Epesoon 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapɛɛrɛɛ seey lak Paawuloos sinɛ wosɛytan Yeese Kereseek oko ɗɛyan Waakoyotoŋk, joopa Waakoyotoŋk sigaaga ŋaadtaanakik sigɛ atu Epesoonek.

² In wookan a bɔdɛ sooy lak Ɛpɛn eteŋka Waakoyok a Suumi naŋk Yeese Kereseek.

Geet Wɛɛŋakoŋk Sinɔ Laŋɛɛ Kereseek

³ In dakɛr pɔɔsiyɛɛk Waakoyota Jooka Ɛpɛna Suumiya naŋk Yeese Kereseya, sinaanakɔ tina gaki geetiyɛ darik goy Kereseek.

⁴ Daamɓa tin Waakoyot Keresee a inɓa kɛɛ riiɓɛɛ ɗoo kɛnɔ eteŋk geetitaanak a tin kɛɛ laaganyɛ taamɛkɛ gɛɛnɛk.

⁵ Ariɓa tin jeemɛ mɛyin nɛɛkɛk goy Yeese Kereseek kɛnɔ eteŋk tɔɔmɔk gɛɛŋk oko ɗɛyan nɛɛk,

⁶ ariɓa sini kɛnɔ in pɔɔsɛɛ wookan sinɛ eemɛyɛɛk sinɛɓa tina gaɓɛ sɔkɔnk goy Tɔɔn nɛɛk sinɛ porɛɛ jɛtik.

⁷ Laŋiiɓa tɔŋɔɗ tikiyɛ gaŋkik ɓaliiɗ yɛrom tɔɔn nɛɛk sinɛ poruk oko obiika wookan nɛɛkik.

⁸ Gupatikɓa tina wookan nɛɛk a obiiŋ ɗegerɔɔn a koɓiiɗ.

⁹ Ariɓa Waakoyot jeemɛ kɛnɔ ɗegerii any sinɔ dugaaŋɔŋk ɗɛyan nɛɛkik mentankaat nɛɛkɛ oko sinɛɓa gaamiɗik.

¹⁰ Saakoy gayɛɛɗ eme sinɛɓa gaamu Waakoyotuk, nɛkoy sonysoomɛ ola sigɛ atu dari a ɗookuk baŋɛ a atu ɓaŋkawukaat suumiikent nɛɛkɛ goyse ɗeek.

¹¹ Daamɓa tin jeemɛ oko sinɛɓa gaamiiɗ Waakoyot sinɛɓa ijaag any baŋɛ oko ɗɛyan nɛɛkik oko sinɛɓa gaamiiɗ kɛnɔ eteŋk tɔɔmɔk gɛɛŋk.

¹² Nɔɓa ijaagiiɗ sinik kɛnɔ eteŋk sigɛ tuktaanak ŋaadiyɛɛkɛ sigaagɛ kookoriik kɛnɔ dakii a pɔɔsiyɛ eemɛyɔna Waakoyotoŋk.

¹³ Iinak ɓɔrɔ sigɛkan tiyɛɛr Pɛɛni sinɔ Ɓɛlkɛɛstank eekeeroŋk sinɛ bɔdɛ noŋkuk, ɛkan ŋaadiɗikari Keresee, wɛɛŋakɛ ŋaadiyɛ sigɛ kookorɛk ɛɓa kɔnu ɗonyɛɛ Wɛɛŋakɛ sigɔɔgɛ Geetitaanakik.

¹⁴ Ege wɛɛŋa sigi any gaamitoŋk mɛlɛɛɗa nɔkoy ɓaliiɗ Waakoyot joop gɛɛŋk yaakataak kɛnɔ dakɛr pɔɔsiyɛɛk eemɛyɔɔna Waakoyotoŋk.

Ɗanɗamɔn Paawuloosuk

¹⁵ Nɛ agut sini tiyaakɔ ŋaadiyɛ sigɛ latukari Suumii Yeeseek a mɛyin sinɛ latukari joopa Waakoyotoŋk baŋɛkiŋ.

¹⁶ Nɛ kɔnu koɓuka ɗanɗamɔɔn naakɛk, ɛ kaa sukuun sinɔɔnɛ widerkiɗa pɔɔsiyɛ Waakoyota agut iinakik.

¹⁷ Ɛ kalɛɗika kɛnɔ ɗegerari Waakoyo sinɛ Ɛpɛn eemɛyɔɔnaak, sinɛ Waakoyo Suumi naŋk Yeese Kereseek kɛnɔ kɔna gaɓɛ Wɛɛŋa ɗegerɔɔnoŋk a yaaŋiyɛɛkoŋk.

¹⁸ Ɗanɗamaaka kɛnɔ ɓuukiɗi kalbiyɛ goŋk ɛ kɛnɔ ɗegerari kɛ riygiɗɛɛkan kɔnu ŋaadiyɛ sigɛ kookoriik kɛ jikonak ɛ kɛnɔ ɗegerari kɛ obi geet sinɛkoy gaɓɛ Waakoyot joopa gɛɛnaakik a ɛtɛ ɛk.

¹⁹ Ɛɓɔrɛ ɗanɗamaaka kɛnɔ ɗegerari ɓaŋkawuka sinɛ ijaagɗi eteŋkɛ sigaagɛ joop Waakoyotoŋkuk kɛ obi a ɛtɛ ɛk,

²⁰ nɛɓa yaaŋɛ Ɛpɛna eteŋka Waakoyot ɓaŋkawuka sini Keresee aɓa boŋku ret walasa nɛɓa riiɓe dari ɗiɗikakɛ gɛɛnɛk.

²¹ Nɛɓa gageeɗ ɔɗɔwikeen a tapaaɗikeen a ɓaŋkawuka baŋɛ sinɔ ar suumiikent baŋɛ rakaayk, moko eme sineene dakɛɗa kɛygun ɓɔrɛ eme sinaanɛ koy mɛlkik. Gageeɗɓa tiriya sigɔ eemɛyɛɛŋɔŋk sigɔ atu tiriyaakɛ baŋɛ rakaayk.

²² Nɛɓa argeeɗ ola baŋɛ a atu ɓaŋkawukaat nɛɛkɛ goyse ɗeek kɛnɔ ɓalɗi sɛɛna, gaɓɛɓa godeya Sambatɛyoŋk kɛnɔ dakɛ a ɔɗɔ olaatɛ baŋɛ raŋk.

²³ Sɛɛn ɛɛk sinɛ enyɛr ola baŋɛ olaatɛ baŋɛk enyakaat nɛɛkɛkik.