Zɛkaraya 1 - Krio Fɔs Oli Baybul

PAPA GƆD Tɛl In Pipul Dɛn Fɔ Tɔn Bak To Am

¹ Insay di mɔnt we mek et di tɛm we Dariɔs bin dɔn bi kiŋ fɔ tu ia, PAPA GƆD tɔk to Zɛkaraya we na Bɛrɛkaya in bɔypikin. Bɛrɛkaya na Ido we na prɔfɛt in yon bɔypikin. PAPA GƆD tɛl Zakaraya se,

² in bin vɛks wit dɛn fɔstɛm-papa dɛn.

³ PAPA GƆD se fɔ tɛl di pipul dɛn se, in we na PAPA GƆD Ɔlmayti se dɛn fɔ tɔn bak to am dɔn in we na PAPA GƆD Ɔlmayti go tɔn bak to dɛn.

⁴ I se dɛn nɔ fɔ tan lɛk dɛn fɔstɛm-papa dɛn we dɛn lɔntɛm prɔfɛt bin de tɛl se lɛ dɛn lɛf di bad tin we dɛn bin de du, bɔt dɛn nɔ lisin ɔ braskitul PAPA GƆD sɛf.

⁵ I aks am se usay dɛn fɔstɛm-papa dɛn de naw, ɛn di prɔfɛt dɛn, if dɛn liv sote go.

⁶ I se bɔt di tɔk we i bin tɛl di prɔfɛt dɛn fɔ tɔk de te naw. Dat mek dɛn beg padin ɛn se aw PAPA GƆD plan fɔ dil wit wi fɔ wetin wi de du, na so i dɔn dil wit wi.

Di Prɔfɛt Vishɔn Ɔs Dɛn

⁷ Di de we mek twɛnti-fo na di mɔnt we mek ilɛvin, dat na di mɔnt we dɛn kɔl Shɛbat, insay di sɛkɛn ia we Dariɔs bi kiŋ, PAPA GƆD tɔk bak to Zɛkaraya we na Bɛrɛkaya in bɔypikin. Bɛrɛkaya na Ido we na prɔfɛt in yon bɔypikin.

⁸ I se, wande na nɛt, wantɛm wantɛm, in si wan man we bin de rayd rɛd ɔs. Di man bin de midul sɔm bush bush dɛn na di vali; dɔn rɛd, ɛn sɔntin lɛk grin ɛn wayt ɔs dɛn bin de biɛn am.

⁹ So i aks di man we i si se wetin dɛn wande. Di enjɛl ansa se in go sho am wetin dɛn bi.

¹⁰ So di man we bin tinap midul sɔm bush bush dɛn ansa am se, na tin dɛn we PAPA GƆD dɔn sɛn fɔ de paspas na di wɔl.

¹¹ Da tɛm de naw, dɛn ansa di enjɛl se dɛn dɔn waka ɔlɔbɔt na wɔl ɛn si se ɔltin ɔrayt.

¹² Dɛn di enjɛl aks PAPA GƆD if i nɔ go sɔri naw fɔ Jerusɛlɛm ɛn Juda. I se i dɔn vɛks pan dɛn fɔ sɛvinti ia naw.

¹³ PAPA GƆD tɔk fayn to di enjɛl we bin de tɔk to Zɛkaraya fɔ kol in at.

¹⁴ So di enjɛl we bin de tɔk to am tɛl am se, lɛ i tɔk lawd wan se PAPA GƆD we na PAPA GƆD Ɔlmayti se in de jɛlɔs fɔ Jerusɛlɛm ɛn Zayɔn bad bad wan.

¹⁵ Ɛn i vɛks bad wit dɛn kɔntri we nɔ bisin; bikɔs we i bin vɛks smɔl pan dɛn, dɛn tek am mek paspot fɔ du mɔ bad.

¹⁶ Dat mek PAPA GƆD se, naw, in dɔn go bak to Jerusɛlɛm wit in sɔri-at; dɛn go bil in os insay de ɛn i go mek shɔ se Jerusɛlɛm bi wetin i bin bi bak.

¹⁷ I se i fɔ tɔk lawd wan bak se, PAPA GƆD se in go mek di siti dɛn gɛt bɛtɛ tin ɛn in PAPA GƆD go koks Zayɔn ɛn pik Jerusɛlɛm bak.

Di Prɔfɛt Vishɔn Ɔn Dɛn

¹⁸ We i es in ed ɔp, nain i si fo ɔn.

¹⁹ I aks di enjɛl we bin de tɔk to am bak se, wetin dɛn wande. I ansa am se na di pawa dɛn na di wɔl we dɔn skata Juda, Izrɛl ɛn Jerusɛlɛm.

²⁰ Dɛn PAPA GƆD sho am fo blaksmith.

²¹ I aks am wetin dɛn de kam du. I ansa am se sins na di ɔn dɛn skata Juda we mek nɔbɔdi nɔ de de we kɔmɔt bɛtɛ, in go yuz di blaksmith dɛn fɔ put dɛn na dɛn ples. Dɛn go nyamanyama ɔl dɛn neshɔn we mek Jerusɛlɛm skata.