Zɛkaraya 14 - Krio Fɔs Oli Baybul

Jerusɛlɛm Ɛn Di Ɔda Neshɔn Dɛn

¹ Fɔ tru tru, di de we PAPA GƆD go kam, de kam wɛn una go sheb ɔl dɛn tin we dɛn bin dɔn tek na una an.

² PAPA GƆD go lɛ ɔl di neshɔn dɛn we nɔ wan si Jerusɛlɛm go fɔ fɛt am. Dɛn go kapchɔ di siti, lut na dɛn os dɛn, ɛn rep dɛn uman dɛn we go mek af ɔf di wan dɛn we tap na di siti go go ɛgzayl dɔn di balans nɔ go kɔmɔt na di siti.

³ Dɛn PAPA GƆD go fɛt dɛn neshɔn dɛn de lɛkɛ aw i bin de fɛt fɔstɛm.

⁴ Da de de, i go tinap pantap Mawnt Ɔliv we de bifo Jerusɛlɛm bay di Ist say; dɔn di mawnten go plit tu, frɔm ist to wɛst. Na wan vali go de midul dɛn we go mek wan pat de nɔth ɛn di ɔda pat de sawt.

⁵ Na dis vali ya we sheb di mawnten, nain dɛn go tek fɔ rɔnawe lɛkɛ aw di tɛm we Uzaya na bin kiŋ, dɛn fɔstɛm pipul bin rɔnawe we dɛn bin gɛt athkwek. PAPA GƆD gɛt fɔ kam wit ɔl in enjɛl dɛn.

⁶ Da tɛm de, nɔbɔdi nɔ go de tɔk bɔt ren ɔ dray sizin,

⁷ ɛn di ples go bi de tɛm ɔl di tɛm; nɔbɔdi nɔ go de tɔk bɔt de tɛm ɔ nɛt bikɔs di ples go brayt so ivintɛm.

⁸ Da de de, na wata we de gi layf nɔmɔ go de flo na Jerusɛlɛm, af go de go na di ist si, af de go na di wɛst si. Na so i go de bi ren sizin ɛn dray sizin.

⁹ Na PAPA GƆD go de rul di wanol wɔl; ɔlman go de wɔship am ɛn kɔl am di sem nem.

¹⁰ Di wanol ples go tɔn to flat grɔn frɔm Giba te rich Rimɔn we de sawt insay Jerusɛlɛm. Bɔt Jerusɛlɛm in go lɛf ay wan usay i de frɔm di Bɛnjamin Get te rich di ples usay di fɔs get bin de, to di Kɔna Get ɛn frɔm di Ananɛl Tawa te rich di say we dɛn kin de mek wayn fɔ di kiŋ.

¹¹ Pipul dɛn go tap de ɛn nɔbɔdi nɔ go swɛ dɛn. Jerusɛlɛm go bi ples we sef fɔ de.

¹² PAPA GƆD go mek bad sik mit di pipul dɛn we bin go fɛt Jerusɛlɛm. Dɛn go de layf wan bɔt dɛn bɔdi go rɔtin, dɛn yay sɛf go rɔtin ɛn ivin dɛn siti go rɔtin na dɛn mɔt.

¹³ Da de de, ɔlman go gɛt in yon trɔbul we PAPA GƆD de sɛn so dɛn go bigin fɛt dɛnsɛf

¹⁴ ɛn ivin Juda go grap fɔ fɛt Jerusɛlɛm. Dɛn go kapu di ɔda neshɔn dɛn jɛntri lɛkɛ dɛn gold, silva ɛn dɛn bɔku bɔku klos.

¹⁵ Di sem kayn bad sik go fɔdɔm pan dɛn ɔs dɛn, dɛn myul, dɛn kamɛl, dɛn dɔŋki ɛn ɛni ɔda animal we de na di kamp.

¹⁶ Dɛn di wan dɛn we nɔ day na dɛn neshɔn we bin atak Jerusɛlɛm, go go wɔship PAPA GƆD Ɔlmayti lɛkɛ aw dɛn kin du we dɛn de sɛlibret di tɛm we dɛn kin tap na bafa fɔ mɛmba aw dɛn bin de wirɔn na di ɛmti land we pɔsin nɔ go ebul tap.

¹⁷ Bɔt if ɛniwan pan dɛn neshɔn de nɔ go Jerusɛlɛm fɔ wɔship PAPA GƆD Ɔlmayti we na Kiŋ, ren nɔ go kam na di say we dɛn de.

¹⁸ If di Ijipshian dɛn nɔ jɔyn di ɔda wan dɛn fɔ go wɔship PAPA GƆD, i go mek dɛnsɛf gɛt bad sik lɛkɛ dɛn ɔda neshɔn we nɔ sɛlibret di tɛm we di Izrɛlayt kin tap na bafa fɔ mɛmba aw dɛn bin de wirɔn na di ɛmti land we pɔsin nɔ go ebul tap.

¹⁹ Na so PAPA GƆD go pɔnish di Ijipshian dɛn ɛn dɛn ɔda neshɔn we nɔ sɛlibret di tɛm we di Izrɛlayt dɛn kin tap na bafa fɔ mɛmba aw dɛn bin de wirɔn na di ɛmti land we pɔsin nɔ go ebul tap.

²⁰ Da de de, dɛn go rayt OLI FƆ PAPA GƆD pan di bɛl we ɛŋ pan di ɔs dɛn. Di pɔt dɛn we de na PAPA GƆD in os, go bi lɛkɛ bol frɔnt di ɔlta.

²¹ Ɔl di pɔt dɛn we de na Jerusɛlɛm ɛn Juda go de fɔ PAPA GƆD Ɔlmayti so dat ɔl udat de kam mek sakrifays, go yuz am ɛn bwɛl wetin dɛn wan sakrifays de. Da de de, nɔbɔdi nɔ go de na PAPA GƆD Ɔlmayti in os fɔ de sɛl.