Zɛkaraya 6 - Krio Fɔs Oli Baybul

Di Prɔfɛt Vishɔn Fo Ɔs Ɛn Karej

¹ We i es in ed ɔp bak i si fo ɔs ɛn karej de kɔmɔt midul tu mawnten we dɛn mek wit bras.

² Di fɔs karej bin gɛt rɛd ɔs dɛn, di sɛkɛn karej bin gɛt blak ɔs dɛn,

³ di tɔd karej bin gɛt wayt ɔs dɛn, dɔn di nɔmba fo karej in bin gɛt sɔntin lɛk layt gre ɔs dɛn.

⁴ We a si dɛn, a aks di enjɛl se wetin dɛn wande.

⁵ Di enjɛl se, dɛn na lɛk di fo kayn briz we de na wɔl. Dɛn bin de wit PAPA GƆD ɛn naw dɛn de go du wetin PAPA GƆD se dɛn fɔ du.

⁶ Di sɛkɛn wan we gɛt di blak ɔs dɛn, go na di nɔth to usay Babilɔn de, di wayt wan dɛn go na di wɛst ɛn di wan dɛn we tan lɛk layt gre go na di sawt.

⁷ We dɛn kɔmɔt na do, yu kin si se dɛn de majiji fɔ go du dɛn wok. So di enjɛl tɛl dɛn wantɛm fɔ go du dɛn patrol na di wɔl. Dɛnsɛf go wantɛm.

⁸ Di enjɛl tɛl am se, di wan dɛn we go nɔth na Babilɔn dɔn mek PAPA GƆD nɔ vɛks lɛk aw i bin vɛks igen

PAPA GƆD Tɛl Am Fɔ Mek Jɔshwa Bigman.

⁹ Na di wɔd dis we PAPA GƆD gi am.

¹⁰ PAPA GƆD se, pan di wan dɛn we kɔmɔt ɛgzayl na Babilɔn, i fɔ tek Ɛlday, Tobija ɛn Jɛdaya go na Josaya we na Zaɛfinaya in bɔypikin in os, di sem de.

¹¹ I se, i fɔ kɔlɛkt silva ɛn gold frɔm dɛn we i fɔ tek mek krawn; dɔn i fɔ put di krawn na Jɔshwa we na Jɛozadak in bɔypikin in ed as di bigman fɔ dɛn man we de mek sakrifays fɔ pipul sin.

¹² I se fɔ tɛl am se in PAPA GƆD se, sɔmbɔdi gɛt fɔ kam, we dɛn go kɔl Branch. I se nain go bi di wan we go kam bil PAPA GƆD in os.

¹³ I se i go bil PAPA GƆD in os ɛn ɔl wetin i de du go tan lɛk wetin kiŋ de du, dɔn nain go bi kiŋ fɔ rul in pipul. I go gɛt fɔ gɛt man we de mek sakrifays fɔ pipul sin nia am ɛn dɛn ɔltu go wok wit wanwɔd.

¹⁴ Na dis krawn dɛn go tek fɔ mɛmba Ɛlday, Tobija ɛn Jɛdaya.

¹⁵ Pipul we de fawe, dɛn ɔl go kam ɛp fɔ bil PAPA GƆD in os dɔn na da tɛm de dɛn go biliv se na PAPA GƆD bin sɛn am. Dɛn, na da tɛm de, dɛn go wan du wetin PAPA GƆD se.