Ibirawiyaan 11 - Kuumeet Sinɔ Tɔɔnuk Ad Majaŋeeroŋk

Ŋaadiyɛ Ɔrɛyak Gaŋkik

¹ Ŋaadiyɛ jikonak? Ege ŋaadiyɛɛk sigɔ kɛ dusanɛɛkoy any sinɛ kookorii a koy laŋii eekeerɛk, ɛ ɗegerɗii kɛ ɗɔm kɛ ɓɛɛlɛr ola sigɛ kii taantakiŋ.

² Pɔɔsɛɓa Waakoyot ɔrɛyak gaŋk agut ŋaadiyɛ gɛŋk.

³ Mɛlɛ tina ŋaadiyɛɛkɛ kɛ riiɓɛɛɓa ɗoo a ola baŋɛ Pɛɛnii Waakoyotoŋk, agut sini riiɓɛɛɓa any sinɛ dɛnɛɛk ant sinaanɛ kɛɛ taantak.

⁴ Wideerɓa Aabeel uduŋeet Waakoyota ŋaadiyɛɛkɛ sinɔɓa kaalɛ uduŋeet Kaayelik. Saaɓa Waakoyot boŋiiɗ uduŋeet Aabeelik yaakaatik, nɛɓa waasigeeɗ kɛ, "Iin iɗit sinɔ mentan taamɛkɛ Gaanɛkik." Kɛygunɓa aasi rɛrkɛɛŋ, mayakana waawasi mɛlɛɛɗa sisɔwa ŋaadiyɛɛkɛ gɛɛnɛk.

⁵ Boŋɛɛɓa Henook dariya ŋaadiyɛɛkɛ a inɓa ki rerin, kɛɛɓa laŋiiɗ agut sinɔɓa boŋiiɗ Waakoyotuk. Waasɛɛɓa agut sɛɛn kɛ ariɓa Waakoyo a yaageeɗiŋ a inɓa kɛɛ sɛɛn boŋiiɗ.

⁶ Kɛɛ iɗit sinɔ ari Waakoyo a yaageeɗŋɔŋk, ma kiiɗɛ ŋaadiyɛɛk. Agut sinɔ iɗit sinɔ wideer ɛɛk Waakoyotak ɗɛygeeɗ a ŋaadi kɛ ɓɛɛlɛ Waakoyot ɛkoy gaɓɛ gati nɛŋk joopa sigaaga ɗɛyɛr sɛɛnik.

⁷ Nɛɓa Waakoyot rɔɔrɔka Nooha agut any sinɔ in kɛɛ taantak, nɛɓa ɓure Waakoyo nɛ ijaag emɗ ŋaadiyɛɛkɛ kɛnɔ ebɔdɛ joop wɛy nɛɛkik. Nɛɓa goop ɗoo nɛɛk ŋaadiyɛɛkɛ, nɛ moonɛ mentankaat taamɛkɛ Waakoyotoŋk sinɔɔnɛ laŋɛɛ ŋaadiyɛɛkɛk.

⁸ Tiiɗiɓa Abraham ŋaadiyɛɛkɛ saaɓa riyɗɛ sɛɛn kɛnɔ kɛɛ nyona sinɔɔna boŋu a any sinɔɓa ŋɔrguɗɛɛŋɔŋkuk, nɛɓa kɛɛŋ kɛygunɓa kiikɛ ɗegerɔɔn saan kegeeɗikiŋ.

⁹ Nɛɓa beeɗ ŋaadiyɛɛkɛ ɗook sinaanɛɓa kuumɗigeeɗ Waakoyotuk a ito sɛɛn koonaat, nɛɓa beeɗir duukaanoy a Isiyaak a Yaykoob sinɛɓa boŋur kuumiyɛ sigɔ omoŋɔŋk Waakoyote agut omoŋk.

¹⁰ Agut sinɔ kookorɓa katamɛ sinɛɓa ragad ɛɓa riiɓe Waakoyotuk sinɔ lak nyon sinɛkoy nɔkoy nɔkoyk.

¹¹ Laŋiɓa Saara ɓaŋkawuka gamɛɛɗoŋk ŋaadiyɛɛkɛ, kɛygunɓa emeyi gɛɛnɛ ɓɔɔkaakɛŋ. Nɛɓa ɗeger Waakoyo sinɛɓa kuumɗigeeɗik kɛ eekerkan.

¹² Agut sini laŋɛɛɓa Abrahame sinaanɛɓa ikomɛɛ a ito iɗit sinɔɓa rɛrŋɔŋk komoy sinɔ obiiŋɔŋk a ito maryɔ dariyoŋk ɛ ito kɛɛwɛ gɔrɔ sinɔ obiiŋɔŋk a kɛɛ ikomiitik.

