Zɛkaraya 13 - Krio Fɔs Oli Baybul

¹ Da de de, wan fawnten go de we di pipul na Devid in os ɛn di pipul dɛn we tap na Jerusɛlɛm go go so dat dɛn go mek dɛnsɛf klin na PAPA GƆD yay ɛn dɛn sin go kɔmɔt.

² PAPA GƆD Ɔlmayti se na da de de i go pul ɔl dɛn ɔda gɔd we dɛn mek fɔ wɔship na di land ɛn nɔbɔdi nɔ go de mɛmba dɛn, dɔn ivin dɛn prɔfɛt dɛn ɛn di spirit we de mek dɛn wan fɔ wɔship di ɔda gɔd dɛn nɔ go de igen

³ If ɛniwan stil de we de mek se in na prɔfɛt, in mama ɛn papa we bɔn am go tɛl am se i nɔ wan lɔŋ layf as na lay i de lay se i de tɔk fɔ PAPA GƆD; dɔn we i lay, in mama ɛn papa go chuk am fɔ di lay we i de lay.

⁴ Da de de, ɛni prɔfɛt we si vishɔn we fɔ mek i tɔk PAPA GƆD wɔd, go shem fɔ tɔk; i nɔ go wɛr di klos we dɛn kin wɛr fɔ lay pan pipul.

⁵ Bifo dat i go se in nɔto prɔfɛt, i go se in na fama ɛn dat na fam i de mek frɔm we i smɔl.

⁶ Dɔn if pɔsin aks am uskayn wund de nain bak, i go se na we i go nain padi dɛn os i wund.

Di Ɔda Fɔ Kil Ɔl PAPA GƆD In Lida Dɛn

⁷ PAPA GƆD Ɔlmayti se, di sɔd dɛn fɔ rɛdi fɔ fɛt in lida dɛn we fɔ de wok wit am. I se we dɛn ambɔg di lida dɛn, di pipul dɛn go rɔnawe go ɔlɔbɔt, dɔn na di lili wan dɛn i go ebul dil wit.

⁸ PAPA GƆD se insay di wanol land, ɛni tu pam tri pɔsin go day, dɔn i go mek di wan nɔ day pan di tri pipul.

⁹ Da wande we lɛf, nain i go pas sɔntin we go mek i klin lɛk silva. I go tɛst am lɛk aw dɛn de tɛst gold na faya. Dɛn go kɔl PAPA GƆD in nem we dɛn de pre ɛn in go ansa dɛn. In go tɔk se dɛn nain pɔsin, dɔn dɛn go se PAPA GƆD na dɛn PAPA GƆD.