Zɛkaraya 9 - Krio Fɔs Oli Baybul

Aw PAPA GƆD Jɔj Dɛn Neshɔn We De Neba Dɛm

¹ PAPA GƆD tɔk bad bɔt Adrak ɛn di siti we na Damaskɔs. Na PAPA GƆD gɛt ɔl dɛn siti we de na Siria ɛn nɔto dɛn nɔmɔ, bɔt nain gɛt ɔl di Izrɛl fambul.

² Amath we de na Adrak in bɔda o, Taya ɛn Saydɔn we gɛt ɔl di sɛnsman dɛn, nain gɛt dɛn.

³ Di pipul dɛn na Taya dɔn mek shɔ se, dɛn bil trɔŋ trɔŋ wɔl rawnd di siti, dɛn payl silva lɛk dɔti ɛn gold lɛk dɛn pɔtɔpɔtɔ we kin dɔn blɔk gɔta.

⁴ Bɔt PAPA GƆD go mek dɛn lɔs ɔltin. Wata go kɛr dɛn jɛntri go ɛn faya go bɔn sɔm di tin dɛn.

⁵ We di pipul dɛn na Ashkɛlɔn go si wetin apin, dɛn go skyad; di pipul dɛn na Gaza go sɔfa dɔn di wan dɛn na Ɛkrɔn go jɛs giv ɔp. Di kiŋ na Gaza go day, dɛn go lɛf Ashkɛlɔn to insɛf

⁶ ɛn muf go tap na Ashdɔd wit ɔda pipul, dɔn PAPA GƆD go brok di fɛda dɔŋ pan di pipul na Filistia ɛn dɛn go lɛf fɔ de kak.

⁷ I se in nɔ go gi dɛn bif fɔ it igen ɛn di tin dɛn we dɛn nɔ fɔ it, ɔl go tap. Di balans we lɛf fɔ bi PAPA GƆD in yon pipul. Dɛn go tan lɛk di pipul na di Juda fambul to PAPA GƆD dɔn di pipul na Ɛkrɔn go tan lɛk di Jɛbyusayt dɛn.

⁸ I se, da tɛm de nain go tɔn di sikyɔriti fɔ in os, so nɔbɔdi go de pas de fri wan go ɛn kam. Nɔbɔdi nɔ go buli dɛn igen as nainsɛf go de wach dɛn naw.

Di Kiŋ We Go Kam Bambay

⁹ I se, di pipul na Zayɔn fɔ gladi bad. Di wan dɛn na Jerusɛlɛm fɔ ala big big wan bikɔs dɛn kiŋ de kam mit dɛn. Pan ɔl we i dɔn win batul dɛn, na ɔdinari dɔŋki i de rayd pan, di bebi wan lɛk se in nɔto natin.

¹⁰ I se, i go tek di ɔs ɛn karej we Izrɛl bin de yuz ɛn ivin di ɔs dɛn we di pipul na Jerusɛlɛm bin de tek go wa. Di bo we dɛn kin de yuz we dɛn go wa, ɔl go pwɛl dɔn pis go de ɔlsay na wɔl. I go rul frɔm wan siti to di ɔda wan ɛn frɔm Riva Yufretis te rich usay di wɔl dɔn.

PAPA GƆD Mek Di Pipul Bi Wetin Dɛn Bin Bi Bak

¹¹ I se, bikɔs ɔf di Kɔvinant we i bin dɔn mek wit dɛn we i yuz blɔd, i go fri ɔl dɛn prizina we de na ol we nɔ gɛt wata.

¹² I se, dɛn fɔ gɛt op ɛn go bak to di ples we dɛn go sef. I se, da de de, in wan mek dɛn no se i go gi dɔbul wan fɔ ɔl wetin dɛn dɔn lɔs.

¹³ I se in dɔn mek Juda lɛk in bo ɛn Izrɛl lɛk in aro. I se in go pɔlish di wan dɛn na Zayɔn ɛn yuz dɛn fɔ fɛt di wan dɛn na Gris, bikɔs dɛn go tan lɛk in sɔd.

¹⁴ Da tɛm de, PAPA GƆD go bɔsawt pan in pipul dɛn ɛn di aro dɛn we i go de sɛn go tan lɛk laytin; PAPA GƆD we na PAPA GƆD de blo in trɔmpɛt fɔ lɛ dɛn tinada we kin blo na di sawt bigin blo.

¹⁵ PAPA GƆD Ɔlmayti go kɔba dɛn ɛn dɛn go nyamanyama ɛn kil kil ɔl dɛn ɛnimi. Dɛn go drink dɛn blɔd lɛk wayn ɛn dɛn go bɛlful lɛk we bol fulɔp, ɛn dɛn go sok lɛ di kɔna dɛn na dɛn ɔlta.

¹⁶ Da de de, PAPA GƆD go sev dɛn bikɔs i go trit dɛn lɛk man we de mɛn ship. Lɛk aw dayamɔn pan krawn de shayn, na so dɛn go shayn na di land.

¹⁷ Di ples go fayn fɔ si, bɔbs! Yutman dɛn go plant bɔku tin we go mek layf bɛtɛ fɔ dɛn ɛn dɛn go mek wayn fɔ dɛn yɔŋgyal.