Gɛlatiyaa 2 - Kuumeet Sinɔ Tɔɔnuk Ad Majaŋeeroŋk

Boŋur Paawuloos Wosɛytaana

¹ Weerikiiɓa Yorsaleema a Barnabaas agut omoŋ, emeyikɛ sigɔɔgɛ aarin a aŋank baŋiya, maɓa ɓɔra diila Tiitoo nɛ kɛɛɗii a eet agut omoŋ.

² Kɛɛɗaɓa oko sinɛɓata yaaŋɛɛɗ Waakoyotuk. Saaɓa atukuɗ ɔɗɔwer tolɛɛɗik nɛɓa waasa sɛɛga dugeeɗ wosɛ Pɛɛni sinɔ Ɓɛlkɛɛstank sinɛ waawasa joopa sigɔɔga moko Ayuuduk. Nɔɓa ariiɗa sinik kaaɓa ɗɛyɛ a dakɛ ijaag naakɛ kanysɛyaaŋ.

³ Kɛɛkan direɗ Tiitoo sinɛkan sɛɛn a eetik kɛnɔ yawɛɛ, kɛygunkan aasi sɛɛn iɗit Giriikikiŋ.

⁴ Mayakana ɗɛyɛrkɛkan manyaaka eteŋka sigɔ nyonkaanakik a omoŋ omoŋ sigɛkan ɓoonɛrk eteŋka kɔɔra dugeeɗik, nɔ guugnyarkiɗ eteŋka kɔɔraakik, paarirkɛɓa a gun tine boŋur yaaka sinɛkan laŋii Yeese Kereseek nɛ tin jumurar laaŋoya.

⁵ Yakana kiikan aasi sɛɛga tiiɗit ɔɔtɛya sinɔɔna dinyŋɔŋk kɛnɔ kɔne in ɓaŋkaawurar eekeer Pɛɛni sinɔ Ɓɛlkɛɛstank.

⁶ Kɛɛ eete ɔɔtɛ agut sinɔ kɛ ɔɗɔweerɓa jeemɛ wooɗakik, ki Waakoyot pakaatɛ joop saa dɛnɛɛɗ taamɛ gɛŋkik, kɛɛ any sinɔkɔta tuukerki joop sigi wosɛya naakaakik.

⁷ Yakana dɛnɛrkan a kanta gaɓɛɛ adarat kɛnɔ ɓɔra waasa Pɛɛni sinɔ Ɓɛlkɛɛstank joopa sigaagaɓa kɛɛ yayawɛɛk, oko sinɛɓa gaɓɛɛɗɛɛ Petrosa adarat kɛnɔ waasɛ Pɛɛni sinɔ Ɓɛlkɛɛstank joopa sigaagaɓa yayawɛɛk.

⁸ Waakoyo sinɛɓa ari Petros kɛnɔ ijaagɗi a sɛɛn wosɛytan joop Ayuuduk, nɛkan ɓɔrɛ ari eet kɛnɔ ijaagɗikaa a eet wosɛytan joop sigɔ moko Ayuuduk.

⁹ Saaɓa mɛlɛɛɗ ɔɗɔweera sigɔɔga dɛnɛɛ sɛɛg a ito tuusik Yaykooba a Petrosa a Yowanisa kɛ gaɓɛɓata Waakoyot wookan sinikiŋ, nɛkan tina gaɓɛr arin gɛŋk gɔɔteer sigɛ ɗiɗikakik eet a Barnabaas. Nɛ mɛyi saadi kɛnɔ kɛɛɗii son lak joop sigɛ moko Ayuuduk, ma sɛɛk kaar son lak joop sigɛ Ayuuduk.

¹⁰ Sinɛkan tina arir a adaratik dakɛɗa kɛnɔ in koɓukii sinɔ kɔnyɛɗii sankaanakik, ɗɛyakan ɓɔra a gunkan ijaaga siniŋ.

Koykoyɛ Paawuloos Petros Ansokiyaake

¹¹ Saakan mɛlkiɗ Petros Ansokiyaakaak, nɛkan koykoya eekeerɛ agut sinɔkan tikiɗiɗŋɔŋk.

