Epesoon 5 - Kuumeet Sinɔ Tɔɔnuk Ad Majaŋeeroŋk

In Beeɗɛɛ Pɛɗɛrkaat

¹ Sisɔ in gaayɛɛ Waakoyo, oko sinɛ iinak tɔɔmɔk gɛɛŋk sigɛ kɔnu poruk.

² In ɓɔrɔ beeɗɛɛ mɛyin nɛɛkɛk oko sinɛ tin poriiɗ Kerese sinɛɓa gaɓɛ ɛɛk nɛɛk agut eteŋkik a tigi a uduŋeet sinɔ ŋaaɗɛ yaagarŋɔŋk a ari Waakoyo a yaageeɗŋɔŋk.

³ Kat kɔne tiyɛɛ a daktan any sinɔ ito sinik kat ijaagɛɛ ruunyikeen, maŋk somakɔ sigɔ ɓɛɛlɛr kundiyaakɛk, maŋk ɓukurka amɗoŋk, agut sinɔ ola sigɔ ito sigik kir ɗegegerit a joop Waakoyotoŋk.

⁴ Kikɔna ɗɛyɛɛ a toniir any sinɔ keerɛŋɔŋk a any sinɔ ɓɛɛl kanysɛyaak maŋk sinɔ ŋɛɛwɛnŋɔŋk, ma in wideerɛɛ pɔɔsiyɛ Waakoyota.

⁵ In ɗegerɛɛ kɛ iɗit sinɔ ibiɗiiŋɔŋk a sinɔ ijaag somakɔɔk maŋk ɓukurka amɗoŋk sinɔ ito ugumɛɛ raŋaawotakaak kiiɗɛ koy nyon burɛɛ Waakoyotoŋk.

⁶ Kat lakɛ iɗit sinɔ kɔnu raamɛ toniiɗ sinɔɔnɛ ɓɛɛlɛ kanysɛyaak agut ola sigi, agut sinɔkɔɔ mɛlkiɗ goopan Waakoyotoŋk joopa sigaaga kir tiiɗitikiŋ.

⁷ Nɛ kat ɓɛɛlɛɛr a joop sigi kir tiiɗitik agut omoŋ.

⁸ Agut sinɔ atukariɓa jeemɛ nyuugur tak, mayakanaɓɔ sisɔ atukari pɛɗɛrkaat Suumiyoŋk. Agut sini in ɓɛɛlɛɛ oko tɔɔmɔk sigɔ beeɗir pɛɗɛrkaatik.

⁹ Agut sinɔ gaɓɛ pɛɗɛrkaat mentanka baŋɛ, a mentanka taamɛkɛ Waakoyotoŋk, a eekeer.

¹⁰ In warɛɛ any sinɛ ar Suumi a yaageeɗŋɔŋk.

¹¹ Kat ɓɛɛlɛɛr a ijaag nyuuguroŋk sinɔ ŋɛɛwɛnŋɔŋk kiiɗɛ taamɛk agut omoŋ, ma in boŋkɛɛ pɛɗɛrkaata kɛnɔ yaaŋɛɛ.

¹² Agut sinɔ lakɛ aasi keeny sinɔɔna toniiɗɛɛ ola sigɛ ijaagir joop dugeeɗik.

¹³ Dɛnɛɛ any baŋɛ kɛ ɗɔm eekeer gɛɛŋk saa ŋaarkiɗ pɛɗɛrkaataak.

¹⁴ Agut sinɔ ege any sinɛ dɛnɛɛk baŋɛ pɛɗɛrkaak, agut sini tonɛɛɓa kɛ, "Iin sinɛ ɗeegarink ɓeɗik, teŋaarak ret walasa, tipeyɗiirkɔɔna Kereseeŋ."

¹⁵ Sisɔ in koorɛɛ ɛɛk sinɔɔnɛ kɛ beeɗiir ɛkik. Kat beeɗɛɛ oko gaagɛyɛ, ma in beeɗɛɛ oko joop sigɔ ɗegerar ɛɛkik.

¹⁶ In ijaagɛɛ any sinɔ mentanŋɔŋk milkii sinaanɛ laŋiirik baŋɛ, agut sinɔ ŋɛɛwɛɛkiɗ ɓɛɛnyɔwɛ gɛɛnɛŋɔŋk.

