Zɛkaraya 5 - Krio Fɔs Oli Baybul

Di Prɔfɛt Si Vishɔn We Wan Rol Pepa De Flay.

¹ We i es in yay ɔp, i si wan rol pepa de flay.

² Di enjɛl aks am wetin i si, ɛn i ansa se in si wan rol pepa de flay. Di pepa lɔŋ lɛkɛ tati fut ɛn wayd fiftin fut.

³ I se na di swɛ dat we de pas ɔlɔbɔt na wɔl; ɛnibɔdi we tif go lɔs in ples na di land dɔn di wan we de swɛ dɔn i de lay insɛf go lɔs in ples na wɔl.

⁴ PAPA GƆD se aw i de flay so, na so in de sɛn am fɔ go insay di tifman in os ɛn insay pɔsin we de lay ɛn swɛ in os; i go de insay di os dɔn nain go pwɛl di os kpatakpata wɛda na stonos ɔ na simɛnt os.

Di Prɔfɛt Vishɔn Wan Uman Insay Baskit

⁵ Di enjɛl we bin de tɔk to am kam bifo ɛn tɛl am se, lɛ i es in ed ɔp ɛn si wetin de bi.

⁶ I aks am wetin da wande. Di enjɛl tɛl am se na wan kayn lod we de sho ɔmɔs sin di pipul dɛn na di land dɔn sin.

⁷ Dɛn di kɔba kɔmɔt pan di lod ɛn i si wan uman sidɔm insay di baskit we gɛt di lod.

⁸ Di enjɛl se na wikɛdnɛs da wande. Dɔn i push di uman bak insay di baskit ɛn put di ebi kɔba bak pan am.

⁹ I es in ed ɔp fɔ luk gud, nain i si tu uman de flay kam bifo am. Dɛn fɛda lɛk da bɔd we dɛn kin kɔl kaw enjɛl ɛn dɛn tot lod kɔmɔt na wɔl fɔ flay go.

¹⁰ So a aks di enjɛl usay dɛn de go wit di lod.

¹¹ I se dɛn de kɛr am go na Babilɔn usay dɛn go bil os fɔ am ɛn we dɛn go dɔn bil di os dɔn, dɛn go put am de fɔ pipul dɛn fɔ go wɔship.