Kolasiis 4 - Kuumeet Sinɔ Tɔɔnuk Ad Majaŋeeroŋk

¹ Iinak suumiyɛ, agut sinɔ ɗegerari kɛ latukari ɓɔrɔ Suumi dariŋ, nɛ in lowɛɛ laaŋoyeer goŋk a ɓɛɛlɛ kɛ ɗɔm a rɔmaatuŋ.

Rɔɔriyɔɔnak Ɔgɔ

² In ɓeɗɛɛ nɔ ɗanɗamaakari a pɔɔsɛɛr Waakoyo a kiir yawɛɛɗ.

³ In ɓɔrɛ tina ɗanɗamaakɛɛ kɛnɔkɔɔ tina Waakoyot tayɛ tuga Pɛɛni sinɔ Ɓɛlkɛɛstank, ɛ kɛnɔkɔɔ oolii waasiyɛ any sinɔ dugaaŋɔŋk. Arka sisɔ korkoɗɔɔn agut sini.

⁴ Inta ɗanɗamaakɛɛ kɛnɔ tonɗiika kɛ ɗɔm oko sinɛta mɛlɛɛɗik.

⁵ In beeɗɛɛ a joop sigɛ kir ŋaadiɗitik ɗegerɔɔn ɛɛkoŋk, in kɔnyɛɛ ɛɛk milkii sinaanɛ laŋiirik.

⁶ In enya waasiyɛ goŋk wookaan ɓɛnyɔwɛ gɛɛŋk baŋɛ a yaagɛr a itokɔ konɛyɛɛ mooyii, kɛnɔkɔɔ ɗegerarɗɔ jumuran any sinɔ likik joopa a omoŋ omoŋk.

Digoy Sinɛ Pedtank

⁷ Tonukɔɔ kɔna Tikikoos ɔɔtɛ sinɛ arkiɗaak baŋɛ. Sɛɛn manya eteŋka sinɛ porɛɛk, ɛ ijaagen sinɛ ŋaadɛɛk, ɛ ijaagii ijaag Suumiyoŋk a eet agut omoŋ.

⁸ Wosɛyɛɛrakan sɛɛn son lak iinakik kɛnɔ kɔna kɛɛ tonu ɔɔtɛ naŋk ɛ gaanani ɓayɛtun goŋk.

⁹ Wosɛyɛɛrakɔɔ ɓɔrɛ Anasimoos sinɛ manya eteŋka sinɛ ŋaadɛɛ ɛ porɛɛk, ɛ tekaan noŋkuk a sɛɛn agut omoŋ. Yaŋɛrkɔɔ kɔna any sinɛ ɓɛɛlɛ seedik baŋɛ.

¹⁰ Digoyɛɛr nɔ kɔnu Aristirokoos sinɛkɔ korkoɗɛɛ a eet agut omoŋɔŋk, ɛnɔɓɔrɛ kɔnu digoyɛɛr Markoos sinɛ panya Barnabasaak. Inkɔɔ kɛɛɗɛ wɔɔrɛɛ saakɔɔ mɛlɛrkiɗ son lak iinak oko sinɛkan kɔna toniiɗa jeemɛk.

¹¹ Digoyɛɛr nɔ kɔnu Iyaasu sinɛ riyɛ kɛ Iyoostoosuk. Ege sigi joop Ayuuduk dakɛɛɗa ijaageerɛ gaanɛk agut burɛ Waakoyotoŋk, nɛkan ɓɔrɛ gaananɛr eetiŋ.

¹² Digoyɛɛr nɔ kɔnu Epaapira sinɛ tekaan noŋkuk sinɛ ijaagen Kereseek. Ari sɛŋk ɗɔŋkɔɔlɛ ɓɛɛnyɔwɛ gɛɛŋk baŋɛ ɗanɗamɔɔn nɛɛkɛ jɛt agut iinak kɛnɔ ɛtɛɛr a ɓaŋkaawurari a ɓɔlɔɔrɛɛr wɛɛŋakɛ dooyanoŋk a dusanɛɛr ɗɛyan Waakoyotoŋk baŋɛ.

¹³ Waasa kɔna bɔɔlaaka sinɛkan bɔɔlaaɗ jɛtik agut iinak a joop sigɛ atu katamɛɛkɛ Lodokiyaak a Hirapolisik.

¹⁴ Digoyɛɛtarnɔ kɔnu akiimi Lukaas sinɛ porɛɛk sɛɛn a Deemaas.

¹⁵ Digoyɛ nɔta tekaaneer sigɛ atu Lodokiyaakeek a gode Sambatɛyoŋk sinɛ ar woy Nimpak.

¹⁶ Saakɔɔ ambabɛrɗɔ wosɛ sinik baŋiya, nɛɓɔrɛ in arɛɛ a ambabɛr joop gode Sambatɛyoŋk sigɛ atu Lodokiyaakeek, maɓɔrɔ inkɔɔ ambabɛɛ wosɛ sinɛkɔɔ kɔna wosɛykɛɛ Lodokiyaakeek.

¹⁷ Inta tonɛɛ Arkiposa kɛɛ, "Ruumu ijaag Suumiyoŋk sinɛkanna gaɓɛɛk kɛ ɗɔm."

¹⁸ Taapiɗiira digoy sini eet Paawuloos ariit naakɛk, in koɓukɛɛ korkoɗɔn naak. In wookan Waakoyotoŋk a iinak agut omoŋ.