Zɛkaraya 11 - Krio Fɔs Oli Baybul

Aw Dɛn Wan Dɛn We Bin De Tɔmɛnt Di Izrɛlayt Dɛn Fɔdɔm

¹ Libanɔn fɔ opin in do dɛn mek faya go bɔn ɔl dɛn sida tik.

² Di babu kɔtlas tik dɛn fɔ kray, bikɔs kɔtin tri dɔn fɔdɔm, ɔl dɛn fayn fayn tik de dɔn pwɛl. Di ok tik dɛn na Beshan fɔ kray bikɔs dɛn dɔn kɔt ɔl di tik dɛn na di bush.

³ Lisin we dɛn kiŋ ɛn lida dɛn de kray, dɛn boŋo dɔn fɔdɔm! Lisin aw dɛn layɔn de grɔmbul di bush we dɛn tap na Jɔdan, ɔl dɔn pwɛl.

Tu Lida

⁴ PAPA GƆD we na mi PAPA GƆD se mi fɔ tan lɛk we dɛn wan kil man we de mɛn ship in ship dɛn.

⁵ Di wan dɛn we de bay dɛn fɔ kil dɛn nɔ gɛt pɔnishmɛnt fɔ dat; dɔn di wan dɛn we de sɛl dɛn de blɛs PAPA GƆD fɔ we dɛn dɔn mek bɔku mɔni bikɔs di wan dɛn we de mɛn dɛn nɔ de sɔri fɔ dɛnsɛf.

⁶ PAPA GƆD se, in nɔ go sɔri fɔ di pipul dɛn we tap na di land igen I go mek dɛn bigman dɛn trit dɛn bad ɛn dɛn kiŋ dɛn nɔ go du natin bɛtɛ. Dɛn go nyamanyama di wɔl ɛn i nɔ go pul dɛn kɔmɔt de.

⁷ Na so Zɛkaraya tek bi wachman fɔ ship dɛn we dɛn dɔn rɛdi fɔ go kil. So i tek tu wɔkinstik we i gi di wan nem Gres, dɔn di ɔda wan i kɔl Wanwɔd. Na so i luk di ship dɛn.

⁸ Insay wan mɔnt, i pwɛl di ɔda tri lida dɛn wok. I nɔ bin peshɛnt wit dɛn ɛn dɛnsɛf nɔ bin lɛk am.

⁹ Dat mek i tɛl di pipul dɛn se i nɔ go bi dɛn lida igen I se wetin fɔ day go day, wetin fɔ pwɛl go pwɛl. Di wan dɛn we lɛf go it it dɛn kɔmpin.

¹⁰ I tek di wɔkinstik we i gi nem Gres ɛn brok am. Bay dat i brok di agrimɛnt we bin de bitwin in ɛn di pipul.

¹¹ So frɔm da de de, di agrimɛnt we bin de bitwin in ɛn di wan dɛn we kin bay ɛn sɛl ship, dɔn. Dɛn ɔl we bin de wach am no se na wetin PAPA GƆD se fɔ du, i du.

¹² Zɛkaraya tɛl dɛn se, if i ɔrayt wit dɛn, dɛn fɔ pe am; bɔt if dat nɔ rayt, dɛn kin ol am. So dɛn pe am tati silva kɔpɔ.

¹³ PAPA GƆD tɛl am se mek i put am usay dɛn kin kip mɔni, dat na di mɔni we dɛn pe am. So insɛf tek di tati silva kɔpɔ ɛn put am usay dɛn kin kip mɔni insay PAPA GƆD in os.

¹⁴ Dɔn i brok di sɛkɛn wɔkinstik we nem Wanwɔd. Dat sho se i dɔn pwɛl di brɔda biznɛs we bin de bitwin Juda ɛn Izrɛl.

¹⁵ PAPA GƆD tɛl am se, i fɔ mek lɛk in na dɛn man we de mɛn ship bɔt dɛn nɔ bisin bɔt di ship.

¹⁶ I se in de mek pɔsin kam we go bi lida we nɔ bisin bɔt wetin di ship de du ɛn i nɔ go bɔda fɔ go fɛn di wan we lɔs.

¹⁷ I se da kayn pɔsin de go alaki bikɔs i de lɛf di wan dɛn we i de lid to dɛnsɛf. I se ɔl in pawa go dɔn we i go wa. In an go day ɛn in rayt yay go blɛn.