Epesoon 6 - Kuumeet Sinɔ Tɔɔnuk Ad Majaŋeeroŋk

Agut Tɔɔmɔk A Bɔɔlɔŋeer

¹ Iinak tɔɔmɔk, in tiiɗikɛɛ bɔɔlɔŋeera goŋk Suumii, agut sinɔ ege sini any sinɔ likik.

² Ege sigi sekiyɛ sigɛ tuktaanakik sigɛ latu ŋaadiyɛ sigɛ kookoriik sigɛ tonur kɛ, "Eemɛyi ŋaaŋa a ɓaaɓa,

³ ɔkɔn eemɛyin ŋaaŋa a ɓaaɓaŋ, nɛkɔɔ jeeɗuwatu emeyi goonɛŋ. Ɛkɔɔ lakin geet sinɔ obiiŋɔŋk."

⁴ Maɓɔrɛ iinak bɔɔlɔŋeer, kat lowɛɛ tɔɔmɔk goŋk a ariir sɛɛg a ŋadirŋ, ma in aawoyɛɛ sɛɛg rɔɔriyɔɔn Suumiyoŋk a koykoyɛt nɛɛkɛk.

Laaŋoyeer A Suumiyɛ

⁵ Iinak laaŋoyeer, in tiiɗikɛɛ suumiyɛɛka goŋk taaroŋk eemɛyɔɔn a tuɓur a ɓayaay sinɔɔnɛ ɓɛɛlɛ kɛ ɗɔmk oko sinɛ tiiɗiɗɔ Kereseyaak.

⁶ Moko tiiɗikar sɛɛga dɛnɛɛɗa a ariir joop a yaa sɛɛgaŋ, ma tiiɗikar sɛɛga oko laaŋoyeer Kereseek sigɔ arir ɗɛyan Waakoyotoŋk ɓayɛtunɛɛkɛ gɛŋkik.

⁷ In ijaagɗikɛ ɓayɛtunɛɛkɛ goŋk baŋɛ a ito ijaagɗigiɗɔ Suumi a moko ijaagɗigiɗɔ joop,

⁸ agut in ɗegerɛɛ kɛ iɗit a omoŋ omoŋ, kɛygun suumi kɛygun ijaagen laŋkoy koyi any sinɔ mentanŋɔŋk sinɛɓa ijaagɗigeeɗikiŋ sooy lak Suumi nɛɛkik.

⁹ Maɓɔrɛ iinak suumiyɛ, in ɓɔrɔ ijaagɛɛ laaŋoyeera goŋk oko sinik. Kat epɛɛrɛ ɛɛk. In ɗegerɛ kɛ latukari iinak a sɛɛg Suumi rakaay sinɔ ki pakaatɛ joopuk.

Beya Waakoyotoŋk

¹⁰ Pediya nɛɛka, in ɓaŋkaawurɛɛ Suumii a ɓaŋkawukaat nɛɛkɛk sinɔɔnɛ obiiŋɔŋk.

¹¹ In kadɛ beya Waakoyotoŋk baŋɛ nɔkɔɔ oolɛrɗɔ ɓooyan ɗɛgɛ diyabiloosuk.

¹² Moko kaarin naŋk a joop, ma kaarin naŋk a ɔɗɔweer sigɔ ŋɛɛwɛŋɔŋk, a ɓaŋkawukaatak sigɛ ɓalɗi nyuugurak sigɛ ɓalir ɗoo sinik, a wɛɛŋa sigɔ somkaanakik sigɔ atu darik.

¹³ Agut sini in boŋɛɛ beya Waakoyotoŋk baŋɛ nɔkɔɔ oolɛɛr kolan ɛɛkoŋk kaarin gumakeeroŋk ɓeny saakɔɔ ŋɛɛwɛnŋɔŋk. Nɛ saakɔɔ kaararɗɔ nɔ lɔsiɗikarik, nɛkɔɔ ɛtɛɛr a ɓaŋkawuŋ.

¹⁴ Sisɔ in ɛtɛɛ a ɓaŋkawuŋ kɛnɔ tusɛɛ teeɓɛ eekeeroŋk, a any sinɔ kolɗɛ kokomk mentanka taamɛkɛ Waakoyotoŋk.

¹⁵ In gaɓɛɛ deraka Pɛɛni sinɔ Ɓɛlkɛɛstank bɔdɛɛɗoŋk okokɔ saamɛɛkoŋk.

¹⁶ In boŋɛɛ gaasin ŋaadiyɛɛkoŋk ariita kɛnɔ kɔɔ oolɛrɗɔ kolan ɛɛkoŋk ɛrgint setanik sinɔɔnɛ boltiɗi a maɗik.

¹⁷ In riiɓɛɛ dooroy awɛytoŋk bɔdɛɛɗoŋk aɗoy ɛ in boŋɛɛ aarɛ Wɛɛŋa sigɔ Geetitaanakik. Sɛɛn Pɛɛni Waakoyotoŋk.

¹⁸ In ɗanɗamaakɛɛ ɓɛɛnyɔwɛ gɛɛŋk baŋɛ olaata baŋɛ Wɛɛŋakɛ sigɔɔgɛ Geetitaanakik, in ɓeɗɛɛ kɛnɔ ɗanɗamaakɛɛ dooytaanaka ɔgɔɔka baŋɛ.

¹⁹ Ɛɓɔrɛ in ɗanɗamaakɛɛ agut eet, in kalɛyɛɛ Waakoyo kɛnɔta gaɓɛ dugtan nɛɛk, sinɛ Pɛɛni sinɔ Ɓɛlkɛɛstank sinɔ likik kɛnɔ waasa a kaa ɓuriit.

²⁰ Kɛygun aasi sisɔ arkaaya korkoɗɔɔn meltiikɛ awɛytiiroŋkuŋ nɛ eet wosɛytan Yeeseek kɛnɔ waasa Pɛɛni sini Bɛlkɛɛstank. Nɛ inta ɗanɗamaakɛɛ kɛnɔ tona any sinɛta ɗɛyɛk a kaa ɓuriit.

Digoy Sinɛ Pedtank

²¹ Manya eteŋka Tikikoos sinɛ porɛɛk, ɛ ŋaadɛɛ ijaag Suumi Yeeseek, tonukɔɔ kɔna ola baŋɛ agut eet kɛnɔ ɗegerari kɛ ijajagakan jikon ɛɓɔrɛ kɛ ɓɛɛlakan ɛk.

²² Wosɛyɛɛrakan sɛɛn son lak iinakik agut any sini, kɛnɔ ɗegerari kɛ ɓɛɛlii ɛk, ɛ kɛnɔ kɔnu ar a ɓaŋkaawurariŋ.

²³ In dakɛ a bɔdɛ, a mɛyin a ŋaadiyɛ agut omoŋ dooytaanaka sooy lak Baabɛ Waakoyok a Suumi Yeese Kereseek.

²⁴ In dakɛ a wookan mɛyin sinɔ koy ki yawuɗiitik joopa sigaaga porur Suumi naŋk Yeese Kereseek baŋɛ.