Epesoon 3 - Kuumeet Sinɔ Tɔɔnuk Ad Majaŋeeroŋk

Ijaag Paawuloosuk Joopa Sigɔɔga Moko Ayuuduk

¹ Eet Paawuloos sinɛ korkortan Yeese Kereseek ɗanɗamaaka Waakoyota agut iinak sigɛ moko joop Ayuuduk.

² Tiyɛɛrkan eekeerɛ kɛ gaɓɛkanta Waakoyot wookan nɛɛk ijaagoŋk agut iinak.

³ Yaaŋɛkanta Waakoyot any sinɔ dugaaŋɔŋk oko sinɛɓa kɔna taapɛrkiɗa jeemɛ a dinyŋɔŋk.

⁴ Ɔkɔn ambabɛɛr sinɛɓa kɔna taapɛɛrakiŋ, nɛkɔɔ oolɛɛr a kɔna mɛlɛ koɓi any sinɔ dugaaŋɔŋk sinɛ laka agut Kereseekiŋ.

⁵ Kɛɛɓa yaaŋɛɛt any sini dugaaŋɔŋk joopa sigaagaɓa atu emeyikɛ sigaagɛɓa jeemɛk. Mayakana yaaŋɛɛ sisɔ Wɛɛŋakɛ sigɔɔgɛ Geetitaanakik wosɛytaanaka a joopa pɛrkaakoŋk sigaaga geetitaanakik.

⁶ Ege sini any sinɔ dugaaŋɔŋk sinɔ kɛ joop Ayuuduk a joop sigɔ moko Ayuuduk sɛɛg kaastaanak geetiyɛ Waakoyotoŋk ɛ sɛɛg nyonitaak ɛɛk sinɔ omoŋɔŋk. Sɛɛg kaastaanak pɛɛniya ŋaadiyɛ sigɛ kookoriik goy Pɛɛni sinɔ Ɓɛlkɛɛstank Yeese Keresee a joop Ayuuduk agut omoŋ.

⁷ Dakakɔ a ijaagen Pɛɛni sini Ɓɛlkɛɛstank wookaan Waakoyotoŋk sinaanɛɓata gaɓɛk ɓaŋkawukaat ijaag nɛɛkik.

⁸ Kɛygun aasi eet iɗit sinɔ balaakaaya joope Waakoyotoŋk baŋɛkiŋ, nɛɓata gaɓɛɛ wookan sini kɛnɔ waasa obiika sinɛ ar koɓiiɗ rakaayk joopa sigɔɔga moko joop Ayuuduk.

⁹ Gaɓɛɛɓata kɛnɔ yaaŋa joopa baŋɛ any sini dugaaŋɔŋk Waakoyotuk sinɛɓa dugiɗi emeyikɛ sigaagɛɓa ɗeeŋk.

¹⁰ Nɔ ɓɛɛlɛɛɗ sinik kɛnɔ in ɗegerɛɛ ɗegerɔn Waakoyotoŋk sinɛ ɓɛɛlɛ kundiyakɛk sisɔk goy gode Sambatɛyoŋk ɔɗɔweerɛ a joope sigaagɛ latu ɓaŋkawukaak sigaagɛ atu darik.

¹¹ Dusanɛ sisɔ Waakoyot Yeese Keresee, Suumii naŋk oko sinɛɓa gaamiiɗ jeemɛ nɔkoy nɔkoyk.

¹² Oolii a wideerii ɛɛk goy nɛɛkɛ a kii ɓuriit a yaakaat taamɛka Waakoyotoŋk agut sinɔ eteŋk Kereseek ɛ ŋaadiɗikii Sɛɛnek.

¹³ Kalɛya kɔnu kɛ kat jibaatɛɛ agut rakatɛ sinɛkan laŋka agut iinakik, ege sini eemɛyɔn noŋk.

Mɛyin Kereseek

¹⁴ Nɛ sisɔ ɛta korontunɛ nɛ ɗanɗamaaka taamɛkɛ Ɛpɛne eteŋka Waakoyotek agut sini.

¹⁵ Laŋir joop wɛy sinɔ omoŋɔŋk sigɛ atu darik a sigɛ atu ɗookuk Wɛɛŋa Waakoyote.

¹⁶ Ɗanɗamaaka kɛnɔ kɔna gaɓɛ Waakoyot obiika eemɛyɔn nɛɛkik goy Wɛɛŋa gɛɛŋkik a gaɓɛ ɓaŋkawuka sinɔ ari takanak goŋk a ɓaŋkaawurarŋɔŋk,

¹⁷ ɛɓɔrɛ ɗanɗamaaka kɛnɔ beeɗ Kerese ɓayɛtunɛɛkɛ goŋk ŋaadiyɛɛkɛ, ɛɓɔrɛ kɛnɔ gaɓɛɛr tiltilɛ ɛ kɛnyari ɛɛk mɛyin,

¹⁸ ɛ kɛnɔ oolɛɛr koɓi a joop Waakoyotoŋk agut omoŋɔŋk kɛ ɛtɛ mɛyin Waakoyotoŋk ɛk ɓukurka nɛɛkɛk, a yowɛrka nɛɛkɛk rakaaya, a jeeɗoka nɛɛkɛk, a bakanyka nɛɛkɛk.

¹⁹ Ɗanɗamaaka kɛnɔ ɗegerari mɛyin sinɛ ar koɓiiɗ etoŋk rakaayk, ɛ kɛnɔ enyaakari tagay Waakoyotoŋk.

²⁰ Sisɔ Waakoyo sinɛ oolɛ a ijaag a kaalɛ sinɛ kalɛyiik a sinɛ koɓiik goy ɓaŋkawuka sinɛ ijaagɗi eteŋkɛɛk,

²¹ in dakɛ eemɛyɔɔn Sɛɛna godeey Sambatɛyoŋk a Yeese Keresee emeyikɛ baŋɛ nɔkoy nɔkoyk. Ameen.