Ibirawiyaan 9 - Kuumeet Sinɔ Tɔɔnuk Ad Majaŋeeroŋk

Ugumeet Godeey Sinaanɛ Geetitank Ɗook Raŋk

¹ Kuumeet sinɛɓa tuktank lakɓa higi agut ugumeet a nyon sinɔ Geetitank ɗook raŋk.

² Rukɛɛɓa duukaanoy nɛɛk nɛ riyɛ takan nɛɛk nyon sinɛ tuktank kɛ Nyon sinɔ Geetitank. Lak any sinɔ riiɓeeɗɛ any sinɔ ɗaawuŋɔŋk a tarbeesɛ a nasi sinɔ Geetitank tarbeesɛɛ raŋk.

³ Nɛɓa lakɛ biriittan nɛ biriittant nɛɛkɛ baŋiya lakɛ nyon sinɔ riyɛ kɛ Geetitan Geetitaanakoŋkuk,

⁴ nɛɓa saadi tak lakɛ any sinɔ adiiɗɛ itaanɛk workeyoŋk a sanduk kuumeetoŋk sinɔɓa ɗaabɛ workee gɔɔ baŋɛk. Nɛ sanduke nɛɛkɛ tak lakɛ kebet workeyoŋk sinɔ lak Mɛnnaak a gumboy Aroonuk sinɔɓa reyɛŋɔŋk a any sinɔɓa taapuguɗɛɛ sekiyɛɛk sinɔɓa ijaagɛɛ giɗeek.

⁵ Nɛ lakɛ sanduke nɛɛkɛ raŋk kirubeelak sigɔ Marariŋɔŋk sigɔɓa ripkeetar tɔɓɔyɔkɛ gɛŋk any sinɛ miinyeeɗɛɛ nyon sinɛ ranyjɛɛtoŋkuk, Ege nyon nɛɛkɛ sinɔ ranyjɛɗɛ tikiyɛɛk. Yakana sisɔ kii oolɛ a tonɗiikii agut patan ola sigikiŋ.

⁶ Saaɓa ragadiiɗɛɛ ola sigi baŋɛ oko sinikik baŋiya, nɛɓa guugunyar tapa ŋaadiyɛɛkoŋk ɓɛɛnyɔwɛɛkɛ duukaanoya nɛɛka nyona sinaana ar biriittant nɛɛkɛ walasik kɛnɔ ijaagir ijaag nɛŋk.

⁷ Yakanaɓa guuguny nyona sinaana ar takik ɔɗɔwen sinɛ tapa ŋaadiyɛɛkoŋk dakɛɓa, guugunyɓa eme agut omoŋ dakɛɗa, nɛɓa ki guugunyɔn a ki diilɛ yɛrom sinɔ wideerɛ agut tikiyɛ gɛɛŋk a tikiyɛ sigɛɓa ijaagir joop gɛɛnɛ a kir ɗegerɔɔnuk.

⁸ Yaaŋɛr Wɛɛŋa sigɔ Geetitaanakik kɛ inɓa kɛɛ tayɛɛɗ gopan sinɛ kɛɛɗɛ Nyona sinɔɔna Geetitan Geetitaanakoŋkuk, a in ɓɛɛlɛ duukaanoy sinɛɓa tukikiŋ.

⁹ Dakɛ sini a rɔmɛ emeya sineena. Tigi a uduŋeet sinɛ wideerɛɛk kir ariiɗ kalbi iɗit sinɛ widiɗiirik a kɛɛ any sinɔ bitakɗiiɗik.

¹⁰ Ege ola sigi baŋɛ higiyɛ ɗamatoŋk a tuutoŋk a dambiyɛ aadiitak sigɔ pakakataaŋɔŋk, sigɔ ijaagɛɛ sɛɛg mɛlɛɛɗa nɔkoy mɛlkiɗ higi sinɔ tɔɔnuk.

¹¹ Kusɓa Kerese a Sɛɛn ɔɗɔwen tapa ŋaadiyɛɛkoŋk olaata sigaaga mentaanak ɓɛɛlɛr sisɔk, duukaanoy sinɛɓa guugunygeeɗ sɛŋkik obi ɛ kɛɛ any sinɔ bitakɗiiɗik, mokoɓa ijaagɛɛ ariit etoŋk, ɛ moko riiɓ ɗoo sinik.

¹² Mokoɓa sɛŋk guuguny a diile yɛrom kemtekoŋk a jeguyatɔkoŋk, maɓa guuguny Nyona sinɔɔna Geetitan Geetitaanakoŋkuk agut omoŋ a pedtan a diile yɛrom nɛɛk, nɛɓa ari a laŋii ɓali sinɛkoy nɔkoy nɔkoyk oko sinik.

¹³ Ɔkɔn wasanɛɛ yɛrom kemtekoŋk a jeguy a taɗapu taŋ sinɔ peetik sinɔkan moɗɛɛ a uduŋeetik joopa sigɔɔga somkaanakik, nɛ ŋaɗɛ sɛɛg ɛ ari sɛɛg a geetitaanak somakɔɔkɛ taaroŋkuŋ.

