Epesoon 2 - Kuumeet Sinɔ Tɔɔnuk Ad Majaŋeeroŋk

Ekaŋɛɛt Ret Bɔdɛɗaak

¹ Iinakɓa reteer beeɗit wɛɛŋakoŋk agut ŋɛɛwɛnka noŋk a tikiyɛ goŋk.

² Saaɓak beeɗiirɓa badɛɛɗ a tikiyɛɛkɛ a nomɛrɗɔ any sinɔ ŋɛɛwɛnŋɔŋk ɗoo sinik, ɛɓa ɓɔrɛ nomɛrɗɔ ɓaŋkawuka wɛɛŋa sigɔ ŋɛɛwɛŋɔŋkuk sigɔ ɓalɗi walas taamtuk. Sɛɛg wɛɛŋa sigɔ somkaanakik sigɛ ijaagɗi sisɔ joope sigaagɛ kir tiiɗitik.

³ Beebeɗiiɓa ɓɔre jeemɛ ɗɛyaan taar naŋkik sɛɛge kɔɔr aɓa nonomɗii ɗɛyan taar naŋkik a koɓi kalbi naŋkik. Arkiiɓa goopan Waakoyotoŋk goyse ɗeek riiɓ naŋk oko joop ɔgɔ.

⁴ Yakana agut sinɔ obiikiɗ maariyeet Waakoyotoŋk a mɛyin sinɛ tina lakik,

⁵ kɛygunɓa aasi eteŋk reteer tikiyɛɛkɛ gaŋkiŋ, nɛɓa tina gaɓɛ Waakoyot Wɛɛŋa a Keresee agut omoŋ. Bɔdɛɛrɓa sɔɔk wookaan nɛɛkɛk.

⁶ Nɛɓa tin boŋku Waakoyot ret walasa goy Kereseek, nɛɓa tin riiɓe nyon sinoonɛ ar darik a Sɛɛn agut omoŋ.

⁷ Nɔɓa ijaagiiɗ sinik kɛnɔ koy tina yaaŋɛ wookan geet nɛɛkik sinɔ ar koɓiiɗ rakaayk emeyikɛ sigaagɛkoy mɛlɛrkik agut mentanka nɛɛk.

⁸ Agut sinɔ bɔdɛɛrɓa wookaan nɛɛkɛk goy ŋaadiyɛɛkoŋk, ege sini tigi Waakoyotoŋk, ma moko sinɔɓa laŋɛɛ ijaag noŋkuk.

⁹ Wookan sini bɔdɛɛɗoŋk mokoɓa laŋɛɛ ijaag noŋk, agut sini kat lakɛ iɗit sinɔ meri ɛɛk ijaag nɛɛkɛkik.

¹⁰ Agut sinɔ eteŋk riiɓ Waakoyotoŋk sigɔɓa tin riiɓɛɛ goy Yeese Kereseek kɛnɔ ijaagii ijaagak sigɔ mentaanaŋɔŋk sigɛɓa ragadi Waakoyot jeemɛk.

Omaayikeen

¹¹ Agut sini in koɓukɛ sinɛɓa kɔnu daraayɛrɗi joop Ayuuduk iinak sigɛ ɓartiyɛɛkɛ moko joop Ayuuduk kɛ, "Iinak sigiɓa kɛɛ yayawɛɛk," a merir ɛɛk agut sinɔɓa yayawuɗɛɛ taara gɛŋk ariit etoŋkuk.

¹² Saaɓak ɓɛɛlɛɛrɓa a kɔne kɛɛ Keresee. Pakatiirɓa ɛɛk beeɗit joop Israeelik, iinakɓa konan pɛɛniya kuumiyɛ ŋaadiyɛ sigɛ kookoriik Waakoyotoŋk. Pakatiirɓa ɛɛk Waakoyote a sanɛɛr ŋaadiyɛ ɗook sineene raŋk.

¹³ Iinak sigɛɓa yowɛrkari jeemɛk, yakanaɓɔ sisɔ atukari Yeese Keresee, akɔ widerkɔɔ ɛɛk yɛrom nɛɛkɛk.

¹⁴ Bɔdɛ naŋk Keresee. Sɛɛn sinɛɓa ari joop Ayuuduk a joop sigɛ moko Ayuuduk a omoŋɔŋk. Nɛɓa sɛŋk aalɛ rektan ɗaakanoŋk sinɛɓa tin pakarkiŋ.

¹⁵ Aalɛɓa sɛŋk taare nɛɛkɛk sekiyɛ higi joop Ayuuduk kɛnɔ riiɓe iɗit sinɔ tɔɔnuk kɛnɔ ijaag bɔdɛ.

¹⁶ Ɔɔyɛɓa gumakikeen ret nɛɛkɛk sinaanɛɓa rɛrɗi laalawutant raŋk. Nɛɓa ijaag sigɛ pɛɛyk a sɛɛg ɛɛk omoŋ, nɛɓa sɛɛg ari a taakiɗi a Waakoyo.

¹⁷ Nɛɓa kus nɛ waasɛ Pɛɛni sinɔ Ɓɛlkɛɛstank bɔdɛɗoŋk iinaka sigaaga moko joop Ayuuduk sigaagaɓa yowɛrkarik a eteŋka sigaaga joop Ayuuduk sigaaga arkii jɔkuk.

¹⁸ Agut sinɔ ege sini Keresee sinɛ wideerii ɛɛk goy nɛɛkɛ son lak Ɛpɛn eteŋkaak Wɛɛgakɛ sigɔɔgɛ Geetitaanakik.

¹⁹ Agut sini iinak sigɛ moko joop Ayuuduk moko kɔɔɓɔ seedi son iinak konan a gaatiyaatɛ, ma iinak joop omoŋ a dooytaanak agut omoŋ ɛ iinak joop wɛy Waakoyotoŋk.

²⁰ Iinak gode sinɔɓa kɛnyirɛɛ wosɛytaanaka a joopa pɛrkaakoŋk raŋanaak. Giɗe sinɛ obiik Yeese Kerese ɔɗɔwa nɛɛkak.

²¹ Arɛɛ kɛnɔ in ɓɔlɔɔrɛ a Gode sinɔ Geetitank Suumiyoŋk, nɛ tootokɛɛ gode nɛɛk baŋɛ sɛɛne.

²² Kɛnyɛ ɓɔrɛ kɔnu Wɛɛŋakɛ Kereseek kɛnɔ iinak gode sinɔ beeɗiɗ Waakoyotuk.