Sɔlɔmɔn In Siŋ Dɛm 4 - Krio Fɔs Oli Baybul

Di Man

¹ Bo yu fayn mi lɔv! Luk we yu fayn yu yay dɛn na lɛkɛ dɔv biɛn yu vel. Yu ia tan lɛk we dɛn got gɛda de muf go dɔŋ Mawnt Giliad in sayd dɛn.

² Yu tit tan lɛkɛ dɛn uman ship we dɛn kin dɔn shev dɛn ia, di tɛm we dɛn kin dɔn was dɛn, dɛn ɔl bɔn twin ɛn nɔn pan dɛn pikin nɔ day.

³ Yu lip dɛn na lɛk rɛd trɛd, yu mɔt fayn. Yu chik dɛn tan lɛk af af pomigranet biɛn yu vel.

⁴ Yu nɛk lɛk Devid in tawa we dɛn bil fɔ put wɛpɔn, dɛn ɛŋ wan-tawzin smɔl shild de, ɔl na sojaman big shild.

⁵ Yu tu bɔbi dɛn na lɛkɛ tu fritambo pikin, twin we fritambo bɔn, we de it usay Lili flawa de gro.

⁶ So te di mɔnin briz de blo, ɛn do de klin, A go tap na di pafyum mawnten ɛn di frankinsɛns il.

⁷ Yu fayn bad bad wan mi lɔv; wan bɔt nɔ de pan yu.

⁸ Mi yawo, kɔmɔt Libanɔn kam go wit mi, kam go wit mi kɔmɔt Libanɔn. Kɔmɔt na Amanain ed na Sɛnir ɛn Amɔn dɛn ed, kɔmɔt na di layɔn dɛn os, kɔmɔt na di lɛpɛt dɛn mawnten.

⁹ Yu dɔn kapchɔ mi at, mi sista, mi yawo, yu luk mi wantɛm nain a lɔs, yu kapchɔ mi wit wan juɛl pan yu chen.

¹⁰ Di we we yu lɔv swit, mi sista, mi yawo! Yu lɔv i bɛtɛ pas wayn, ɛn di fayn sɛnt we yu pafyum dɛn de pul pas spays.

¹¹ Yu lip dɛn de mek swit tin lɛk flawa jus, mi yawo, ɔni ɛn milk de ɔnda yu siti, Yu klos dɛn sɛnt na lɛk Libanɔn in sɛnt.

¹² Gadin we lɔk nain na mi sista, mi yawo, gadin we lɔk, ples we wata de kɔmɔt ɔnda grɔn we na wan pɔsin gɛt am.

¹³ Yu plant dɛn na fam we pomigranet tik de plɛnti wit ɔl dɛn fayn fayn frut, rɛd flawa ɛn pafyum,

¹⁴ pafyum ɛn safrɔn, kalamus ɛn sinamɔn, wit ɔl dɛn frankinsɛns tik pafyum ɛn alo dɛn, wit ɔl dɛn nɔmba wan spays.

¹⁵ Fawnten we de na gadin, wata wɛl we de gi layf, ɛn riva we de rɔndɔŋ kɔmɔt Libanɔn.

Di Uman

¹⁶ Wek o, yu briz we de blo kɔmɔt na di nɔth, ɛn kam, yu briz we de blo frɔm sawt blo pan mi gadin, lɛ in sɛnt bigin waka ɔlsay. Lɛ mi man we a lɛk kam nain gadin, ɛn it di frut we swit pas ɔl na di gadin.