Sɔlɔmɔn In Siŋ Dɛm 5 - Krio Fɔs Oli Baybul

Di Man

¹ A de kam insay mi gadin, mi sista, mi yawo, A de gɛda mi Ma wit mi spays, A de it mi ɔnikomb wit mi ɔni, A de drink mi wayn wit mi milk, It o padi dɛn ɛn drink; drink dip o, lɔva dɛn!

Di Uman Dɛm Di Nɔmba Fo Siŋ Di Uman

² A slip bɔt mi at wek. Na wetin! Mi bilɔvɛd de nak. “Opin fɔ mi, mi sista, mi lɔvin, mi dɔv, mi yon we nɔ gɛt bɔt; mi ed sok wit dyu ɛn mi ia ɔl sok wit dyu.

Di Uman

³ A bin dɔn pul klos; Aw a go wɛr am bak? A dɔn was mi fut, aw a go dɔti am bak?

⁴ Mi lɔva put in an pan di andul, ɛn mi at gladi insay mi.

⁵ A grap fɔ opin fɔ mi man we a lɛk, ɛn mi an dɛn bin de drip wit pafyum, mi fiŋa dɛn gɛt wata pafyum, we a put an pan di bolt in andul.

⁶ A opin fɔ mi ma we a lɛk, bɔt mi lɔva bin dɔn tɔn ɛn go. Mi at pwɛl wɛn i tɔk. A luk fɔ am bɔt a nɔ si am; A kɔl am bɔt i nɔ ansa.

⁷ Di wachman dɛn fɛn mi, we dɛn de patrol na di siti; dɛn bit mi, dɛn wund mi, dɛn pul mi shɔl kɛr am go, dɛn wachman dɛn pantap di wɔl.

⁸ Duya O Jerusɛlɛm in gyal pikin dɛn, if una fɛn mi lɔva, du mek una tɛl am se, a gɛt lɔv sik.

Di Uman Dɛm

⁹ Wetin na yu lɔva pas ɛni ɔda lɔva, uman we fayn pas ɔl uman dɛn? Wetin na yu lɔva pas ɛni ɔda lɔva, we mek yu de put wɔd pan wi so?

Di Uman

¹⁰ Ɔl say pan mi man we a lɛk de shayn ɛn frɛsh, insay tɛn tawzin man i nɔ de ayd.

¹¹ In ed na fɔs klas gold; i gɛt kuli ia, we blak lɛk ta bebi.

¹² In yay na lɛk dɔv dɛn we de to di say we wata de bɔs na grɔn, dɛn was am insay milk, i sɛt fayn.

¹³ In jɔ lɛk we dɛn mek ip na gadin fɔ plant ɔl ful wit spays dɛn, we de pul fayn fayn sɛnt. In lip dɛn na lɛk da Lili flawa, we wata pafyum de kɔmɔt pan.

¹⁴ In an dɛn fayn lɛk we dɛn mol gold, ɛn sɛt wit juɛl. In bɔdi tan lɛk ayvri, we dɛn ful wit fayn blu ston.

¹⁵ In lɛg dɛn na wayt mabul pila we dɛn fiks insay gold sɔkɛt dɛn. I fiba lɛk Libanɔn, i fayn lɛk dɛn soba sida tik.

¹⁶ In tɔk swit bad, ɛn insɛf yu mɔs want am. Na mi bilɔvɛd dat ɛn na mi padi dat, Jerusɛlɛm in gyal pikin dɛn.