Zɛkaraya 12 - Krio Fɔs Oli Baybul

PAPA GƆD Gɛt Fɔ Pul Jerusɛlɛm Pan Trɔbul Bambay

¹ Dis na di wɔd we PAPA GƆD tɔk bɔt Izrɛl: PAPA GƆD we mek ɛvin ɛn ath ɛn gi layf to mɔtalman se,

² in dɔn rɛdi fɔ mek Jerusɛlɛm lɛkɛ rɔm we ɔl di neshɔn rawnd am go drink ɛn biev lɛk udat drɔnk. Dɛn go atak Juda dɔn dɛn go atak Jerusɛlɛm insɛf.

³ Da de de, Jerusɛlɛm go tan lɛk ebi ston ɛn ɔl udat tray fɔ es am go ambɔg insɛf. Da tɛm de, ɔl di neshɔn dɛn go mek gɛŋ fɔ kam mit am.

⁴ PAPA GƆD se na da tɛm de i go mek ɔl di ɔs we dɛn tek fɔ go fɛt fred ɛn di wan dɛn we de rayd dɛn go kres. Bɔt in go opin in yay fɔ de wach in pipul dɛn na Juda ɛn i go mek di ɔs dɛn blɛn.

⁵ Dat go mek di famili dɛn na di Juda fambul tɔk to dɛnsɛf se, na PAPA GƆD Ɔlmayti we na dɛn PAPA GƆD, gi di pipul dɛn na Jerusɛlɛm, trɛnk.

⁶ I se, da de de, i go mek di Juda fambul lɛk pɔt we de na faya insay bush, lɛk opin faya usay dray gras de; ɛn dɛn go nyakanyaka ɔl di neshɔn dɛn we lɛf, ɛn Jerusɛlɛm go lɛf usay i de, di sem Jerusɛlɛm.

⁷ PAPA GƆD go mek di wan dɛn we tap na Juda fɔs win so dat pipul go si aw Devid in os fayn ɛn di fayn we Jerusɛlɛm go fayn go pas wetin dɛn si na Juda.

⁸ Da de de, PAPA GƆD go fɛt fɔ di wan dɛn we tap na Jerusɛlɛm so dat di wan we nɔ gɛt trɛnk sɛf go tan lɛk Devid, dɔn Devid in os go tan lɛk PAPA GƆD to dɛn, lɛkɛ se in na PAPA GƆD in enjɛl.

⁹ Na da sem de de, nain PAPA GƆD go dɔnawe wit ɔl udat nɔ wan si Jerusɛlɛm.

¹⁰ I se in go gi Devid in os ɛn ɔl udat de na Jerusɛlɛm, sɔri-at fɔ de pre fɔ pipul so dat wɛn dɛn luk di wan we dɛn chuk, dɛn go sɔri fɔ am lɛk aw mama de sɔri fɔ in waŋren pikin, ɛn kray bita kray pan am lɛk aw mama de kray pan in fɔs pikin.

¹¹ Da de de, di kray we go de na Jerusɛlɛm go so bɔku lɛk we dɛn kin de kray fɔ Adad Rimɔn na di flat grɔn na Mɛgido.

¹² Ɔlman na di land go sɔri ɛn dɛn go de bay grup; ɔl udat de na Devid in famili go de bay insɛf bɔt di wɛf dɛn go de to dɛnsɛf; ɔl udat de na Nethan in famili go de bay insɛf bɔt dɛnsɛf yon wɛf dɛn go de to dɛnsɛf;

¹³ ɔl udat de na Livay in famili go de bay insɛf bɔt dɛn wɛf dɛn go de to dɛnsɛf, ɔl udat de na Shimɛay in famili go de bay insɛf bɔt dɛn wɛf dɛn go de to dɛnsɛf;

¹⁴ ɔl di famili we lɛf go de bay dɛnsɛf bɔt di wɛf dɛn ɔl go de to dɛnsɛf.