Ibirawiyaan 7 - Kuumeet Sinɔ Tɔɔnuk Ad Majaŋeeroŋk

Mɛlkɛsedek Sinɛ Ɔɗɔwen Tapa Ŋaadiyɛɛkoŋk

¹ Egeɓa Mɛlkɛsedek suumi Saaleemuk ɛɓa sɛɛn ɔɗɔwen tapa ŋaadiyɛɛkoŋk Waakoyo sinɔ Ar Rakaay Olaatɛ Baŋɛk. Saaɓa weerikiɗ Abraham lɔsɛɛɗ suumiyɛɛkoŋkuk, nɛɓa laŋki sɛɛn Mɛlkɛsedek nɛ geetiŋ.

² Gageeɗɓa Abraham ant sinaanɛɓa laŋik baŋɛ sigɔɔgɛ aarink a omoŋ. Tiriya Mɛlkɛsedekik sigɛ tuktaanakik sigɔ kɛ, "Suumi sinɔ ɓɛɛlɛ kɛ ɗɔmk," ma ɓɔrɛ kɛkar, "suumi Saaleemuk" sigɔ kɛ "suumi bɔdɛɗoŋk."

³ Kiiɗɛɓa ɛpɛn a ɛmɛs maŋk kɔɔman ɓartiyɛɛkoŋk, maŋk tuki a pedi beeɗitoŋk. Yakana ito sɛɛn Tɔɔn Waakoyotoŋk a sɛɛn ɔɗɔwen tapa ŋaadiyɛɛkoŋk nɔkoy nɔkoyk.

⁴ In koɓɛɛ sinɔ kɛ obi sɛŋk a ɛtɛ ɛkik. Gageeɗɓa sɛŋk Abraham sinɛɓa ɔrɛɛ joop Israeelik ant sinaanɛɓa boŋu guumakeerɛ gɛɛnɛkik sigɔɔgɛ aarink a omoŋ.

⁵ Sekɛ higi Muuseek tapaaka ŋaadiyɛɛkoŋk sigaaga sisɔk komoy Leewiik kɛnɔ boŋur joope baŋɛ ant sinaanɛ latuk sigɔɔgɛ aarink a omoŋɔŋk kɛygun aasi sɛɛg tekaaneer gɛŋkiŋ.

⁶ Yakana mokoɓa Mɛlkɛsedek komoy Leewiik, nɛɓa sɛŋk boŋu Abrahame any sinɛɓa lakik sigɔɔgɛ aarink sinɔ omoŋɔŋk, ɛɓa geeti sɛɛn sinɛɓa boŋu kuumeetikk.

⁷ Kiiɗɛ koɓiɗak sigɔ pɛɛyk oko sinɛ geetiɗɛɛ sinɛ tɛmk sinaanɛ obiikik.

⁸ Ege joop sigɛ boŋur goy omalteek sigɔɔgɛ aarink sinɔ omoŋɔŋk joop sigɔkoy rɛrarŋɔŋk, mayakana boŋɗi goy omalte Mɛlkɛsedek sinɛ waasigiɗɛɛ eekeerik sinɛ beeɗ a sɛɛn bɔdtank.

⁹ Gayɛ a tonɛɛ kɛ Leewii, sinɛ totol sigɔɔgɛ aarink sinɛ omoŋɔŋk, koyuɓa sigɔɔgɛ aarink sinɛ omoŋɔŋk goy Abrahamuk,

¹⁰ agut sinɔ saaɓa laŋiiɗ Mɛlkɛsedek Abrahamuk, ma inɓa ar Leewi ɛpɛne Abrahame ɓeetɔkɛ.

Ito Yeese Mɛlkɛsedek

¹¹ Gaɓɛɛɓa higi Muuseek joopa Israeelik goy tapaaɗikeen ŋaadiyɛɛkoŋk Leewiik. Ɔkɔnɓa tapaaɗiken ŋaadiyɛɛkoŋk sini ijaag joop a kɛɛ any sinɔ bitak sɛɛgekiŋ, nɛ gunɓa ki ɗɛyɛ a lakɛ tapaɗ ŋaadiyɛɛkoŋk om sinɔ ito Mɛlkɛsedekik, ma moko sinɔ ito Aaronuk.

¹² Agut sinɔ ɔkɔn lakɛ weeriyɛ tapaaɗikeen ŋaadiyɛɛkoŋkuŋ, nɛɓɔrɛ ɗɛyɛ a weerɛ higi nɛɛkiŋ.

¹³ Tonɗikii agut iɗit sinɛ omoŋɔŋk ɓɛɛlɛ komoy nɛɛkɛ kundiyaakɛk, sigɛ kir ijaagɗit nyon sinaanɛ uduŋeetoŋkuk.

