Filipos 2 - Na Ukud Apudyus

Na Kinangatun Jesu Cristu Ya Nampafafaana

¹ Susunud, na nitimpuyukantaun Jesu Cristu, sachin mangipapigsa ta somsomòtau. Ad na ayatnan chitau, sachin mangay-ayu ta somsomòtau. Ad kapu ta nitimpuyukantau ta Ispiritun Apudyus, man-asiay-ayattau ya man-asiachakutau.

² Siyan kapu ta maawatanyu losan na anchanaya, chogchog-anyu kuman lagsak-u, wi na oyyoonyu, mantitimpuyug-ayu ya man-asiay-ayat-ayu, wi man-ossa kuman somsomòyu.

³ Ya uray sinuy oyyoonyu, foon pu kumà mipangatuwan na long-agyu winnu mampachayawanyu. Tan na oyyoonyu kuma, waschi osa ipafafanan long-agna ta ifilangnan furunnà nangatngatu nu siya.

⁴ Siya anaponyun fumaruwan na fufurunyu wi foon pu kà afus na fumaruwanyu.

Turachontaun Somsomò Jesu Cristu

⁵ Turachonyun somsomò Jesu Cristu à mansomsomòyu

⁶ wi à siya, uray nu isunà Apudyus, foon pù impapilitna wi mamangchon ta kina-Apudyusna,

⁷ tan inchulinnan kinangatuna, ad namfalin taku wi isun chitau ad ingwanan long-agnà isù sanilun Apudyus.

⁸ Ad impafafanan long-agna wi mamtog an Amana uray nu sachin inyatoyna fa nilansaana ta kros.

⁹ Ad sachin nangipangatuwan Apudyus an siyà angatuwan wi maid pu miyisuwan na kinagatuna.

¹⁰ Siyan chumatong na padcha wi losani iingkaw ad langit ya luta, uray na nanattoy ya chaan, ya uray na losani maila ya achi pun, maid pu achi mampalintumong ta sangwanan Jesus wi manaychayaw ta kinangatuna.

¹¹ Ad maid pu ko takù achi mangipudnu wi à Jesu Cristun Ap-apun na losan. Ad siyan michayawan Amatauy Apudyus.

Ipapatitaun Pammatitaun Apudyus

¹² Chiayuy susunud wi ay-ayatò, pintogyun losani intudtuchù an chiayu ta iningkawà an chiayu, siyan sinchumallu kuma ta sanay maichà, wi maid umisianyu. Ipapatiyu wi mangwa ta losani pion Apudyus ya lispituwonyù siya ya umoogyat-ayu kuma wi sumurngasing ta piona à masaraknifanyu.

¹³ Awad à Apudyus an chiayu wi mangatod ta karobfonganyu ya somsomòyu wi mangwa ta piona.

¹⁴ Susunud, uray sinuy oyyoonyu, achiayu ngumuytungut ya achiayu ko makais-isì

¹⁵ ta maid arwinganyu ya maid kuma ipafasur na taku an chiayu wi anà Apudyus, uray miyas-aslang-ayu ta takud asnay luta wi amod na kinarawingcha. Tan isuayù fituwon wi sumilaw wi mallawag ta takud asnay luta.

¹⁶ Tan na ukud Apudyus wi iwarawagtau, sachin mafiyakanchà ing-ingkana. Siyan nu amaschin oyyoonyu, maragsakà ta mangulinan Jesu Cristu, tan chiayun mail-an na kinasilfin na losani iningwà.

¹⁷ Uray nu mapatoyà ta sana, maragsakà wi mangatod ta fiyag-u an Apudyus tan itapì ta pammatiyu wi isù ichatunyun siya. Tan maragsakanà mipakapun chiayu.

¹⁸ Ya uray chiayu ko, makaragsak-ayu kuma an saon, uray nu matoyà.

Na Mifaunancha Timoteo Ya Epafrodito

¹⁹ Na somsomòu, nu iparufus Apu Jesus, foon pù mafayag ad ifaun-ù Timoteo ad asnat à mangilan chiayu, ta chamakò kuma nu in-inon na pammatiyu à masorkakà,

²⁰ tan à Timoteo, siya kan mamiyang an chiayu wi isun na annay mamiyangà an chiayu.

²¹ Tan losan chachi uchum, siya kay fumaruwanchan somsom-oncha, wi inwalinchan mipangkop an Jesu Cristu.

²² Ngim à Timoteo, akammuyun kinapatognan saon tan isuanì man-ama wi man-asifachang ta mangiwarawakanni ta mamfaruy chamag.

²³ Siyan na somsomòu, nu maakammuwan na màwan saon, man-ifaun-ù siya.

²⁴ Ad na namnamaò ako an Apu Jesus, miparufusà ta achi pu kuma mafayag ad uray à saon, umaliyà akod asnat.

²⁵ Ad annaya kò Epafrodito wi sunudtau wi impaaliyud asna wi mamachang an saon ta sinuy masapur-u. Isù tuttuway sunud-ù siya tan furun-u wi isu kò surchachun Apudyus. Ngim na somsomòu, mamfaru nin nu mamagkulinò à siya ta sana

²⁶ tan amod na ayunan chiayu losan, sinchumallu tan chingngoryu nun nasakitana.

²⁷ Amod tuwan sakitna tan tikangay matoy. Ngim inachakuwan Apudyus siya, siyan ummimfag. Ya inachakuwanà ako, tan nu matoy, maam-amod na somsomòu ya likat-u.

²⁸ Siyan amod na lagsak-u wi mamagkulinò à siya ta sana ta ilanyu ta asin lumagsak na somsomòyu. Tan nu lumagsak-ayu, lumangpaw na somsomòu ya lumagsakà ako.

²⁹ Maragsak-ayu wi mamachatong an siya, tan sunudtau mipakapun Apu Jesus. Ad masapur iyafainyun losani taku wi isun siya.

³⁰ Tan à siya, tikangayna iyatoy na nangwaana ta pion Jesu Cristu, tan achina pu imfilang na fiyagna ta fummadnganan saon, wi amaschi kuman imfabfachangyu ko nu iningkaw-ayu.