Ibirawiyaan 6 - Kuumeet Sinɔ Tɔɔnuk Ad Majaŋeeroŋk

¹ Agut sini koy ɗoyii rɔɔriyɔɔn sinaanɛɓa tukik sinɛɓa gaɓɛɛ agut Kereseek, makoy kɛɛɗii aaɗikaata sinɔɔna peditank. A tukii nyon kɛkar rɔɔriyɔn sinɔ weerikiɗii tikiyɛɛkɛ sigɔɔgɛ dilɗi retaak, a ŋaadiyɛ Waakoyotek,

² a aadiitoŋk, a riiɓan ariitoŋk joope raŋk, a ŋaarin ret walsak, a pirdi sinɛkoy nɔkoy nɔkoyk.

³ Kaaliikɔɔ siniŋ ɔkɔn ɗɛyɛ Waakoyotuŋ.

⁴ Kir oolɛ a weerik tikiyɛɛkɛ Waakoyota kɛkar joop sigɔkan ɗiirar gopɛ nɛɛkɛkik ɛ kan laŋir pɛɗɛrka ɛ kan laŋir tigi dariyoŋkuk, ɛ sɛɛg kaastaanak Wɛɛŋa sigɔ Geetitaanakik,

⁵ ɛ kan ɗegerar mentanka Pɛɛni Waakoyotoŋkuk a ɓaŋkawuka ɗoo sinɛkoy mɛlkik,

⁶ saakan laŋirɗi ola sigik baŋiya ɛ ɗiirar gopɛ nɛɛkɛkiŋ, nɛ ki gayɛ a weeriki kɛkar tikiyɛɛkɛ Waakoyotaŋ agut sinɔ laalawar Tɔɔn Waakoyotoŋk kɛkar ɛ daraayɛr sɛɛn.

⁷ Geeti Waakoyot ɗoo sinɔ sawɛ tul sinɔ ɛɛkɛ otoopuk ɛ etɛyɛr ɗamati nɔ kɔnyɛr iɗit sinɛ wayɗik.

⁸ Mayakana ɔkɔn ɗigararkiɗ ɓɛynik a dobikiŋ, nɛ kiiɗɛ tɔkɔny. Koonyɛkoy Waakoyot ɛ koy pedi nɛɛk moɗɛ maɗik.

⁹ Iinak sigɛ kɔnu poraak, kɛygun aasi seek tonkaayii oko sinikiŋ, nɛ eteŋk eekerkaanak sinɔɔna kɛ latukari any sinɔ dɔɔsuk sinɔ lalaŋi a bɔdɛ noŋkuk.

¹⁰ Ɓɛɛlɛ Waakoyot kɛ ɗɔm. Ki sɛŋk monɗiit ant sinaanɛkan ijaagiirik maŋk mɛyin sinaanɛkan yaaŋɛɛr agut sɛɛnik tɔkɔny sinaanɛkan gaɓɛɛri a sinɛkɔɔ gaɓɛɛri dooytaanakak.

¹¹ Ɗɛyii a yaaŋɛɛr pediya ɓaŋkaawurɔn sinɔ ito sinik iinak a omoŋ omoŋ kɛnɔkoy laŋirɗɔ ŋaadiyɛ sigɛ kookorarik sigɛɓa gaɓɛɛk.

¹² Kii ɗɛyɛ a dɔtɛyɛɛriŋ, ma ɗɛyii kɛnɔ gayiikari a joop sigɛkoy boŋur kuumeet ŋaadiyɛɛkɛ a ɓaŋkawurɔɔn oolaanik.

Ege Kuumiyɛ Waakoyotoŋk Eekeer

¹³ Saaɓa gaɓɛɗ Waakoyot kuumeet Abrahamaak, agut sinɔɓa kiiɗɛ any sinɔ wogoyɛɛɗ a kaalɛ sɛɛnik, nɛɓa wogoyɛ eek nɛɛkɛk

¹⁴ kɛ, "Geetakɔɔnu eekeerɛ, araakɔɔ ɓɔrɛ komoy nook a obi a kɛɛ oolɛ ikomiit nɛɛk."

¹⁵ Kooriɓa Abraham ɓaŋkawurɔɔn oolaanik, agut sini boŋuɓa any sinɛɓa kuumɗigeeɗ Waakoyotukuŋ.

¹⁶ Wogoyɛr joop a kaalɛr ɛkan gɛŋk, nɛ ɔɔyɛɛ palamɛ sinɛkan ŋaarki sɛɛge kɔɔruk baŋɛ agut sinɔ ege wogoy any sinɔ dusanɛɛɗɛɛ palamɛ sinɛkan tonɛɛk baŋɛk.

¹⁷ Agut sinɔ ɗɛyɛɛɗ Waakoyot a yaaŋɛ koɓi nɛɛk kɛ ki weerɛɛt ɛɛkik joopa sigaagakoy boŋur kuumiyɛ gɛɛŋkik, nɛɓa ari a gayɛ wogoy nɛɛkɛkiŋ.

¹⁸ Gaɓɛkan tina Waakoyot ola a pɛɛy kuumiyɛ a wogoy nɛɛk. Ola sigi pɛɛyk kir weewerɛ ɛɛk agut sinɔ ki Waakoyot oolɛ a tonu nyonuŋ. Agut sini eteŋk sigɛ gonurii son lak sɛɛnik nɔ dugiɗiiɗik kɛnɔ boŋii gaananit sinɔ tɔɔnuk nɔ gaamii kuumiyɛ gɛɛŋk ŋaadiyɛɛkɛ.

¹⁹ Ŋaadiyɛ sigi kookoriik wɛɛŋaka gaŋk sigɔ ito awɛ sinɔ ɗiliŋɔŋk sinɔ ki ɓeeɓesiitik, nɛ tin arir a guugunyirii Geetitaana Geetitaanakoŋk dariyoŋk takana ant sinaanɛɓa biriitɛɛk goyse baŋiyaak.

²⁰ Ege sini nyon sinɛɓa guugunygeeɗ Yeese ɔɗɔɔkɛ agut eteŋkik. Dakɛɓa a sɛɛn ɔɗɔwen tapa ŋaadiyɛɛkoŋk a lak daaman oko tapaaɗikeen ŋaadiyɛɛkoŋk Mɛlkɛsedekik.