¹⁴ Ɗegerɛɛ Suumi naŋk kɛ kusɓa komoy Yuudaak, kɛɛ any sinɔɓa tonu Muuse agut komoy sini ɔɗɔwen tapa ŋaadiyɛɛkoŋkuk.

¹⁵ Nɛ ɗegerɛɛ a kaalɛŋ any sinɛɓa tonii seekik, saa mɛlkiɗ tapaɗ ŋaadiyɛɛkoŋk omaay sinɔ ito Mɛlkɛsedekik.

¹⁶ Mokoɓa ɓɛɛlɛ tapaaɗiken nɛɛkɛ ŋaadiyɛɛkoŋk oko sinɛ sekɛɛɗ higiik, maɓa sɛɛn tapaɗ ŋaadiyɛɛkoŋk goy ɓaŋkawuka wɛɛŋakoŋk sigɛkoy kiiɗɛ sukuk.

¹⁷ Agut sinɔ tonu Wargatɛ Waakoyotoŋk agut sɛɛn kɛ, "Iin koy tapaɗ ŋaadiyɛɛkoŋk nɔkoy nɔkoyk oko tapaaɗikeen ŋaadiyɛɛkoŋk Mɛlkɛsedekik."

¹⁸ Aalɛɛɓa sekiyɛ sigɛɓa jeemɛkiŋ agut sinɔɓa bɔɔlaaɗ ɛ kir kɔnyɗiitik.

¹⁹ Agut sinɔɓa higi nɛɛkɛ kiiɗ ariiɗ iɗit a kɛɛ any sinɔ bitakɗiiɗik, nɛ sisɔ mɛlɛrki ŋaadiyɛ sigɛ kookoriik sigɔ kaalɗiŋɔŋk sigɔ widerkiɗii ɛɛk son lak Waakoyok.

²⁰ Kiɓa tapaaɗiken sini ŋaadiyɛɛkoŋk gayɛ a kiiɗɛ wogoy, maɓa joop ɔgɔɔk gayɛr a tapa ŋaadiyɛɛkoŋk a kiiɗɛ wogoy.

²¹ Saaɓa wogoyɛɛɗik nɛɓa tonu agut sɛɛn kɛ, "Wogoyɛkan Suumiŋ akoy ki weerɛɛt koɓi nɛɛk kɛ, 'Iinkoy tapaɗ ŋaadiyɛɛkoŋk nɔkoy nɔkoyk."'

²² Agut wogoy sini, dakɛɓa Yeese a ɗumaat kuumeeta sinɔɔna dɔɔsuk.

²³ Ɓɔɔkaaɓa tapa ŋaadiyɛɛkoŋk sigɛɓa jeemɛkiŋ agut sinɔɓa sɛɛg ɓaarɗ ret kɛnɔ kat tuuker ijaag nɛŋkik,

²⁴ mayakana kɛɛkoy aalɛɛt tapaaɗikeen Yeeseek agut sinɔkoy beeɗiɗ nɔkoy nɔkoyk.

²⁵ Agut sini oolɛ a ebɔdɛ nɔkoy nɔkoy joop sigɛ kurak son lak Waakoyok goy nɛɛkɛk agut sinɔ beeɗiɗ ɓɛɛnyɔwɛ gɛɛŋk baŋɛ kɛnɔ kalɛyiɗi agut sɛɛgik.

²⁶ Sisɔ ɗɛyɛ tina ɔɗɔwen tapa ŋaadiyɛɛkoŋk, sinɔ eemɛyɛ dari ɛdɛɛnak sinɔ ito sinik, sinɔ geetitank, ɛ kɛɛ laaganyɛɛk, ɛ mentan, ɛ pakata tikitaanakɛɛk.

²⁷ Kir sɛŋk gayit a tapa ŋaadiyɛɛkoŋk ɔgɔ, kiigeeɗ ɗɛyɛ a wideer uduŋeet ɓɛɛnyɔwɛ gɛɛŋk baŋɛ agut tikiyɛ gɛɛŋk nɛ saadi agut tikiyɛ joop gɛɛŋkik. Nɛɓa wideer uduŋeet agut omoŋ pediya saaɓa gaɓɛɛɗ ɛɛk nɛɛkik.

²⁸ Daam higi nɛɛkɛ joop sigɔ bɔɔlaaŋɔŋk a ɔɗɔweer tapa ŋaadiyɛɛkoŋk, mayakana wogoy Waakoyotoŋk sinɛɓa mɛlki higii baŋiyaak, daam Tɔɔn sinɔ kɛɛ any sinɔ bitakaaɗik.