Kolasiis 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapiɗirii eteŋk Paawuloos a manya eteŋka Timotiyoos, sinɛ wosɛytan Yeese Kereseek ɗɛyaan Waakoyotoŋk,

² manyaakaka eteŋka sigaaga geetitaanakik ɛ ŋaadɛɛ sɛɛg Kereseek sigaaga beeɗir Kolasiiseek, in kɔna dakɛ a wookan a bɔdɛ sooy lak Ɛpɛn eteŋka Waakoyok.

Ɗanɗamɔn Pɔɔsiyɛɛkoŋk.

³ Pɔɔsii Waakoyo sinɛ Ɛpɛn Suumiya naŋk Yeese Kereseyaak ɓɛɛnyɔwɛ gɛɛŋk baŋɛ, saa ɗanɗamaaɗii agut iinakikiŋ,

⁴ agut sinɔ tiyiikan ŋaadiyɛ sigɛ latukarik Yeese Kereseek, a mɛyin sinɛ porurɗɔ joop Waakoyotoŋk baŋɛkiŋ.

⁵ Tiyɛɛrkan saakan mɛlɛrkiɗ tuki nɛɛkɛ ŋaadiyɛ sigɛ kookorarik son lak iinakik eekeer Pɛɛni sinɔ Ɓɛlkɛɛstankiŋ, agut sini ŋaadiyɛ goŋk a mɛyin noŋk tukɛɛɓa ŋaadiyɛɛkɛ a ŋaadiyɛɛkɛ sigaagɛ kookorarik raŋk sigaagɛɓa ragadkuunɛɛ nɔkɔnu kookorarkun darik.

⁶ Mɛlɛɛrɓa sini son lak iinakik tuki nɛɛkɛ a tukiɗi saaɓa tiyɛrɗɔ kɛ ɗɔm Pɛɛni sinɛ Ɓɛlkɛɛstank kɛ ege wookan Waakoyotoŋk eekeerk nɛ gaɓɛ taamɛ ɛ ɓɔlɔɔrɛ ɗook raŋk, oko sinɛ gaɓɛɛɗ taamɛ ɛ ɓɔlɔɔrɛɗ iinakɛ kɔɔrk.

⁷ Tonuɓa kɔna Epaapira Pɛɛni sinɔ Ɓɛlkɛɛstankiŋ. Sɛɛn sinɛ poriik ɛ laaŋoyen sinɛ ŋaadɛɛk ɔɔtɛ naŋkik.

⁸ Ɛɓa tina tonu ɔɔtɛ sinɛ poporiiɗɔ ɛkanɛɛkɛ goŋk Wɛɛŋakɛ Waakoyotoŋkuk.

⁹ Kiiɓa yawɛɛɗ ɗanɗamɔn a kalɛy Waakoyotoŋk agut iinak kɛnɔ ɗegerari adaktan ɗɛyan Waakoyotoŋk ɗegerɔɔn sinɔɔnɛ kɔna gaɓɛr Wɛɛŋa sigɔ Geetitaanakik,

¹⁰ ɛ ɗanɗamaakii kɛnɔ beeɗiir oko sinɛ ɗɛyɛɛɗ Waakoyotuk nɔ ariir Suumi a yaageeɗ olaatɛ baŋɛ, kɛnɔ kɔne laŋɛɛ taamɛ ijaag any sinɔ mentanŋɔŋk a ɓɔlɔɔrɛɛr a ɗegerari Waakoyo.

¹¹ In kɔna gaɓɛ Waakoyot ɓaŋkaawurɔn ɓaŋkawukaat nɛɛkɛ sinɔɔnɛ obiiŋɔŋk enya eemɛyɔnk, in kɔnu ari a ragadiir ɛɛk yaakaat nɔ oolɛɛr any baŋɛ ɓaŋkaawurɔɔn oolaanik.

¹² In pɔɔsɛɛ Waakoyo yaakaat sinaanɛɓa kɔnu ari a gayɛɛr kɛnɔ iinak kaastaanak any sinɛkoy boŋur joop sigɛ geetitaanakik sigɛ atu burɛɛ pɛɗɛrkaatoŋk.

¹³ Ariɓa tin a ŋaarkii ɓaŋkawukaat nyuuguroŋk, ɛɓa tin ari a guugunyii burɛya Tɔɔn nɛɛkik sinɛ poruk,

¹⁴ Eɓa tin ɓalkɛɛ sɛɛne, kɛnɔ laŋii tɔŋɔɗ tikiyɛɛkoŋk goy Tɔɔn nɛɛkik.

Obiika Kereseek

¹⁵ Gayi Kerese a Waakoyo sinɛ kɛɛ taantak, ɛ sɛɛn sinɛ Obi ɛ tuktan olaatɛ sigaagɛɓa riiɓɛɛk baŋɛ raŋk.