¹⁴ Anɛ ŋaɗɛ a geetitan a kaalɛ a ɛtɛ ɛk kalbiyɛ gaŋk ijaag sinɔɔnɛkan rɛrŋɔŋk yɛrom Keresee sinɛkan wideer ɛɛk nɛɛk Waakoyota a uduŋeet sinɔ kiiɗɛ any sinɔ keerɛɛk goy Wɛɛŋa sigɔ Geetitaanakik sigɛkoy nɔkoy nɔkoyk kɛnɔ ijaagɗikii Waakoyota sinaana bɔdɛɛk?

¹⁵ Agut sini ege Kerese taakitan kuumeet sinɔ tɔɔnuk kɛnɔkoy joop sigɛɓa riyɛɛk laŋir any sinɛɓa ŋɔɗɛɛk sinɛkoy nɔkoy nɔkoyk sinɛɓa gagiɗɛɛ ŋaadiyɛ sigɛ kookorɛɛk. Agut sinɔɓa gaɓɛɛɗ ɛɛk nɛɛk gumaka nɛɓa rɛr kɛnɔ ebɔdɛ joop tikiyɛɛkɛ sigaagɛɓa ijaagir saaɓa atukuɗ kuumeet sinaanɛɓa tukik.

¹⁶ Ɔkɔn lakɛ sekiyɛ iɗit sinɔkɔɔ rɛrŋɔŋkuŋ, nɛ ɗɛyɛ a ɗegerɛɛ rer iɗit sinɛ sekiɗikiŋ.

¹⁷ Agut sinɔ gayɛr sekiyɛ iɗit sinɛk saakɔ rɛrɗik baŋiya, ma ɔkɔn iɗit sinɛ ɓɛɛlɛ wɛɛŋakɛŋ nɛ kɛɛ ɔɔtɛ sekiyɛɛkɛ gɛɛnɛk.

¹⁸ Agut sini kuumeet sinɛɓa aasi tukik mokoɓa gayɛ a kiiɗɛ yɛrom.

¹⁹ Tonuɓa Muuse tuki nɛɛkɛ joopa gɛɛna baŋɛ sekiyɛ higiyoŋk, nɛɓa saadi baŋiya makɛ yɛrom jeguyatɔkoŋk a kemteekoŋk a maawu nɛ wasani wargatɛya sinaana higiyoŋk a joopa gɛɛnaak baŋɛ ŋɔnyunt sinɔɔnɛ riyɛ kɛ hisopuk a amikɛ jiŋkuy sinɔ dɛɛŋɔŋk.

²⁰ Tonuɓa kɛ, "Ege sini yɛrom kuumeetoŋk sinɛɓa kɔna sekɛ Waakoyot kɛnɔ koorɛɛrik."

²¹ Ɛɓa ɓɔrɛ wasani yɛrom duukaanoya nɛɛka a olaata sigaaga ijaagɗiɗɛɛ ugumeetak saadik baŋɛ.

²² Eekeerɛ oko higi Muuseek olaatɛ sigɔɔgɛ tekerŋɔŋk sɔgɔɔsɔyk ŋaɗɛɛ ola baŋɛ yɛrom, ɔkɔn kiiki gupatɗit yɛrom, nɛ kɛɛ tɔŋɔɗ tikiyɛɛkoŋk.

Yɛrom Yeese Kereseek

²³ Agut sini ola sigɛ rɔmɛɛɗak ola dariyoŋkuk ɗɛyɛɓa a ŋaɗɛɛ sɛɛg olaatɛ sigeegeeŋ, mayakana ola sigɛ atu darik ŋaɗɛɛ sɛɛg uduŋeet sinɔɔnɛ kaalɛ sinik.

²⁴ Kiɓa guugunyɔn Kerese rɔmɛɛɗa duukaanoy sinɔ eekerkank a Nyona sinɔɔna Geetitank sinɔɔnaɓa ijaagɛɛ ariit etoŋkuk, yakanaɓa guuguny sinaana ar darik kɛnɔ yaaŋɛ ɛɛk sisɔ taamɛkɛ Waakoyotoŋk agut eteŋk.

²⁵ Kiɓa guugunyɔn Kerese dariya kɛnɔ gaɓɛ ɛɛk nɛɛk a uduŋeet agut ɓɔɔkaaŋ, oko sinɛ diileɗ ɔɗɔwen tapa ŋaadiyɛɛkoŋk yɛrom sinɔ moko nɛɛkik nɛ guuguny emeyikɛ Nyona sinɔɔna Geetitan Geetitaanakoŋkuk.

²⁶ Ɔkɔnɓa ɓɛɛlɛ oko sinikiŋ nɛgunɓa ɗɛyɛ Kereseya a boŋu rakatɛ agut ɓɔɔkaaŋ a tukiɗi saaɓa riiɓeeɗɛ ɗook. Yakana sisɔ emeyikɛ pediya yaaŋɛ ɛɛk agut omoŋ a pedtan kɛnɔ gaɓɛ ɛɛk nɛɛk a uduŋeet nɔ ranyjɛ tikiyɛ.

²⁷ Ɗɛyɛ eta a rɛr agut omoŋ, nɛkoy saadi baŋiya ɛtɛ taamɛkɛ pirdiyoŋk.

²⁸ Nɛɓa ɓɔrɛ Kerese gaɓɛ ɛɛk nɛɛk a uduŋeet agut omoŋ kɛnɔ boŋu tikiyɛ joop sigɔ ɓɔɔkaaŋɔŋkuk. Mɛlkikoy kɛkar kɛnɔ ebɔdɛ joop sigɛ kookorarkun sɛɛnik, ma moko boŋu tikiyɛ.