Ibirawiyaan 3 - Kuumeet Sinɔ Tɔɔnuk Ad Majaŋeeroŋk

Ar Yeese Muusee Rakaay

¹ Iinak manyaakak eeta sigɛ geetitaanakik sigɛkan kɔnu riyɛ Waakoyotek, in koɓɛɛ Yeesee sinɛ Sɛɛn wosɛytan ɛ ɔɗɔwen tapa ŋaadiyɛɛkoŋk ŋaadiyɛ gaŋkik.

² Ŋaadɛɛɓa Yeesee Waakoyota sinaanaɓa daam ijaaga sineenak oko sinɛɓa ŋaadiɗɛɛ Muusee ijaag nɛɛkɛ Godeey Waakoyotoŋk baŋɛk.

³ Laŋkɛɛkan Yeesee a lak eemɛyɔn sinɔ kaalɛ Muuseek oko sinɛ lakiɗ iɗit sinɔ kɛny godek eemɛyɔn sinɔ kaalɛ gode nɛɛkik.

⁴ Agut sinɔ latu godeyi a omoŋ omoŋ joop sigɔkan kɛnyar sɛɛgŋɔŋkuŋ, mayakana Waakoyo dakɛɗa sinɛɓa ijaag ola baŋɛk.

⁵ Ŋaadɛɛɓa Muusee a ito ijaagen Godeey Waakoyotoŋk baŋɛ kɛnɔ waasɛ eekeer agut any sinɛkoy ɓɛɛlɛ ɔɗɔɔkaak,

⁶ mayakana ŋaadɛɛ Keresee a ito tɔɔn wɛyoŋk Godeey Waakoyotoŋk. Eteŋk gode nɛɛk ɔkɔn gaamii a ɓaŋkawuŋ ŋaadiyɛ sigɛ kookoriik a sigɛ meriiɗii ɛɛkikiŋ.

Imiiny Joopa Waakoyotoŋk

⁷ Nɛ agut sini oko sinɛ tonurɗu Wɛɛŋa sigɔ Geetitaanakik kɛ, "Saa tiyɛrɗɔ koŋgoy nɛɛk ɓenysek,

⁸ nɛ kat ariir ɓayɛtun goŋk a ɓaŋkaawarŋ oko sinɛɓata kirɗi tiiɗit saaɓati paarirɗi paatonk,

⁹ paarirɓati ɛɓati mermenar ɔrɛyak goŋk saadi, dɛnɛrɓa ɓɔrɛ any sinɛɓa ijaagaak a emeyi pɔlpɔlɛ joop pɛɛykiŋ.

¹⁰ Nɛ agut sini ŋadaɓa ɓartiyɛɛka sigeega, ɛɓa tona kɛ, 'Babadarkoy ɓayɛtun gɛŋk ɓɛɛnyɔwɛ gɛɛŋk baŋɛ, ɛ koy kir ɗegerɔɔn gopan naak.'

¹¹ Ɛɓaɓɔrɛ wogoya ŋadiiɗ naakɛ kɛ, 'Kiitarkoy mɛlɛ nyona naaka imiinyoŋk.' "

¹² Iinak manyaakak eeta, in koorɛɛ ɛɛk kɛnɔ kat lakɛ iɗit sinɔ lak ɓayɛ sinɔ ŋɛɛwɛn ɛ ki ŋaadiɗitik sinɔ arɗi a yowɛrkɛɛ Waakoyote sinaanɛ bɔdɛɛk.

¹³ In gannaniikɛ ɛkanɛɛkɛ goŋk ɓɛɛnyɔwɛ gɛɛŋk baŋɛ a in ɓɛɛlɛ waawuy sinɛ riyɛ kɛ "Ɓɛɛnyɔ sinikiŋ" kɛnɔ kat kilarari raamiyɛɛkɛ tikiyɛɛkoŋk.

¹⁴ Eteŋk koy kaastaanak Kereseek, ɔkɔn gaamii a ɓaŋkawuŋ ŋaadiyɛ sigɛɓa lakii tuki mɛlɛɛɗa pediyaakiŋ.

¹⁵ Tonɛɛɓa Wargatɛɛ Waakoyotoŋk kɛ, "Saa tiyɛrɗɔ koŋgoy nɛɛk ɓenysek, nɛ kat ariir ɓayɛtun goŋk a ɓaŋkaawarŋ, oko sinɛɓa sɛɛk kirɗi tiiɗit Waakoyota paaton takik."

¹⁶ Wooɗak sigɛɓa tiyɛr nɔɓa kirgeeɗ tiiɗitik? A moko joop baŋɛ sigɛɓa sɛɛg boŋku Muuse Gibse nɔɓa sɛɛg diilek?

¹⁷ Wooɗak sigɛɓa sɛɛga ŋadi a emeyi pɔlpɔlɛ joop pɛɛyk? A moko joop sigɛɓa ijaagir tikiyɛ nɛ rɛrar nɛɓa dakɛr paaton takiki?

¹⁸ Wooɗak sigɛɓa sɛɛga wogoyɛ kɛ, "Kiirkoy guugunyɔn nyona naaka imiinyoŋk adaktank?" A moko joop sigɛɓa kir tiiɗit sɛɛnak?

¹⁹ Agut sini dɛnii a kir oolɛ a koy guugunyar nyona imiinyoŋk agut sinɔɓa kirɗi ŋaadiɗitik.