Gɛlatiyaa 4 - Kuumeet Sinɔ Tɔɔnuk Ad Majaŋeeroŋk

¹ Tona kɔna kɛkar sini. Saa in tɔɔn iɗit sinɛkoy laŋɗiik, nɛ kir pakataat a laaŋoyen. Yakana kɛygun aasi worii baŋɛ nɛɛkiŋ.

² Ar koortaanakɛ a joope sigɔɔgɛ aawoyaŋɔŋk goyse ɗeek mɛlɛɛɗa ɔɔtɛya sinaanaɓa tongeeɗ ɛpɛnaak.

³ Saaɓa ito in eteŋk tɔɔmɔk ŋaadiyɛɛkɛk, nɛɓa eteŋk laaŋoyeer sigɔ ɓalɗigiɗii barɛ ɗoo sinik.

⁴ Yakana saaɓa gayɛɛɗ eme sinɛɓa gaamuk, nɛɓa wosɛyki Waakoyot Tɔɔn nɛɛk, nɛɓa ɓartiɗi peet, ɛɓa tiiɗi higiya.

⁵ Nɔɓa ariiɗ sinik kɛnɔ ɓalki joop sigɛ atu higii goyse ɗeekik, ɛ kɛnɔ tin ari a eteŋk tɔɔmɔk Waakoyotoŋk.

⁶ Agut sinɔ iinak tɔɔmɔkuk, nɛɓa tina gaki Waakoyot Wɛɛŋa Tɔɔn nɛɛkik ɓayɛtunɛɛka gaŋk sigɔ ooyɛr kɛ, "Aba" sigɔ kɛ baabɛɛk.

⁷ Seedi son moko iin laaŋoyen. Iin tɔɔn Waakoyotoŋk. Nɛkoyna gaɓɛ Waakoyot any sinɛɓa ragadikiŋ agut sinɔ iin tɔɔn nɛɛkik.

Koɓi Paawuloos Joopa Gɛlatiyaak

⁸ A inɓa kiir ɗegerɔɔn Waakoyo, nɛɓa iinak laaŋoyeer jookak sigɔ moko eekeerik.

⁹ Yakana sisɔ ɗegerari Waakoyoŋ, ɛ kɔnu ɗeger Waakoyot a kaalɛŋ. Anɛ weerikari higiyɛɛka sigeega bɔɔlaaŋɔŋk badɛɛk ɛk? Ɗɛyɛɛr a iinak laaŋoyeer gɛŋk kɛkar ɛk?

¹⁰ Eemɛyari ɗoŋi a ɛyɛkeer a ɔɔtɛɛ a emeyik sigɔ ɓɛɛlɛr mowank.

¹¹ Kaɗiigiɗa sinɔ kɛ kaɗɛɛŋ bɔɔlaaka kanysɛya agut iinakik.

¹² Iinak manyaakak eeta sigɛ dooytaanakik, kalɛya kɔnu kɛ in ɓɛɛlɛɛ oko eet, agut sinɔɓa saak ɓɛɛlɛɛɗa oko iinakik. Kɛɛ any sinɔɓata tikeerik.

¹³ In ɗegerɛɛ kɛ waasaakan kɔna Pɛɛni sinɔ Ɓɛlkɛɛstank agut sinɔkan arkiɗa goriɗik.

¹⁴ Kɛygunkan aasi kɔna gori naakɛ paariyɛɛŋ. Nɛkanti kiir daraayɛɛt maŋk kiikakan kɔne ɓadi. Boŋiirkanti oko sinɛ boŋurɗɔ wosɛytan Waakoyotoŋk, ɛ kanti boŋiir oko sinɛ boŋurɗɔ Yeese Kereseek.

¹⁵ Ar sisɔ eet yaaka ɓayaayoŋk sinɛkan latukari jeemɛk? Waasa kɔna kɛ ɔkɔnkan kɔna gayɛŋ gunɓa boboŋarkɔ taamɛ goŋk nɔ gunɓata gaɓɛɛr sɛɛg.

¹⁶ Anɛ eet gumaaken noŋk agut sinɔ kɔna toniiɗa eekeer sisek?

¹⁷ Ɗɛyɛr rɔɔriytaanak sigɛ nyonkaanakik a kɔnu boŋur ɛɛka nɛŋk, mayakana moko anta sinɔɔna mentanŋɔŋk. Ɗɛyɛr sɛɛk kɛnɔ tine pakatiir ɛɛk kɛnɔ kɔnu arir a iinak gɛŋk.

