Zɛkaraya 8 - Krio Fɔs Oli Baybul

PAPA GƆD Prɔmis Se I Go Mek Jerusɛlɛm Bi Wetin I Bin Bi Bak

¹ PAPA GƆD Ɔlmayti tɔk to Zɛkaraya bak. I se,

² in se, i de jɛlɔs fɔ Jerusɛlɛm ɛn i de jɛlɔs bad wan.

³ PAPA GƆD se, fɔ tɛl dɛn se, in go go tap bak na Jerusɛlɛm ɛn ɔlman go no se na de PAPA GƆD Ɔlmayti de, nain oli mawnten, dɔn dɛn go no se na siti we fethful.

⁴ PAPA GƆD Ɔlmayti se, dɛn grani ɛn grampa dɛn ɔl go de sidɔm na Jerusɛlɛm in trit fɔ kip kɔmpin wit dɛn wɔkinstik.

⁵ I se, di trit dɛn go ful wit dɛn bɔbɔ ɛn titi we go de ple de.

⁶ I aks dɛn se, if bikɔs dɛn si dat lɛk se i nɔ pɔsibul, if i nɔ fɔ pɔsibul fɔ insɛf.

⁷ PAPA GƆD se, in go sev in pipul dɛn na di Ist ɛn di Wɛst;

⁸ ɛn i go mek dɛn kam tap insay Jerusɛlɛm; da tɛm de, in go lɛ dɛn no se dɛn nain pipul ɛn in na dɛn PAPA GƆD. Ɛn i go sho dɛn aw i fethful ɛn de du tin tret wan.

⁹ PAPA GƆD se, lɛ dɛn nɔ givɔp. Dɛn fɔ pik zil as dɛn dɔn de yɛri ɔl wetin in prɔfɛt dɛn bin dɔn de tɔk frɔm di tɛm we dɛn li fawndeshɔn fɔ bil PAPA GƆD Ɔlmayti in os bak.

¹⁰ I se, bifo da tɛm de, nɔbɔdi nɔ bin de pe fɔ in kɔmpin mɔtalman ɔ fɔ animal ɛn i nɔ bin izi fɔ man fɔ waka na trit ɛn in ɛnimi nɔ atak am, bikɔs in bin mek mɔtalman nɔ wan si in kɔmpin.

¹¹ PAPA GƆD se, naw i nɔ go trit di wan dɛn we lɛf lɛk aw i bin de du fɔs.

¹² Bikɔs pipul dɛn go de plant ɛn avɛst ɛn dɛn nɔ go gɛt nɔn yagba, kolat go de ɔlsay ɛn ren sɛf go de kam bɔku wan. I se in go mek di balans we lɛf pan di pipul dɛn gɛt ɔl dɛn tin de fɔ ɛnjɔy.

¹³ I se pipul bin de yus dɛn nem we dɛn de swɛ ɔda pipul, bɔt naw na dɛn sem pipul de go yus nem fɔ blɛs pipul dɛn bikɔs in go sev dɛn ɛn i go mek pipul de kɔl Juda ɛn Izrɛl dɛn nem we dɛn wan blɛs ɔda pipul. I se, mek dɛn nɔ fred, lɛ dɛn pik ɔp zil nɔmɔ.

¹⁴ PAPA GƆD Ɔlmayti se, lɛk aw i bin tɛl dɛn fɔstɛm-papa dɛn se in go pɔnish dɛn we i vɛks, di tɛm we dɛn bin ambɔg am ɛn i nɔ sɔri fɔ dɛn,

¹⁵ na so we i dɔn se i go blɛs Jerusɛlɛm ɛn Juda, i go du; so mek dɛn nɔ fred.

¹⁶ I se, na dɛn tin ya dɛn fɔ du: fɔ de tɔk tru to dɛnsɛf, fɔ gi rayt jɔjmɛnt ɛn fɔ de mek pis,

¹⁷ dɔn dɛn nɔ fɔ gɛt badat fɔ dɛn kɔmpin, nɔ fɔ de lay dɔn dɛn de swɛ, bikɔs in PAPA GƆD et dɛn kayn tin dɛn de.

¹⁸ PAPA GƆD Ɔlmayti tɔk to Zɛkaraya se,

¹⁹ dɛn fast we dɛn bin fast di mɔnt we mek fo, di mɔnt we mek fayv, di mɔnt we mek sɛvin, ɛn di mɔnt we mek tɛn, go briŋ gladi fɔ Juda ɛn dɛn go mek di ladida, so dɛn fɔ lɛk tin we na tru ɛn we de mek pis de.

²⁰ PAPA GƆD Ɔlmayti se, pipul dɛn go kɔmɔt na bɔku siti kam,

²¹ sɔm go kɔmɔt na wan ples go na di ɔda wan bikɔs dɛn go se dɛn de go fɛn PAPA GƆD in blɛsin; dɛn go se dɛn de go mek PAPA GƆD Ɔlmayti blɛs dɛnsɛf.

²² Bɔku pipul frɔm difrɛn neshɔn go go fɔ mek PAPA GƆD Ɔlmayti we de na Jerusɛlɛm blɛs dɛn ɛn dɛn go go fɛn di blɛsin.

²³ PAPA GƆD se, da tɛm de, tɛn man pan ɔl di trayb dɛn na wɔl, go grip wan Ju man in klos de se lɛ dɛn go wit am bikɔs dɛn dɔn yɛri se, PAPA GƆD de wit am.