Zɛfinaya 3 - Krio Fɔs Oli Baybul

Jerusɛlɛm In Sin Ɛn Aw PAPA GƆD Sev Dɛn.

¹ Trɔbul go mit di pɔsin we de mek lɛk rebɛl ɛn nɔ klin na PAPA GƆD in yay, di siti we de ɔprɛs pipul.

² I nɔ de yɛri nɔbɔdi, i nɔ de tek kɔrɛkshɔn. I nɔ abop pan PAPA GƆD, i nɔ de go nia PAPA GƆD.

³ Dɛn bigman dɛn ɛn dɛn jɔj dɛn ɔl de biev lɛk aŋri layɔn ɔ wulf, dɛn de mekes it ɛnitin we dɛn gɛt ɛn nɔ de wɔri fɔ kip fɔ di nɛks de.

⁴ In prɔfɛt dɛn fulish, na man dɛn we nɔ de waka tret wit PAPA GƆD; di man dɛn we de mek sakrifays fɔ pipul sin de dɔti wetin klin na PAPA GƆD yay, ɛn nɔ de rɛspɛkt di lɔ.

⁵ PAPA GƆD in de du tin tret wan ɔltɛm, i nɔ de du natin rɔŋ; ɛvride i nɔ de taya fɔ sho se i de du tin fia wan. Bɔt usay! Di pipul dɛn nɔ de chenj. Dɛn nɔ gɛt shem. Dɛn stil de du bad.

⁶ PAPA GƆD se pan ɔl we i dɔn dɔnawe wit dɛn neshɔn dɛn, ɛn nyamanyama dɛn siti, dɛn traŋa os ɛn wɔl dɛn. I dɔn mek dɛn trit dɛn fiba ples we nɔ fɔ pas, i dɔn mek di siti dɛn nɔ fit fɔ natin ɛn nɔ ivin lɛf wan pɔsin insay de.

⁷ I bin min se di pipul dɛn go fred am ɛn tek kɔrɛkshɔn ɛn nɔ go ɛva fɔgɛt wetin dɛn dɔn pas bɔt i tan lɛk na da tɛm de dɛn de bad mɔ ɛn mɔ.

⁸ PAPA GƆD se lɛ dɛn jɛs wet fɔ di tɛm we in go rɛdi fɔ tɔk bɔt ɔl wetin dɛn de du. I se in dɔn mekɔp in maynd fɔ briŋ ɔl di neshɔn dɛn togɛda dɔn i go sho dɛn aw i vɛks. Ɔl in jɛlɔs vɛksteshɔn nain i go put pan dɛn ɛn dɔnawe wit ɔlman na wɔl.

⁹ Dat tɛm de dɛn ɔl go de tɔk wan laŋwej, dat na fɔ de pre to PAPA GƆD nɔmɔ wit ɔl dɛn at ɛn du wetin i want.

¹⁰ Ɔl di pipul we dɔn skata te rich Ithiopia go kam to am ɛn mek sakrifays to am.

¹¹ I se, da tɛm de dɛn nɔ go gɛt fɔ shem fɔ we dɛn bin mek lɛk rebɛl pan am, bikɔs in go pul ɔl di wan dɛn we bin de kak kɔmɔt midul dɛn. Dɔn di ɔda wan dɛn nɔ go gɛt chans fɔ de kak, bikɔs dɛn go de nain oli mawnten.

¹² I se di pipul dɛn we go de da tɛm de go bi pipul we nɔ go de kak. Dɛn go de go to in di, PAPA GƆD fɔ ɛp dɛn.

¹³ Di wan dɛn we go lɛf na Izrɛl go bi wan dɛn we nɔ go de ambɔg; dɛn nɔ go de lay, ɛn dɛn nɔ go miks pan rikishi. Dɛn nɔ go gɛt wan yagba ɛn so dɛn nɔ go fred nɔbɔdi.

Siŋ Fɔ We Dɛn Gladi

¹⁴ Lɛ di uman dɛn na Zayɔn siŋ lawd wan! Lɛ ɔlman na Izrɛl ala! Lɛ ɔlman na Jerusɛlɛm sho aw dɛn gladi wit ɔl dɛn at una di uman dɛn na Jerusɛlɛm.

¹⁵ PAPA GƆD dɔn pul di nambara we fɔ mit una I dɔn dil wit una ɛnimi dɛn PAPA GƆD we na Kiŋ fɔ Izrɛl de wit una; una nɔ gɛt natin fɔ fred igen

¹⁶ Da de de, dɛn go tɛl di pipul na Jerusɛlɛm se, “Una we de na Zayɔn siti, una nɔ fɔ fred! Una nɔ mek natin pwɛl una at.

¹⁷ PAPA GƆD de wit una; na sojaman so i mɔs mek una win. Dat go mek in at swit, dɔn, bikɔs i lɛk una, i go mek layf tan lɛk wetin i bin bi fɔs. Na una go mek i siŋ bikɔs in at gladi,

¹⁸ i go tan lɛk aw pɔsin kin gladi we i de sɛlibret.” I se in go pul ɔl di nambara na una ed so disgres nɔ go mit una.

¹⁹ Wande wande, i go dil wit ɔl dɛn wan we de ambɔg una. I go ɛp dɛn wan we nɔ ebul waka ɛn briŋ ɔl udat bin go ɛgzayl kam bak. Dɔn i go mek dɛn ɛnimi dɛn kɔle ɛn mek ɔlman no dɛn ɛn prez dɛn na wɔl.

²⁰ Wande wande go briŋ ɔlman kam bak na os, di tɛm we a go gɛda una ɔl wan say I go mek dɛn femɔs na di wanol wɔl di wanol wɔl go no una ɛn i go mek dɛn bi wetin dɛn bin bi fɔs unasɛf go si. Na so PAPA GƆD se.