Taytɔs 1 - Krio Fɔs Oli Baybul

¹ Na mi, Pɔl, we na Gɔd in savant ɛn Jizɔs Krays in apɔsul, de rayt dis lɛta. Gɔd pik mi ɛn sɛn mi to in pipul dɛn we i dɔn pik fɔ mek a ɛp dɛn fɔ biliv pan am, ɛn fɔ no fɔ tru wetin Gɔd want fɔ mɔtalman, we wi bin de lan pipul,

² we go mek dɛn abop fɔ gɛt layf we go de sote go. Gɔd, we nɔ de lay, bin dɔn prɔmis fɔ gi wi da layf de bifo i mek di wɔl,

³ ɛn i mek pipul no bɔt di prɔmis wɛn di rayt tɛm rich bay di mɛsej we i sɛn. Na mi Gɔd fil se go du wetin i want so i gi mi di mɛsej fɔ tɛl pipul; ɛn bikɔs in we de sev wi tɛl mi fɔ tɛl pipul di mɛsej, na dat mek a de tɛl dɛn.

⁴ A de rayt to Taytɔs, mi yon tru pikin, bikɔs i biliv pan Krays lɛkɛ aw misɛf biliv pan am. Mek Gɔd we na mi Papa ɛn Krays Jizɔs we de sev wi blɛs yu ɛn mek ɔltin wɛl wit yu.

Taytɔs In Wok na Krit

⁵ A bin lɛf yu na Krit fɔ mek yu du wetin wi nɔ bin du de yet, ɛn mek yu pik ovasia na ɔl dɛn tɔŋ. Mɛmba dɛn tin we a bin tɛl yu:

⁶ Ovasia na pɔsin we nɔ fɔ du ɛnitin we go mek pipul pɔynt fiŋa pan am; na wangren wɛf nɔmɔ i fɔ gɛt; in pikin dɛn fɔ bi Kristiɛn, ɛn pipul nɔ fɔ de tɔk se dɛn wayl ɛn dɛn nɔ de yɛri wɔd.

⁷ Na ovasia in an Gɔd in wok de, so i nɔ fɔ du ɛnitin we go mek pɔsin pɔynt fiŋa pan am. I nɔ fɔ prawd, i nɔ fɔ de vɛks kwik kwik, i nɔ fɔ de drɔnk, i nɔ fɔ de fɛt, i nɔ fɔ want plɛnti tin fɔ insɛf.

⁸ I fɔ gud to trenja, ɛn i fɔ lɛk wetin gud. In ed fɔ stɛdi, i fɔ de waka tret, i fɔ de du dɛn tin we go mek Gɔd satisfay, ɛn i fɔ ebul kɔntrol insɛf mek i nɔ du ɛnitin we bad.

⁹ I fɔ biliv di tru mɛsej we nɔ go chenj, dat na di sem mɛsej we wi lan dɛn; ɛn i fɔ fala am wit ɔl in at. If i du dat, insɛf go ebul lan pipul dɛn tin we gud fɔ dɛn, so dat i go kɔrej dɛn ɛn sho dɛn wan we de tɔk se dɛn tin we i de lan dɛn nɔ rayt, se dɛn nɔ fɔ de tɔk so.

¹⁰ Plɛnti pipul de, we nɔ de yɛri wɔd, we de mek ɔda pipul ful wit di nɔnsɛns we dɛn de tɔk, ɛn na dɛn Ju pipul mɔ de du so.

¹¹ Yu fɔ mek dɛn pipul ya tap fɔ tɛl pipul dɛn tin we dɛn de tɔk, bikɔs dɛn de skata mami, dadi, ɛn pikin, we dɛn de lan dɛn tin we dɛn nɔ fɔ lan dɛn. Dɛn de du dat fɔ mek mɔni nɔmɔ, ɛn dat na tin we fɔ mek dɛn shem.

¹² Wan pan dɛn yon prɔfɛt, we insɛf kɔmɔt Krit, nain bin tɔk se, “Pipul we kɔmɔt Krit nɔba tɔk tru, dɛn na wikɛd bist, dɛn les ɛn dɛn de it tumɔs.”

¹³ Ɛn wetin i tɔk na tru, na dat mek yu fɔ tɔk pan dɛn traŋa wan, so dat dɛn go biliv Gɔd gud gud,

¹⁴ ɛn lɛf fɔ biliv dɛn stori we na dɛn Ju pipul dɛnsɛf mek, ɛn lɛf fɔ du dɛn tin we dɛn pipul we dɔn tɔn dɛn bak pan di tru tin, tɛl dɛn fɔ du.

¹⁵ Ɔltin klin to pipul we gɛt klin at; bɔt natin nɔ klin to pipul we nɔ gɛt klin at ɛn we nɔ biliv Gɔd, bikɔs na dɔti tin dɛn de mɛmba ɛn na dat de na dɛn at.

¹⁶ Dɛn de se dɛn no Gɔd, bɔt di tin dɛn we dɛn de du sho se dɛn nɔ no am. Dɛn gɛt bad at, dɛn nɔ de yɛri wɔd, dɛn nɔ fit fɔ du ɛnitin we gud.