¹³ Nɛɓa rɛrar joop sigi baŋɛ ŋaadiyɛɛkɛ gɛŋk, kirɓa laŋiiɗ ola sigɛɓa kuumɗigeeɗ sɛɛga Waakoyotuk. Yakanaɓa dɛnɛɛtar a yowɛɛɗiŋ nɛɓa ikomur a itoɓa laŋirŋ, ɛɓa tonur kɛ, "Eteŋk konaan a weytataktaanak" ɗook raŋk.

¹⁴ Joop sigɛ tonur oko sinikik yaaŋɛr kɛ ɗɔm sinɔ kɛ kookorar ɗoo sinɔ nɛŋkik.

¹⁵ Ɔkɔnɓa koɓur ɗoo sinɛɓa ŋɔɗarkiŋ, gunɓa latu milki sinɔ weeriiɗi saanaŋɔŋkuŋ.

¹⁶ Yakana sisɔ ɗɛyɛr ɗoo sinɔ kaalɗiŋɔŋk sinɔ ar darik. Nɛ agut sini kɛɛ keeny Waakoyote sinɔɔnɛ riyarɗi sɛɛn kɛ "Waakoyo naŋkik," agut sinɔ ragadiɓa sɛɛga katamɛɛŋ.

¹⁷ Wideerɓa Abraham tɔɔn nɛɛk Isiyaak a uduŋeet ŋaadiyɛɛkɛ ɓeny saaɓa sɛɛn paariɗ Waakoyotuk, sɛɛn sinɛɓa boŋu Pɛɛni ŋaadiyɛ sigɛ kookorɛɛk kɛnɔ uduŋe tɔɔn nɛɛk sinɛ omoŋɔŋk,

¹⁸ tongeeɗɓa Waakoyot kɛ, "Riyɛɛkoy komoy nɛɛk goy Isiyaakik."

¹⁹ Ɗegerɓa Abraham sinɔ kɛ lak Waakoyot ɓaŋkawuka sinɔ boŋkuɗ reteerŋɔŋk, nɛɓa laŋi Isiyaak kɛkar oko sinɛ ŋaarkiɗɛ ret walasak.

²⁰ Geetiɓa Isiyaak Yaykoob a Eesawu ŋaadiyɛɛkɛ agut any sinɛkoy ɓɛɛlɛ ɔɗɔɔkaak.

²¹ Geetiɓa Yaykoob tɔɔmɔk Yoosepuk a omoŋ omoŋ ŋaadiyɛɛkɛ saaɓa rɛrɗik, ruuɗeerɓa ɔɗɔ nɛɛk gumboya nɛɛka nɛ ugumeŋ Waakoyota.

²² Tonɗiiɓa Yoosep ŋaadiyɛɛkɛ saaɓa wɔɔŋkuɗ retaak agut ŋaarin joop Israeelik Gibseek, ɛɓa sekɛ sɛɛga kɛ diileerkoy ɛmɛɛk gaaŋkiŋ.

²³ Dugerɓa Muusee bɔɔlɔŋer gɛɛnɛ ŋaadiyɛɛkɛ a ɛyɛkeer jiit. Maɓa dɛnɛr a tɔɔn sinɔ marariŋɔŋk saaɓa ɓartɛɛɗɛɛk, kirɓa ɓureeɗ sekiyɛ sigɛ suumiyoŋk.

²⁴ Kiɓa Muuse ɗɛyɛ ŋaadiyɛɛkɛ a in sɛɛn riyɛ kɛ kaakɛɛ Pɛr'oonuk saaɓa ɓɔlɔrɛɛɗik.

²⁵ Daamɓa kaasiyɛ laaŋoy a joop Waakoyotoŋk agut omoŋ a kaalɛ yaaka sinɛ laŋɛɛ tikiyɛɛkɛ ɔɔtɛya sinɔɔna balaaŋɔŋkuk.

²⁶ Koɓuɓa sinɔ kɛ a kaalɛŋ kaalɗi boŋii rakatɛyoŋk agut Keresee worii sinaanɛ ar Gibseek, agut sinɔ mermenɓa ruukiyɛ sigɛkoy boŋɛɛ ɔɗɔɔkaak.

²⁷ Ŋɔrkuɓa Muuse Gibs ŋaadiyɛɛkɛ aɓa ki ɓureeɗ goopan suumi nɛɛkik, ɓaŋkaawurɓa koɓiiɗ a ikomu Waakoyo sinɛ kɛɛ taantak a itoɓa dɛnɛŋ.