¹⁸ Ɔkɔn koɓi nɛɛkɛ mentan, nɛ mentan ɓaŋkaawurɔɔnuŋ. Mayakana kat ɓaŋkaawurari saa arkiɗa sooy lak iinakik dakɛɗa.

¹⁹ Iinak tɔɔmɔk gaaŋk, suusuwiti amɗ mɛlɛɛɗa nɔkɔɔ dɛnɛɛɗɛɛ ɓɛɛl Kereseek iinakɛk.

²⁰ Ɗɛykaaya sisɔ a gun arka saay lak iinakik nɛ gun kɔna yaaŋa toni sinɔ pakata sinaanɛkan ɔɗɔɔkɛɛk. Yakana kaa ɗegerɔɔn kɛ ijaaga jikon.

Agaar A Saaraa

²¹ Iinak joop sigɛ ɗɛyɛɛr a beeɗiir a ɓaliir ɛɛk higiyaak, a intɔta tonɛɛ. A kiir weenta any sinɛ tonu higiik?

²² Taapɛɛɓa Wargatɛɛ Waakoyotoŋk kɛ lakɓa Abraham tɔɔmɔk a pɛɛy. Ɓartɛɛɓa omoŋ nɛɛk peete sinaanɛɓa laaŋoyenk, maɓa om ɓartɛɛ peete sinaanɛɓa ar yaakaatik.

²³ Ɓartɛɛɓa tɔɔn sinɛɓa ɛmɛsa laaŋoyenk barɛɛɗ taaroŋk. Mayakanaɓa ɓartɛɛ tɔɔn sinɛɓa ar ɛmɛsa yaakatik pɛɛnii kuumiyɛɛkoŋk.

²⁴ Ege sini rɔmɛ. Egeɓa peeta sigi pɛɛyk rɔmɛ kuumiyɛ sigɔ pɛɛyk. Omoŋ kuumiyɛɛkoŋk Agaar sinɛɓa ar kurkum Siinaak. Ɓararatɓa sɛŋk tɔɔmɔk laaŋoya.

²⁵ Egeɓa Agaar rɔmɛ kurkuma Siinaak sinɛ laŋɛɛ ɗook Arɛbuk. Agut sini gayi a katamɛ Yorsaleemuk sinɛ sisɔk. Ar sɛŋk laaŋoy sɛɛn a tɔɔmɔk gɛɛŋk.

²⁶ Mayakana beeɗ Yorsalem sinɛ ar darik yaakat, sɛɛn sɛŋk ɛmɛs eteŋka.

²⁷ Agut sinɔ taapɛɛɓa Wargatɛɛ Waakoyotoŋk kɛ, "Inna yaa, iin tersikan sinɛ kin ɓartɛɛt tɔɔmɔkuk. Iliisik, iin sinɛ ki suusuwit amɗ nookɛɛkik. lak tɔɔmɔk a ɓɔɔkaaŋ, Jarti sinɛɓa ŋɔr sɛɛn baabuy nɛɛkɛɛkik. a kaalɛ sinɛ lak baabuyk."

²⁸ Iinak manyaakak eeta sigɛ dooytaanakik, iinak ɓɔrɔ tɔɔmɔk pɛɛni kuumiyɛɛkoŋk oko Isiyaak.

²⁹ Ɓeny saaɓak epapayɓa sinɛɓa ɓartɛɛ barɛɛɗ taaroŋk sinɛɓa ɓartɛɛ Wɛɛŋakɛ sigɔɔgɛ Geetitaanakiŋ. Nɛ ɓɔrɛ ɓenyse ɓɛɛlɛ oko sinɛk.

³⁰ Mayakana tonu Wargatɛ Waakoyotoŋk ɛk? Tonu kɛ, "Tɔɔn sinɛɓa ɓartɛ jarti sinɛ laaŋoyenk kir moonɛɛt a tɔɔn sinɛɓa ɓartɛ jarti sinɔ ar yaakaatik agut omoŋ. Nɛɓa ɔɔyɛɛr laaŋoyen nɛɛk a tɔɔn nɛɛk sinɔɔnɛ."

³¹ Agut sini iinak manyaakak eeta sigɛ dooytaanakik, eteŋk tɔɔmɔk jarti sinɛ ar yaakaatik, ma moko eteŋk tɔɔmɔk jarti sinɛ laaŋoyenk.