¹² Agut sinɔ a inkan kirki mɛlɛ Ansokiyaaka joop a omoŋ omoŋ sigɛkan wosɛyki sɛɛg Yaykoobuk, nɛkan ɗami agut omoŋ a joop sigɛ ŋaadiɗi joope sigɔɔgɛ moko Ayuuduk kɔɔrk. Mayakana saakan kurakiɗik baŋiya, nɛkan ɓure joop sigɔ tonur kɛ, "Ɗɛyɛ a yayawɛɛ joop sigɛɓa ŋaadiɗi ma moko sɛɛg joop Ayuudukuŋ." Nɛɓa weeri baŋiya nɛ pakati ɛɛk joope gɛɛnɛk.

¹³ Dooytaanak sigɔ komoy joop Ayuuduk nomɛrɗikan tagay Petrosuk, a kan aasi ɓɔrɛ ki dakɛ Barnabaas tagay nɛŋk.

¹⁴ Saakan dɛnɛɛɗa ijaag nɛŋk a kir mɛyit a eekeer Pɛɛni sinɔ Ɓɛlkɛɛstank, nɛkan koykoya Petros joope baŋɛ taamɛkɛ a tonguɗa kɛ, "Petros, iin iɗit Ayuuduk, yakana kin beeɗit oko joop Ayuuduk. Ma beeɗin oko joop sigɔ moko Ayuuduk. Anɛ dirin joop sigɔ moko Ayuuduk kɛnɔ beeɗir oko joop Ayuuduk agut jikon?"

Bɔdɛr Ŋaadiyɛɛkɛ Joop Ayuuduk A Joop Sigɔ Moko Ayuuduk

¹⁵ Eteŋk joop Ayuuduk ɓartiyɛɛkɛ gaŋk, ma moko ɓɛɛlii oko joop sigɔ moko Ayuuduk sigɔ tikitaanakik.

¹⁶ Ɗegerii kɛ kɛɛ iɗit sinɔ mentan taamɛkɛ Waakoyotoŋk ma dusanɛ higiik ma moko ŋaadiɗi Yeese Kereseek. Yakanaɓa seek ŋaadiɗikii Yeese Keresee kɛnɔ mentankii taamɛkɛ Waakoyotoŋk, ma ŋaadiɗikii Keresee, ma moko dusanii higi. Kɛɛ iɗit sinɔ mentan taamɛkɛ Waakoyotoŋk ma dusanɛ higik.

¹⁷ Mayakana saa ɗɛyɛɛɗii a mentankii taamɛkɛ Waakoyotoŋk ma ŋaadiɗikiiŋɔŋk, nɛ tin laŋkɛɛ a eteŋk tikitaanak ɔɗɔwa naŋk, anɛ ari Kerese kɛnɔ bakaanyirar tikiyɛɛkiŋ? Ki sini ariiɗ adaktan.

¹⁸ Ɔkɔn weeriika nɛ ijaaga any sinɛɓa ŋɔɗaakiŋ, nɛ yaaŋa soon kɛ eet iɗit sinɔkɔ sɔɔkɛ higik.

¹⁹ Rɛɛraakan goy higiyoŋk higiya kɛnɔ beeɗaa Waakoyota. Laalawɛɛkanti a Keresee agut omoŋ.

²⁰ Beeɗ sisɔ Kerese eete tak, ma saak kaa beeɗit wɛɛŋaka gaanak. Beeɗit naakɛ sinaanɛ taareek beeɗa a ŋaadiɗika Toomoy Waakoyotoŋk sinaanɛɓati poru nɔɓa gaɓɛ ɛɛk nɛɛk agut eetik.

²¹ Kaa toŋoɗ wookan Waakoyotoŋk kanysɛya. Agut sini ɔkɔn iɗit mentan taamɛkɛ Waakoyotoŋk ma dusanɛɛ higiiŋ, anɛɓatɔ Kerese rɛr kanysɛya.