Zɛkaraya 7 - Krio Fɔs Oli Baybul

PAPA GƆD Tɔk Bad Bɔt Dɛn Wan We De Fast Bɔt Dɛn Nɔ Min Am

¹ Di ia we mek fo we Dariɔs bi kiŋ, PAPA GƆD tɔk to Zɛkaraya, di nɔmba fo de insay Kislɛv we na di nɔmba nayn mɔnt.

² Da tɛm de, di pipul dɛn na Bɛthɛl bin sɛn Sharɛza ɛn Regɛmelɛk ɛn dɛn man dɛn fɔ go aks PAPA GƆD fɔ blɛs dɛn

³ ɛn fɔ aks ɔl di man dɛn we de mek sakrifays fɔ pipul sin na PAPA GƆD in os wit ɔl di prɔfɛt dɛn, if dɛn fɔ go insay di os go mek sɔri wan lɛkɛ aw dɛn bin dɔn de du.

⁴ Dɛn PAPA GƆD Ɔlmayti tɔk to Zɛkaraya. I se,

⁵ Zɛkaraya fɔ aks di pipul na di land ɛn di man dɛn we de mek sakrifays fɔ pipul sin se, in se, if we dɛn bin de fast di nɔmba fayv de na di nɔmba sɛvin mɔnt fɔ sɛvinti ia, if na fɔ in dɛn bin de fast.

⁶ I se fɔ aks dɛn if we dɛn bin de it ɛn drink, nɔto fɔ dɛnsɛf dɛn bin de du am.

⁷ I se aw Jerusɛlɛm bin tan we ɔltin bin ɔrayt fɔ am, we pipul bin tap ɔlsay ɛn biznɛs bin fayn, na wetin i bin dɔn mek di prɔfɛt dɛn tɔk.

Dɛn Nɔ Du Wetin PAPA GƆD Tɛl dɛn, Na Dat Mek Dɛn Go Ɛgzayl,

⁸ PAPA GƆD tɔk bak to Zɛkaraya. I se,

⁹ PAPA GƆD Ɔlmayti se dɛn fɔ mek fia ple de, trit dɛn kɔmpin fayn ɛn sɔri fɔ dɛn kɔmpin.

¹⁰ Dɛn nɔ fɔ buli dɛn uman we dɛn man dɔn day, dɛn pikin we nɔ gɛt papa, dɛn fɔrina ɛn di poman dɛn; nɔbɔdi nɔ fɔ mɛmba bad fɔ in kɔmpin.

¹¹ Bɔt usay! Dɛn nɔ lisin to wetin i se. Bifo dat, dɛn mek traŋayes ɛn kɔk dɛn yes so dat dɛn nɔ go yɛri.

¹² Dɛn traŋa dɛn at fɔ mek dɛn nɔ yɛri PAPA GƆD Ɔlmayti in wɔd we i bin dɔn mek in Spirit we bin de insay dɛn fɔstɛm prɔfɛt tɔk. Dat mek PAPA GƆD Ɔlmayti vɛks bad fɔ wetin dɛn de du.

¹³ I se we in tɔk, di pipul dɛn nɔ de yɛri, so, we dɛnsɛf pre to am, i nɔ go yɛri.

¹⁴ I se in go mek dɛn skata lɛk we tinada de blo go usay dɛn nɔ no bɔt dɛn. Na so di land we dɛn lɛf tek ɛmti. Da fayn fayn ples de ɛmti so.