Sɔlɔmɔn In Siŋ Dɛm 2 - Krio Fɔs Oli Baybul

¹ Mi na di roz we de na Sharɔn, di Lili flawa we kin de na dɛn vali.

Di Man

² Lɛkɛ Lili flawa we de wit dɛn chuk chuk, na so mi daliŋ tan wit dɛn ɔda yɔŋ gyal.

Di Uman

³ Lɛkɛ apul tik na bush, na so mi man we a lɛk fɔ tru, kin tan we i de wit dɛn ɔda yɔŋman dɛn. I de swit mi we a sidɔm nain shado, ɛn in frut swit so na mi mɔt.

⁴ I dɔn briŋ mi kam na di os we i kin mek pati, di bana we i ɛŋ oba mi na lɔv.

⁵ Gi mi trɛnk wit dray grep dɛn, mek a frɛsh bak wit apul; bikɔs lɔv sik de pan mi.

⁶ Aya, a wish in lɛf an de ɔnda mi ed ɛn in raytan ol mi tayt.

⁷ Duya O Jerusɛlɛm in gyal pikin dɛn, a de tek di Fritambo dɛn ɔ uman dia we de na bush beg una, una nɔ provok ɔ wek lɔv te in tɛm rich.

Di Sɛkɛn Siŋ Di Uman

⁸ Mi bilɔvɛd in vɔys! Luk am, i de kam. I de jomp pan di mawnten dɛn i de jomp oba di il dɛn.

⁹ Mi bilɔvɛd tan lɛk fritambo, ɔ lɛk dɛn yɔŋ man dia. Luk am, i tinap de biɛn wi wɔl, i de wach insay di winda, i de pip tru di trɛlis.

¹⁰ Mi bilɔvɛd de tɔk ɛn i tɛl mi se “Grap mi lɔv, mi fayn uman ɛn kam lɛ wi go.

¹¹ Biklɔs yu si winta dɔn pas, di ren dɔn dɔn kpatakpata.

¹² Di flawa dɛn dɔn bɔs na grɔn, di tɛm fɔ siŋ dɔn kam, ɛn di tɔtul dɔv in vɔys dɔn de sawnd na di land bak.

¹³ Di fig tik sɛf dɔn de pul fig, ɛn di greps dɛn dɔn de pul flawa; dɛn sɛnt de skata ɔlɔbɔt. Grap mi lɔv, mi fayn uman ɛn kam mek wi go.

¹⁴ E mi dɔv, usay di rɔk dɛn plit, insay di kev pat na dɛn shap mawnten, alaw mi lɛ a si yu fes, mek a yɛri yu vɔys, bikɔs yu vɔys swit, ɛn yu fes fayn.

¹⁵ Mek wi kech dɛn fɔks dɛn, di lili fɔks dɛn, we de pwɛl di greps gadin bikɔs wi greps gadin dɛn wan bia.”

Di Uman

¹⁶ Mi man we a lɛk na mi yon, ɛn mi nain yon, i de fid in ship usay dɛn Lili flawa de.

¹⁷ So te di mɔnin briz bigin blo ɛn do bigin klin, kam bak, mi man we a lɛk, mek lɛk fritambo, ɔ lɛkɛ dɛn yɔŋ man dia, we de na dɛn rɔf mawnten.