Zɛfinaya 1 - Krio Fɔs Oli Baybul

¹ PAPA GƆD tɔk to Zaɛfinaya we na Kushi in bɔypikin. Kushi na bin Gɛdalaya in bɔypikin. Gɛdalaya na bin Amaraya in bɔypikin. Amaraya na bin Ɛzikaya in bɔypikin. Da tɛm de na Josaya we na Amɔn in bɔypikin na bin di kiŋ na Juda.

Di Tɛm We PAPA GƆD Go Pas Jɔjmɛnt

² PAPA GƆD se in go klia ɔltin kɔmɔt na wɔl.

³ I go klia mɔtalman o, animal o, bɔd o, fish o - ɔlman. I se in go mek dɛn bad wan dɛn ɔl kɔmɔt na rod bikɔs ɔlman go day na wɔl.

⁴ I se in go pɔnish di pipul dɛn na Juda ɛn ɔl udat tap na Jerusɛlɛm. I se in go pwɛl di balans tin we lɛf pan dɛn tin dɛn we dɛn de yuz fɔ wɔship Beal, wit dɛn man dɛn we de fɔ de mek sakrifays to Beal.

⁵ Ɛn dɛn ɔl we de klem go pantap dɛn os dɛn ruf fɔ wɔship dɛn tin dɛn we de ɔp klawd ɛn dɛn wan dɛn ɔl we de prɔmis am se dɛn go du wetin i want bɔt dɔn dɛn de swɛ bak to da fɔls gɔd we nem Molɛk.

⁶ I se in go nyamanyama ɔl dɛn wan we dɔn lɛf fɔ fala in, PAPA GƆD, ɛn nɔ de bɔda fɛnɔt bɔt wetin i want igen

⁷ Nɔ fɔ mek nɔys usay PAPA GƆD we na PAPA GƆD de! Bikɔs di de we PAPA GƆD go kam dɔŋ de nia ɛn PAPA GƆD dɔn mek ɔl udat i invayt we na di ɛnimi dɛn dɔn rɛdi fɔ wutuwutu Juda.

⁸ PAPA GƆD se da de de in go pɔnish ɔl di bigman dɛn ɛn di kiŋ in bɔypikin dɛn, ɛn ɔl dɛn wan we de du wetin di fɔrina dɛn de du.

⁹ Da sem de de, i go pɔnish ɔl udat jomp go insay pipul yad ɛn we de ful dɛn bɔs dɛn os wit tif tin we dɛn buli pipul fɔ gɛt.

¹⁰ PAPA GƆD se da de de, dɛn go yɛri we di pipul dɛn na di Fish Get de kray, dɛn go yɛri kray de kɔmɔt na di Sɛkɛn Kwata pantap di il dɛn we di bildin dɛn go fɔdɔm.

¹¹ I se dɛn wan dɛn we tap na di ɔda pat na di siti fɔ kray we dɛn yɛri bɔt dat, bikɔs nɔn biznɛsman nɔ go de igen Ɔl di biznɛsman dɛn go dɔn day.

¹² I se da tɛm de i go tek lamp fɔ luk insay Jerusɛlɛm so dat i go pɔnish dɛn man we bikɔs dɛn satisfay wit di lili ɛn natin we dɛn gɛt, nɔ bisin bɔt PAPA GƆD. Dɛn de tɔk na dɛn at se PAPA GƆD nɔ gɛt dɛn tɛm sɛf.

¹³ Dɛn go wutuwutu dɛn jɛntri go ɛn ivin dɛn os dɛn nɔ go bɛtɛ igen fɔ mek dɛn tap de. We dɛn bil nyu os, dɛn nɔ go ɛva tap de. Pan ɔl we dɛn go plant vayn gadin, dɛn nɔ go ebul pul wayn kɔmɔt de.

¹⁴ Di big big de we PAPA GƆD de kam dɔn kam nia ɛn i de kam jisnɔ. Di sawnd we go kam wit am nɔ go fayn fɔ yɛri. Bigman dɛn ɔl go de kray bita bita wan.

¹⁵ Na de we PAPA GƆD go sho aw i vɛks, we siriɔs waala go fɔdɔm ɛn ɔlman go sɔri so, ɛn fil am insay dɛn bon we waala go de; na de we ɔltin go pwɛl ɛn nyamanyama; di ples go dak ɛn sik so, dɔn di klawd go kɔba wit di daknɛs,

¹⁶ na tɛm we wɛn di trɔmpɛt go blo so, ɔlman go ala se tɛm dɔn rich fɔ fɛt. Dɔn dɛn ples we dɛn bin min se nɔbɔdi nɔ go go bikɔs i trɔŋ, nain dɛn go atak wit ɔl dɛn ay ay wɔl.

¹⁷ PAPA GƆD se in go mek di man dɛn at pwɛl, dɔn dɛn go bigin du tiŋs lɛk udat blɛn bikɔs dɛn ɔl dɔn sin; dɛn blɔd nɔ go min natin igen ɛn dɛn dedebɔdi ɔl go skata na grɔn we nɔbɔdi nɔ go bisin.

¹⁸ We PAPA GƆD dɔn rɛdi fɔ du wetin i want, nɔn mɔni, i lɛk aw i bɔku nɔ go tap am. We PAPA GƆD dɔn jɛlɔs gud, i go jɛs mek faya bɔn ɛn dɔnawe wit ɔlman we tap na wɔl.