¹⁷ Agut sini kat ɓɛɛlɛɛ a iinak gaagɛyɛ, ma in koɓukɛɛ ɗɛyan Suumiyoŋk.

¹⁸ Kat pɔɔyɛɛ ogool wɛyinik agut sinɔ kɔɔ kɔnu diileɗ badɛɛɗak, ma in enyɛriikɛɛ Wɛɛŋakɛ sigɔɔgɛ Geetitaanakik.

¹⁹ In waawasikɛɛ ɛkanɛɛkɛ goŋk iiliyakɛ, a tukuun, a iiliya sigɔ geetitaanakik, in pɔɔsɛɛ Suumi ɓayɛtunɛɛkɛ goŋk,

²⁰ ɛ in pɔɔsɛɛ Ɛpɛn eteŋka Waakoyo agut ola baŋɛ tiriyaakɛ Suumi naŋk Yeese Kereseek ɓɛɛnyɔwɛ gɛɛŋk baŋɛ.

Jartiyatɔk A Babuyk

²¹ In iɗit tiiɗi mɛŋka ɛkanɛɛkɛ goŋk agut eemɛyɔn Kereseek.

²² Iinak jartiyatɔk, in tiiɗikɛɛ babuyka goŋk oko sinɛ tiiɗiɗɔ Suumiya Yeeseyaak,

²³ agut sinɔ baabuy ɔɗɔ jartiyoŋk oko sinɛ ege Kerese ɔɗɔ gode Sambatɛyoŋkuk, nɛ Sɛɛn ebɔdtan gode Sambatɛyoŋk sinɛ sɛɛn ɛɛk nɛɛkik.

²⁴ In jartiyatɔ tiiɗi babuyka gɛŋk olaatɛ baŋɛ, oko sinɛ gode Sambatɛyoŋk tiiɗiɗ Kereseyaak.

²⁵ Iinak babuyk, in porɛɛ jartiyatɔ goŋk oko sinɛɓa poriiɗ Kerese gode Sambatɛyoŋk, nɔɓa gaɓɛɛɗ ɛɛk nɛɛk agut sɛɛnik,

²⁶ nɔɓa ijaagiiɗ sinik ɗɛyɛɓa kɛnɔ geet gode Sambatɛyoŋk pɛɛnii nɛɛkɛ aɓa aadi maawɛ,

²⁷ ɛɓa ɗɛyɛ kɛnɔ wideer gode Sambatɛyoŋk sinɛ eemɛytank taamɛka gɛɛnaak a mentan a kiiɗɛ laŋiiɗ turi a kir muuwan taamɛ gɛɛnɛk, a geetitan a kɛɛ any sinɔ ŋayɗiikiɗik.

²⁸ Oko sinik, babuyk ɗɛyɛ sɛɛga a porur jartiyatɔ gɛŋk oko sinɛ porurɗu ɛkan gɛŋkik. Iɗit sinɔ poru jarti nɛɛkik poru ɛɛk nɛɛk.

²⁹ Kɛɛ iɗit sinɔ ɓooyu ɛɛk nɛɛkik adaktan. Oko sinɛ wɔɔrɛɗ ɛɛk nɛɛk ɗamatik nɛɓɔrɛ Kerese lowu ɛ wɔɔrɛ gode Sambatɛyoŋk oko sinik,

³⁰ agut sinɔ eteŋk ɓɔrɛ nyonitaak ɛɛk Kereseek.

³¹ Agut sinɔ tonɛɛɓa Wargatɛɛ Waakoyotoŋk kɛ, "Iɗit ŋɔrku ɛpɛn a ɛmɛs, nɛ lotɛr ɛɛk a jarti nɛɛk, sɛɛg ɛɛk omoŋ pɛɛyikent nɛŋk."

³² Obi any sini dugaaŋɔŋkuŋ, nɔ toniiɗa sinik araakɔ a rɔmɛ Keresee a gode Sambatɛyoŋk.

³³ Mayakana mermen ɓɔrɛ kɔnu any siniŋ, nɛ in poru baabuuy jarti nɛɛk oko ɛɛk nɛɛk, maɓɔrɛ in eemɛy jartii baabuy nɛɛk.