Zɛfinaya 2 - Krio Fɔs Oli Baybul

Fɔ Beg Mek PAPA GƆD Chenj Dɛn

¹ I se dɛn nɔ gɛt shem, dɛn fɔ kapu sɛns ɛn kam ripɛnt

² bifo i drɛb dɛn, lɛk chaf chaf we briz de blo bifo PAPA GƆD in vɛksteshɔn kam pan una di de we PAPA GƆD go vɛks.

³ Ɔl udat de du wetin PAPA GƆD want fɔ kɔntinyu fɔ du so, dɛn fɔ mek shɔ se dɛn de waka tret wan wit PAPA GƆD ɛn put dɛnsɛf dɔŋ fɔ du wetin i want, sɔntɛm we i de jɔj i go sɔri fɔ dɛn.

⁴ Ɔl di pipul dɛn go kɔmɔt na Gaza bɔt na rɔnawe dɛn go rɔnawe kɔmɔt na Ashkɛlɔn; bɔt dɛn wan we de na Ashdɔd, dɛn go drɛb dɛn kɔmɔt de santɛm, dɔn ɔlman go kɔmɔt na Ɛkrɔn ɛn de sɛf go pwɛl kpatakpata.

⁵ Dɛn wan we tap nia watasay, alaki - dat na dɛn Filistin dɛn. PAPA GƆD dɔn tɔk se i go nyamanyama una ɛn nɔbɔdi nɔ go lɛf.

⁶ I se, na di dray ples we de nia di watasay nɔmɔ una go gɛt fɔ mek una animal dɛn de ple ɛn drink wata bikɔs na de di man dɛn we de mɛn dɛn go de.

⁷ Na nia di watasay de di wan dɛn we nɔ day na Juda in fambul layn go tap, ɛn na de dɛn go go fɔ mɛn dɛn ship ɛn got dɛn. Dɔn na di os dɛn na Ashkɛlɔn, dɛn go de slip ivintɛm. PAPA GƆD, dɛn PAPA GƆD go mɛmba dɛn ɛn gi dɛn ɔl wetin dɛn bin dɔn lɔs bak.

⁸ PAPA GƆD se, in dɔn yɛri aw di pipul dɛn na Moab de provok ɛn aw di wan dɛn na Amɔn de tɔmɛnt in pipul dɛn dɔn dɛn de blɔf se dɛn go siz dɛn land.

⁹ I se, wans in PAPA GƆD, we na Izrɛl dɛn PAPA GƆD, nɔ de day, in go mɔs mek Moab tan lɛk Sɔdɔm, dɔn i go mek di Amonayt dɛn lɛk Gomɔra. Di ples go gɛt soso chukchuk ɛn i go dray arara. I nɔ go fit fɔ natin. Di balans pipul dɛn we na PAPA GƆD yon, we nɔ bin day go wutuwutu dɛn ɛn tek dɛn yon land na dɛn an.

¹⁰ Na dat go bi to dɛn fɔseka di kak we dɛn de kak. Dɛn jɛs de fɔ de bost ɛn mek mɔt pan PAPA GƆD we na PAPA GƆD Ɔlmayti in pipul dɛn.

¹¹ PAPA GƆD insɛf go dil wit dɛn traŋa traŋa wan. Yɛs, i go nyakanyaka dɛn ɛn mek dɛn gɔd nɔ fiba natin to dɛn ɛn ɔlman naw go butu ɛn wɔship am, usay dɛn de, na ɔl di neshɔn dɛn na wɔl.

¹² Di pipul dɛn na Ithiopia dɛnsɛf go day na wa.

¹³ I go yuz in pawa fɔ du wetin i wan du na di nɔth ɛn i go nyamanyama Asiria, ɛn mek Ninivɛ dray arara lɛk ples we pɔsin nɔ go ebul tap.

¹⁴ Na ples we ɔlkayn animal go lidɔm togɛda; dɛn wan we pɔsin de mɛn o, dɛn wan dɛn we de na bush; dɛn yuba ɛn ɛjɔg ɔl go de tinap pan dɛn post we dɔn fɔdɔm, kɔkɔ ɛn minista bɔd go de mek nɔys insay de ɛn dɛn trɔŋ trɔŋ wud we de de ɔl go fɔdɔm.

¹⁵ Na di ples dis we bin de kak ɛn tink se i sɛf ɛn nɔbɔdi nɔ go ebul am. I de blɔf se nɔbɔdi nɔ go tan lɛk am. I nɔ fit fɔ natin igen, bush sɛf tɛl lay! Ɛnibɔdi we de pas usay i de go jɛs sɔktit.