Ibirawiyaan 2 - Kuumeet Sinɔ Tɔɔnuk Ad Majaŋeeroŋk

Bɔdɛɛ Sinɛ Obiik

¹ Agut sini ɗɛyɛ tina a koorii kɛ ɗɔm agut any sinɛkan tiyiik kɛnɔ mokɔɔ dertii nɔ ɗirii.

² Eekerkan wosɛ sinɛɓa tonɛɛ goy wosɛytaanak Waakoyotoŋk, iɗit sinɔ sɔɔkɛ Pɛɛni sinik ɛ kiigeeɗ tiiɗitik boŋukoy goopan sinɔ likik.

³ Anɛkoy pordii ɛk ɔkɔn tine nyɛɛɗurku bɔdɛ sini obiiŋɔŋkuŋ? Tonɗiiɓa jeemɛ bɔdɛ sini Suumi ɔɗɔwa nɛɛka, nɛ tina topurk joop sigɛɓa tiyɛrk sɛɛnek kɛ eekeer.

⁴ Waasɛɓa Waakoyot kɛkar yaaŋtaanakɛ, a olaatɛ sigɔɔgɛ reemɗi ɓayɛk, a sɔɔriyɛɛkɛ sigɔɔgɛ ɓɛɛlɛr kundiyaakɛk, a wookaan Wɛɛŋa sigɔ Geetitaanakik a gaɓɛ oko ɗɛyan nɛɛk.

Ege Yeese Iɗit

⁵ Kiɓa ariiɗ Waakoyot a ikomur wosɛytaana gɛɛnɛ ɗoo sinɛkoy mɛlkik sinɛ tonɗigiɗiikiŋ.

⁶ Yakana tonuɓa iɗit omaay Wargatɛɛ Waakoyotoŋk nyon omalte kɛ, "Ege iɗit jikon nɔkɔɔ koɓukuɗun sɛɛnik? Ege iɗit jikon nɔkɔɔ koorɛɗin ɛɛk sɛɛnak?

⁷ Arinɓa a tɛm wosɛytaanakɛ Waakoyotoŋk ɔɔtɛya sinɔɔna dinyŋɔŋk, riiɓeeɗinɓa dooroy eemɛyɔnoŋk a pɔɔsiyɛɛkoŋk, daamunɓa sɛɛn ijaag arin gooŋkuk raŋk,

⁸ argeeɗɓa any baŋɛ a ar ɓaŋkawukaat nɛɛkɛ goyse ɗeek." Saaɓa Waakoyot argeeɗ ola baŋɛ a atu ɓaŋkawukaat nɛɛkɛ goyse ɗeekik, nɛ kɛɛ any sinɔɓa ki ariiɗ a ki ɓalɗiit sɛɛnak. Yakana sisɔ kii taant ola baŋɛ a ɓalɗi sɛɛnaŋ.

⁹ Yakana sisɔ dɛnii Yeesee sinɛɓa arɛɛ a ar ɗook wosɛytaanakɛ Waakoyotoŋk ɔɔtɛya sinɔɔna dinyŋɔŋk, sinɛɓa riibeeɗ dooroy eemɛyɔnoŋk a pɔɔsiyɛɛkoŋk agut sinɔɓa boŋiɗ rakatɛ retoŋkuk agut joop baŋɛ wookaan Waakoyotoŋk.

¹⁰ Ege olaat baŋɛ Waakoyotoŋk, ɛɓa riiɓɛɛ ola baŋɛ Sɛɛna. Nɛɓa ari Waakoyot any a liki saaɓa ariiɗ Yeesee a kɛɛ any sinɔ bitakɗi sɛɛnek rakatɛɛk. Diileɓa Yeese tɔɔmɔk Waakoyotoŋk a ɓɔɔkaaŋ kɛnɔ ebɔdɛ sɛɛg ɛ kaasɛr eemɛyɔn nɛɛk.

¹¹ Iɗit sinɛ ari joop a geetitaanakik a joop sigɛ arɛɛ sɛɛg a geetitaanakik sɛɛg joop wɛy omoŋɔŋk. Agut sini kɛɛ Yeesee keeny sinɔɔnɛ riyɗi sɛɛg kɛ "Manyaakak eetaak."

¹² Tonuɓa kɛ, "Waasaakoy tiriya gooŋk manyaakaka eeta, pɔɔsakoyni iiliyakɛ tolɛɛɗ joopoŋk kɔɔr."

¹³ Ɛɓa tonu kɛ, "Ŋaadiɗikakoy Waakoyote." Ɛ tonu kɛkar kɛ, "Dɛnko, eet a tɔɔmɔk sigɛkanta gaɓɛ sɛɛg Waakoyotuk."

¹⁴ Oko sinɛ tɔɔmɔk Waakoyotoŋk sɛɛg joop sigɔ latu buusɛ a yɛromk, nɛɓɔrɛ ɓɛɛlɛ Yeese a iɗit oko sɛɛg, ijaagɓa sini kɛnɔ sɔɔkɛ diyabiloos sinɛ lak ɓaŋkawuka ret raŋk goy rer nɛɛkik.

¹⁵ Ɛɓɔrɛ kɛnɔ boŋku joop sigɛɓa atu laaŋoyk emeyikɛ gɛŋk baŋɛk agut sinɔɓa ɓuurerɗi rerk.

¹⁶ Agut sinɔ ɗɛyɛɓa Yeese tɔkɔnya komoy Abrahamuk, ma mokoɓa ɗɛyɛ tɔkɔnya wosɛytaanak Waakoyotoŋkuk.

¹⁷ Agut sini ɗɛygeeɗ a gayi a manyaakak ant baŋɛ, oko sinik dakɛɓa a sɛɛn ɔɗɔwen tapa ŋaadiyɛɛkoŋk sinɔ ŋaadɛ ɛ maariytank kɛnɔ ijaagɗi Waakoyota nɔ ranyjɛɛr tikiyɛ joopoŋk.

¹⁸ Agut sinɔɓa sɛŋk laŋkiɗ rakatɛ saaɓa paariɗɛɛk, nɛ oolɛ a kɔnyɛ joop sigɛ paarɛɛ sɛɛgkiŋ.