²⁸ Nɛɓa sekɛ ŋaadiyɛɛkɛ joopa Israeelik kɛnɔ ijaagir Ba'aal Ɗoyiɗoŋk, ɛ kɛnɔ wasanir yɛrom gobaniyɛɛka kɛnɔ wosɛytan Waakoyotoŋk sinɛ retoŋk kat ɓokor tɔɔmɔk Israeelik sigɛ tekaayanɛk.

²⁹ Ekaŋɛrɓa joop Israeelik ŋaadiyɛɛkɛ Gɔrɔ sinɔ obiiŋɔŋk Dɛɛŋɔŋk a ito ɗeyir sinɔɔnɛ paalkŋɔŋk, mayakana saaɓa ɓɔrɛ paarirkɛɛɗ joop Gibsik, nɛɓa sɛɛg liilerŋ.

³⁰ Ŋanirɓa joop Israeelik masarɛ giɗetoŋk Iyaarikook ŋaadiyɛɛkɛ a ɗoŋ tula pɛɛy, nɛɓa ɗiiri masarɛ nɛɛkɛŋ.

³¹ Peet sinɛɓa kɛ Rɛaabuk sinɛɓa ruunykank kirɓa rerin ŋaadiyɛɛkɛ a joop sigɛ kir tiiɗitik agut omoŋ, agut sinɔɓa boŋiiɗ yaakaat joop sigɛɓa lɛɛwuɗik dugeeɗik.

³² Anɛ sineene raŋk tona jikon? Kɛɛte ɔɔtɛ sinɔ tonɗiiɗa agut Geedewoon, a Barakik, a Samsoon, a Yoptaahe, a Daawit, a Saamueel, a ɓɔrɛ joop pɛrkaakoŋkuk.

³³ Lɔsɛrɓa joop sigi ŋaadiyɛɛkɛ maŋgistiyɛ, lowurɓa joop kɛ ɗɔm, laŋirɓa kuumiyɛ sigɛɓa gaɓɛɛkiŋ, korurɓa atutun ɗɛpɛyikoŋkuŋ,

³⁴ elaararɓa ɓaŋkawuka maɗoŋkuŋ, bɔdɛrɓa ɗɔmkaat aarɛyoŋkuŋ, ɓaŋkaawurarɓa bɔɔlakaat nɛŋkiŋ, ɓaŋkaawarɓa kaariniŋ, epaayarɓa amaasiniyɛ gaatiyaatɛkoŋkuŋ.

³⁵ Laŋirɓa jartiyatɔk ŋaadiyɛɛkɛ tekaaneer gɛŋk sigɛɓa rɛrɛrark a ɓɛɛlɛr bɔdɛɗ. Maɓa daraayɛr ɔgɔɔk ŋaarin godeey korkoɗɔɔnoŋk yaakaatkiŋ gaɓɛrɓa ɛkan gɛŋk rakatɛya sinɔɔna rɛɛrɛŋɔŋk kɛnɔkoy ŋaarark bɔdɛɛɗa sinaana kaalɗiik.

³⁶ Dakɛrɓa a omoŋ omoŋ a ola ibaaloŋk, ɗiŋɛɛɓa sɛɛgiŋ. Korkoɗɛɛɓa ɔgɔ nɛɓa sɛɛg o'orurɛɛ godeya korkoɗɔɔnoŋk,

³⁷ baabalɛɛɓa sɛɛg giɗeekɛ a rɛrarŋ, lalalɛɛɓa sɛɛg a pɛɛy pɛɛy makaajiyɛɛkɛ, mumukɛɓa sɛɛg aarɛɛkɛ nɛɓa rɛrarŋ, kadirɓa tarmak jiŋkuyoŋk a kemtoŋk aɓa sanɗiiŋ, aɓa rakatɛrŋ, aɓa sɛɛg epapayɛɛŋ.

³⁸ Kiɓa ɗooka gayɛ a boŋu sɛɛgiŋ, rakatɛrɓa sinɔɔnɛ paatoonoŋk, sinɔɔnɛ kurkumɛɛkoŋk, sinɔɔnɛ kaakakatɔkoŋk, a sinɔɔnɛ utulakoŋk.

³⁹ Joop sigi baŋɛ boŋurɓa pɔɔsiyɛ Waakoyotoŋk agut ŋaadiyɛ gɛŋk, mayakana kɛɛ sɛɛge iɗit sinɔɓa boŋu any siniɓa kuumɗigeeɗ Waakoyotuk,

⁴⁰ agut sinɔɓa tina ragadiiɗ Waakoyot any sinɔ kaalɗiŋɔŋk, nɛ kir oolɛ a kɛɛ any sinɔ bitakɗi sɛɛgek mowan a kiiɗɛ eteŋkiŋ.