Zɛkaraya 10 - Krio Fɔs Oli Baybul

PAPA GƆD Prɔmis Fɔ Pul Dɛn Pan Trɔbul

¹ Aks PAPA GƆD fɔ ren, ren sizin. Na PAPA GƆD de mek di klawd dak we de briŋ ren kam, so dat mɔtalman go gɛt ren ɛn di plant dɛnsɛf go gɛt.

² Dɛn man we de lukgrɔn de tɔk nɔnsɛns, na soso lay ful dɛn man dɛn we biliv se dɛn de tɔk to dɛn god; di wan dɛn we de drim de drim laylay drim, ɛn de gi laylay intapritteshɔn. Dat de mek di pipul jɛs de go lɛk we kayt kɔt. Dɛn de gɛt prɔblɛm bikɔs nɔbɔdi nɔ de fɔ lid dɛn.

³ PAPA GƆD se i dɔn vɛks wit ɔl di lida dɛn ɛn i go pɔnish di lida dɛn. PAPA GƆD Ɔlmayti in de luk afta in yon pipul dɛn, dat na di pipul dɛn na Juda fambul ɛn i go mek dɛn tan lɛk in ɔs dɛn we i de tek fɛt.

⁴ I se na pan dɛn i go pik lida dɛn we i go at fɔ du witawt dɛn bikɔs dɛn go trɔŋ lɛk di pɛg we de ol tɛnt, dɛn go fiba bo we dɛn de tek fɛt ɛn sɔm pan dɛn go bi kiŋ.

⁵ Dɛn ɔl go fiba sojaman dɛn we de go wa togɛda, we go gi dɛn ɛnimi dɔti fɔ it. Dɛn go so fɛt bikɔs PAPA GƆD de wit dɛn ɛn nɔbɔdi nɔ go ebul bit di man dɛn we de pan ɔs, sɛf.

⁶ I se i go mek di pipul na Juda in fambul layn gɛt trɛnk ɛn i go sev di wan dɛn we de na Izrɛl. I se i go briŋ dɛn kam bak bikɔs i de sɔri fɔ dɛn ɛn dɛn go tan lɛk i nɔ wande lɛf dɛn to dɛnsɛf. I se in na PAPA GƆD so i go ansa dɛn.

⁷ Di Izrɛlayt dɛn go tan lɛk sojaman dɛn ɔl at go gladi lɛk udat drink rɔm. Dɛn pikin dɛn go si wetin de apin ɛn dɛn at go swit da tɛm de, dɛn go prez PAPA GƆD.

⁸ I se, in go gi dɛn signal ɛn gɛda dɛn ɔl wan say bikɔs in bin dɔn bay dɛn bak so in go mek dɛn bɔku lɛk aw dɛn bin tan fɔs.

⁹ I se, pan ɔl we i dɔn mek dɛn de ɔlɔbɔt na di neshɔn dɛn, dɛn go stil de mɛmba am na di fawe kɔntri we dɛn de. Dɔn dɛn ɛn dɛn pikin dɛn nɔ go day dɛn go tɔn bak wit di pikin dɛn.

¹⁰ I se, in go briŋ ɔl dɛn wan na Ijipt ɛn Asiria kam bak na dɛn yon kɔntri. I go lɛ dɛn sɛtul na Giliad ɛn Libanɔn. Dɛn go so bɔku dat di ples nɔ go du fɔ dɛn ɔl.

¹¹ Dɛn go pas insay trɔbul lɛk aw dɛn bin de na Ijipt bɔt natin nɔ go du dɛn; di wata na Riva Nayl go dray, di kak we Asiria de kak go dɔn dɔn Ijipt go lɔs di pawa we i bin gɛt.

¹² PAPA GƆD se, in go mek dɛn gɛt pawa insay am dɔn di pipul go du wetin in want. Na dat in PAPA GƆD se.