Sɔlɔmɔn In Siŋ Dɛm 8 - Krio Fɔs Oli Baybul

¹ A wish yu bin bi lɛk brɔda to mi, we sɔk bɔbi to mi mama! Datɛnde if a mit yu na trit, a fɔ kis yu, ɛn nɔbɔdi nɔ go luk mi lɛs fɔ seka dat.

² A go ol yu ɛn kɛr yu go na mi mama in os, insay di wan we tekin fɔ mi in rum. A go gi yu wayn we gɛt spays, fɔ drink, ɛn a go kwis mi pomigranet fɔ yu.

³ Aya! A wish in lɛf an de ɔnda mi ed, ɛn in raytan grip mi.

⁴ Duya O Jerusɛlɛm in gyal pikin dɛn, una nɔ provok ɔ wek lɔv te in tɛm rich.

Di Nɔmba Siks Siŋ Di Uman Dɛn

⁵ Udat dawande we de kɔmɔt na di dɛzat de liŋ pan in daliŋ? A wek yu ɔnda di apul tik. Da say we in mama in bɛlɛ at am fɔ bɔn yu, na de di wan we bɔn yu in bɛlɛ bin at am.

Di Uman

⁶ Fiks mi lɛkɛ lɔk na yu at lɛkɛ lɔk na yu an; bikɔs lɔv traŋa lɛk day, jɛlɔs wikɛd pas di grev. I de bɔs lɛk we faya de bɔs, di faya we wam tumɔs.

⁷ Bɔku wata nɔ go ebul ɔt lɔv, flɔd sɛf nɔ go ebul drawn am. If man gi ɔl di jɛntri nain os fɔ lɔv, dɛn nɔ go maks am sɛf.

Di Uman In Brɔda Dɛm

⁸ Wi gɛt wan smɔl sista ɛn i nɔ gɛt bɔbi. Wetin wi go du fɔ wi sista wɛn dɛn go kam aks fɔ am.

⁹ If in na wɔl, wi go bil silva tawa pan am; bɔt if in na domɔt, wi go nak sayd bod pan am.

Di Uman

¹⁰ Mi na bin wɔl, ɛn mi bɔbi dɛn na lɛk tawa dɛn; datɛnde, a tan nain yay lɛk pɔsin we de briŋ kol at.

Di Man

¹¹ Sɔlɔmɔn bin gɛt greps gadin na Beal Amɔn; i rɛnt in greps gadin to gadina dɛn; dɛn ɔl fɔ pe am wan tawzin silva kɔpɔ fɔ di frut dɛn.

¹² Mi greps gadin, mi yon yon na fɔ mi; yu Sɔlɔmɔn, yu gɛt lɛk dɛn wan tawzin, ɛn di wan dɛn we de kip di frut dɛn lɛkɛ dɛn tu ɔndrɛd.

¹³ Yu we tap na di gadin dɛn, mi kɔmpin dɛn de lisin fɔ yu vɔys, mek yu yɛri am.

Di Uman

¹⁴ Mekes mi daliŋ mek lɛk fritambo ɔ lɛkɛ dɛn yɔŋ man dia na di mawnten we spays de gro.