Ruth 4 - Krio Fɔs Oli Baybul

Boaz Mared Ruth

¹ Boaz go ɔp na di siti in get usay di bigman dɛn kin sidɔm fɔ jɔj kes ɛn biol biol, dis gud gud fambul ya we Boaz bin tɔk bɔt, insɛf go de. So Boaz kɔl am fɔ go sidɔm nia am ɛn i go.

² Boaz kɔl tɛn man pan di bigman dɛn we bin de de fɔ go sidɔm to am; ɛn i go.

³ I tɛl am se Naomi dɔn kɔmɔt Moab ɛn i de sɛl di land we Ɛlimɛlɛk we na dɛn fambul bin gɛt.

⁴ So in tink se fɔ tɛl am, so dat na usay di ɔda bigman dɛn de i go bay am if i want am. I se if i wan bay am bak, i fayn bikɔs nɔn ɔda pɔsin nɔ de fɔ bay am, ɛn nain di Boaz de afta am. Di man se in go bay am bak.

⁵ Na da tɛm de Boaz tɛl am se, i fayn, bɔt di tɛm we i de bay di fil na Naomi in an, i fɔ bay Ruth insɛf we na di Moabayt uman we na di man we dɔn day in wɛf so dat in nem nɔ go day.

⁶ So di fambul we bin wan bay di land bak se i nɔ go bay am fɔ insɛf igen bikɔs dat min se in nɔ go gɛt natin pan di prɔpati. I se mek Boaz bay am bak bikɔs i nɔ ebul du dat.

⁷ Fɔstɛm we dɛn kin gɛt fɔ bay tin bak ɔ ɛkschenj tin na Izrɛl, fɔ sho se ɔlman gri wit wetin dɛn se, wan pɔsin go pul in sandals nain fut gi di ɔda wan.

⁸ So bikɔs di ɔda man de tɛl Boaz se i kin bay am, i pul in sandals nain fut gi am.

⁹ Dɔn Boaz tɛl di bigman dɛn ɛn di ɔda pipul dɛn se, dɛn de fɔ in witnɛs se, in dɔn bay ɔl wetin na bin Ɛlimɛlɛk, Malɔn ɛn Kiliɔn yon na Naomi in an da de de.

¹⁰ I se in dɔn bay Ruth we na Moabaytɛs ɛn we bin mared to Malɔn we dɔn day fɔ bi in wɛf so dat di dayman in nem nɔ go ɔt na di say we i bɔn as insɛf go gɛt prɔpati.

¹¹ Dɛn di bigman dɛn ɛn ɔlman we bin de na di get se, yɛs, dɛn de fɔ witnɛs ɛn pre mek di uman we i de mared tan lɛk Rechɛl ɛn Lia we na dɛn ɔltu bɔn pikin ful os fɔ Izrɛl. Dɛn pre mek bɛtɛ fala am lɛk Ɛfrata ɛn mek ɔlman no am na Bɛtliɛm.

¹² Dɛn pre bak mek dɛn os tan lɛk aw Pɛrɛz in os bin tan. Pɛrɛz na di bɔypikin we Tama bin bɔn fɔ Juda PAPA GƆD go mɔs mek Ruth insɛf bɔn pikin ful os fɔ Boaz.

Boaz Ɛn In Jɛnareshɔn

¹³ So Boaz kɛr Ruth go nain os ɛn i bi in wɛf. Dɛn tu lidɔm ɛn PAPA GƆD mek i gɛt bɛlɛ ɛn bɔn bɔbɔ.

¹⁴ Dɛn di uman dɛn na di siti go mit Naomi ɛn jɔyn am fɔ prez PAPA GƆD. Dɛn se PAPA GƆD nɔ lɛ Naomi de i nɔ gɛt fambul. So lɛ di pikin bi bigman na Izrɛl.

¹⁵ Dɛn se nain go mek Naomi gɛt layf bak ɛn nain go mek i go rɔju bikɔs nain dɔtɛnlɔ we lɛk am bad lɛk aw sɛvin bɔypikin go lɛk am, nain bɔn am.

¹⁶ Naomi tek di pikin ɛn le am nain chɛst ɛn bayobayo am.

¹⁷ Di uman dɛn we de neba am gi am nem Obɛd, dɛn se na Naomi dɔn bɔn bɔypikin so. Obɛd na bin Jɛsi in papa ɛn na Devid in grampa.

¹⁸ Na Pɛrɛz in yon jɛnareshɔn dɛn wan ya: Pɛrɛz na Hɛzrɔn in papa,

¹⁹ Hɛzrɔn bɔn Ram, Ram bɔn Aminadab,

²⁰ Aminadab bɔn Nashɔn, Nashɔn bɔn Salmɔn,

²¹ Salmɔn bɔn Boaz, Boaz bɔn Obɛd,

²² Obɛd bɔn Jɛsi, ɛn Jɛsi bɔn Devid.