonu Yeeseya kɛ, "Ma iɗit om wooɗ?"

³⁰ Nɛɓa Yeese jumurgeeɗ kɛ, "Ɓurɓuɗiɓa iɗit om Yorsaleeme Iyaarkowa, nɛɓa ar gopɛ tak, nɛ laŋki joop sigɔ agaltiirk nɛ boŋurkuɗ abii nɛɛk ɗooka. Nɛ ɗiŋer a ito rɛrŋ nɛ ŋɔɗar nɛ ŋaararŋ.

³¹ Nɛɓa tapaɗ ŋaadiyɛɛkoŋk omaay ɓurɓuɗi gopɛ sinaanɛ. Nɛ dɛnɛ nɛ raɓɛɛɗ nɛ ɗoyuŋ.

³² Nɛɓa ɓɔrɛ mɛlɛ iɗit om Leewiik saana, nɛ dɛnɛ nɛ raɓɛɛɗ nɛ ɗoyuŋ.

³³ Saadi baŋiya iɗit om Sɛmaariyaak saaɓa ɗoyiɗ sinaanɛk, nɛ mɛlɛ saana lak iɗit sinɛk. Nɛ dɛnɛ nɛ sanɗigeeɗiŋ.

³⁴ Nɛ widergeeɗ ɛɛk nɛ gupatɛrgeeɗ doosoya nɛɛka diikuy a ogool wɛynik nɛ tuseŋ. Nɛ boŋiir kuroya nɛɛkaak nɛ diile godeya konanoŋk, nɛ kɛɛ igoru saadi.

³⁵ Nɛɓa alɛ nɛɛkɛ boŋku wori a tɛm nɛ gaɓɛ ɗumaata sinaana gode konanoŋkuk, nɛ tongeeɗ kɛ, 'Adarat igorureeta iɗit sini wori sinɛkɔɔ boŋkun sineene sɔgɔɔsɔyk kusa kɔɔna koya saakɔɔ murkuɗak.'

³⁶ Nɛ sisɔ joope sigeege jiitik, iɗit sinɛ beeɗir jɔkikent a iɗit sinɛɓa laŋirki joop sigɔ agaltiirk gayina a sɛɛn won?

³⁷ Nɛɓa iɗit sinɛ ɗeger higi Muuseek jumurgeeɗ kɛ, "Iɗit sinɛɓa sanɗigeeɗik." Nɛɓa Yeese tongeeɗ kɛ, "Mak ɓɔre nɔ kɛɛɗin ijaagin oko sinɛk."

Yeesee Woy Martaa A Maariyamuk

³⁸ Saaɓa kaarɗi Yeese gopɛ a nomtaanak gɛɛŋkik, nɛɓa mɛlɛ mɛndɛra omalta. Nɛɓa boŋu sɛɛn jarti om sinɔ riyɛ kɛ Martaak nyaka nɛɛkaak.

³⁹ Lakɓa sɛŋk manya sinɔ riyɛ kɛ Maariyamuk. Nɛɓa beeɗ Maariyam derakɛ Suumiyoŋk goyse ɗeek a gelelewugeeɗ pɛɛni nɛɛk.

⁴⁰ Maɓa sɛŋk Martaa kaɗi ijaag a obiiŋ jɛt. Nɛɓa wideer ɛɛk son lak Yeeseek nɛ tongeeɗ kɛ, "Saa manya eeta ŋɔrɗu ijaag nɛɛk eeta dakɛɗak, anɛ a dɛdɛnin nɛ dakin kɛ many? Tongete nɔtu kɔnyɛɗ."

⁴¹ Nɛɓa Suumii jumurgeeɗ kɛ, "Martaa, Martaa, ɓakɛyɗiikin ɛ sanɗikin agut ola sigɔ ɓɔɔkaaŋɔŋk.

⁴² Mayakana ɗɛyɛ any a omoŋ dakɛɗa. Daamkɔ Maariyam any sinɛ dɔɔsuk kɛɛkoy sɛɛne boŋiɗ sini."