Zɛkaraya 3 - Krio Fɔs Oli Baybul

Di Prɔfɛt Vishɔn Di Bigman Pan Dɛn Man We De Mek Sakrifays Fɔ Pipul Sin.

¹ Dɛn i si Jɔshwa we na di bigman fɔ dɛn man we de mek sakrifays fɔ pipul sin tinap bifo di enjɛl, dɔn Setan in tinap nia am fɔ le in kɔmplen.

² PAPA GƆD tɔk traŋa wan fɔ mek Setan kɔmɔt bifo am. I tɛl am se, nain dɔn pik Jerusɛlɛm, so lɛ i kɔmɔt bifo am. I se if Jerusɛlɛm nɔto lɛk rɛd rɛd ayɛn we dɛn pul na faya.

³ Da tɛm de, Jɔshwa bin wɛr dɔti klos tinap bifo di enjɛl.

⁴ Di enjɛl tɛl ɔl udat bin tinap bifo am fɔ pul di dɔti klos pan am. I tɛl am se, i dɔn pul ɔl in sin dɛn pan am ɛn naw i go gi am dia dia klos.

⁵ Zɛkaraya in tɛl dɛn naw se, dɛn fɔ wɛr klin tɔban nain ed ɛn wɛr di klin klos dɛn pan am lɛk we di enjɛl de de so.

⁶ Dɛn di enjɛl wɔn Jɔshwa se,

⁷ PAPA GƆD se if i fala am ɛn du wetin i want, i go de inchaj ɔf in os ɛn ɔl in biznɛs, dɔn i go mek shɔ se di enjɛl dɛn de fɔ ɛp am.

⁸ I tɛl Jɔshwa we na di bigman fɔ dɛn man we de mek sakrifays fɔ pipul sin ɛn ɔl in padi dɛn we de wit am se, dɛn na gud man dɛn bɔt i go sɛn di pɔsin we go tɔk fɔ am we dɛn go kɔl di Branch.

⁹ I se na pan di ston we i go put bifo Jɔshwa nain i go gi sɛvin fes we i go tek luk am; PAPA GƆD se in go mek mak pan am dɔn i go pul ɔl di sin kɔmɔt na di land insay wande.

¹⁰ I se wɛn da tɛm de rich, ɔlman go kɔl in kɔmpin fɔ sidɔm wit am ɛn ɛnjɔy.