¹⁶ Agut sinɔ riiɓɛɛɓa ola baŋɛ sigɛ atu darik a sigɛ atu ɗook raŋk, a sigɛ dɛnɛɛ sɛɛgik a sigɛ kɛɛ taantak a tapa a joop sigɛ ɓalɗiik a suumiyɛ sigɛ boobɛrk a suumiyɛ baŋɛ sɛɛne. Riiɓeɓa Waakoyot ola baŋɛ sɛɛne ɛ sɛɛna.

¹⁷ Ɓɛɛlɛɓa sɛŋk olaatɛ baŋɛ ɔɗɔɔkɛ, tootokiɓa olaat baŋɛ sɛɛne.

¹⁸ Nɛ ege Kerese ɔɗɔ gode Sambatɛyoŋk sinɛ ɛɛk nɛɛkik. Agut sinɔ kɛnɔ dakɛ a tuktan olaatɛ baŋɛk, nɛɓa ɓɔrɛ ŋaarin ret walasak ɔɗɔwen ɛ Sɛɛn tuktan.

¹⁹ Agut sinɔ poruɓa Waakoyot enyakaat kalbi nɛɛkik kɛnɔ beeɗ Keresee,

²⁰ taakiɓa ola sigɛ atu darik a ɗookuk baŋɛ a ɛɛk nɛɛk goy Kereseek. Ɗɔkuɓa bɔdɛ yɛrom Tɔɔn nɛɛkik sinaanɛɓa gupatɗiik laalawutant raŋk.

²¹ Beeɗiirɓa jeemɛ a yowɛrkari Waakoyote a iinak gumaakeer gɛɛŋk agut ijaag noŋk a koɓi noŋk sinɔ ŋɛɛwɛnŋɔŋk.

²² Mayakanaɓɔ sisɔ taakikan kɔnu ɔɔtɛ rer Tɔɔn nɛɛkik buusɛɛk, kɛnɔ kɔnu wiɗiki taamɛɛka Gɛɛnaak, ɛ kɔnu ari a iinak geetitaanakik, a kɔne kɛɛ any sinɔ lagiɗɛɛ keenyk.

²³ Nɔ ɓɛɛlɛɛɗ oko sinikik saa beeɗirɗɔ a nomɛrɗɔ ŋaadiyɛ goŋk sigɔ ɛtɛr nyon sinɔɔnɛ ɓaŋkawuŋɔŋk, a kiir wideeɗ ɛɛk ŋaadiyɛɛkɛ sigaagɛ kookorarik Pɛɛnii sinɔɔnɛ Ɓɛlkɛɛstank. Nɛ ege sini Pɛɛni sinɔ Ɓɛlkɛɛstank sinɛɓa tiyɛɛrik ɛɓa waasɛɛ olaata sigaaga atu ɗook raŋk, eet ɓɔrɛ Paawuloos sinɛkɔ daka a laaŋoyenk Pɛɛniya sineena Ɓɛlkɛɛstank.

Ijaag Paawuloosuk Godeya Sambatɛyoŋk

²⁴ Yaata sisɔ agut rakatɛ sinɛ laŋka agut iinakik buusɛɛ naakɛkik, agut sinɔ enyɛɛrakɔ any sinɛ bitak sɛɛnek rakatɛɛ sinaanɛɓa laŋkik agut gode Sambatɛyoŋk sinɛ ɛɛk nɛɛkik sinaanɛ kaasɛɗa rakatɛ Kereseek.

²⁵ Gaɓɛkanta Waakoyot ɔɗɔwikeen ijaag gode Sambatɛyoŋk kɛnɔ kɔna waasa Pɛɛni nɛɛk a kɛɛ sinɔ ŋɔɗaak.

²⁶ Ege sini dugtan sinɔɓa dugiɗi joope baŋɛ emeyika sigɔɔga ɓɔɔkaaŋɔŋk, mayakana sisɔ yaaŋɛ ɛɛk joopa sigaaga geetitaanak Waakoyotak.

²⁷ Yaaɓa Waakoyota kɛnɔ yaaŋɛ joopa gɛɛna dugtan sinɔ obiiŋɔŋk eemɛyɔnk kɛ obi a ɛtɛ ɛk joope sigɔɔgɛ moko Ayuuduk kɔɔr. Ege dugtan sini lak eemɛyɔn sinɔ obiiŋɔŋk sinɔ kɛ ar Keresee iinakɛ takik, nɛkoy kaasɛɛr eemɛyɔn Waakoyotoŋk.

²⁸ Waasii Keresee joopa baŋɛ a rɔɔrɔkaakii sɛɛga ɛ rɔɔriyii sɛɛg ɗegerɔɔn baŋɛ kɛnɔ joop baŋɛ ɓɔlɔɔrɛr Keresee.

²⁹ Bɔɔlaaka a ara ɗɔŋkɔɔlɛ kɛnɔ ijaaga sini agut sinɔte ijaagɗiiɗ tak ɓaŋkawuka sinɛkanta gaɓɛ Waakoyotuk.