Ruth 3 - Krio Fɔs Oli Baybul

Ruth Gɛt Man Fɔ Mared

¹ Naomi we na Ruth in mɔdɛnlɔ aks am if i nɔ fɔ mek shɔ se Ruth gɛt in yon mared-os.

² Naomi tɛl am se i fɔ mɛmba se Boaz na dɛn fambul. I se, da nɛt de na di milos, Boaz gɛt fɔ go fana ɔl di bali.

³ I se Ruth fɔ was, put pafyum ɛn drɛs fayn ɛn go na di milos bɔt i nɔ fɔ mek di man no se i de de pas we i dɔn it ɛn drink dɔn.

⁴ I se, Ruth fɔ de wach usay di man de go lidɔm ɛn wɛn i dɔn lidɔm, Ruth fɔ go es in kɔbaklos ɛn lidɔm nia in fut. I go tɛl am wetin i fɔ du.

⁵ Ruth ansa se in go du ɔl wetin Naomi tɛl am.

⁶ So i go dɔŋ na di milos ɛn du jɛs wetin in mɔdɛnlɔ bin tɛl am.

⁷ Wɛn Boaz dɔn it ɛn drink dɔn, in at layt. I go lidɔm midul di sid dɛn we dɛn payl. Di uman go saful, pul in kɔbaklos ɛn lidɔm to in fut.

⁸ Midul nɛt, di man skyad wek ɛn we i tɔn, biol, biol, na uman i fil lidɔm kɔna to in fut.

⁹ I aks udat de de. Ruth ansa se in na Ruth ɛn tɛl am fɔ prɛd in skat ɛn kɔba am as in na man we kin mared am.

¹⁰ Nain i se, mek PAPA GƆD blɛs am bikɔs wetin i du da tɛm de pas wetin i bin dɔn du, bikɔs i nɔ go fɛn yɔŋ bɔy fɔ mared ɛn nɔ bisin if i jɛntri ɔ if i po.

¹¹ I se mek i nɔ fred bikɔs in go du wetin Ruth want am fɔ du ɛn ɔlman na di siti no se na uman we fit fɔ gɛt.

¹² I se na tru se in na Ruth in man in gud gud fambul dɛn bɔt ɔda fambul de we nia pas am.

¹³ I tɛl Ruth se mek i slip de da nɛt de, dɔn na mɔnin, in go go aks di man if i go gri fɔ mared Ruth. I se mek i mared am. Bɔt if i se nɔ, i prɔmis bifo PAPA GƆD se in di Boaz go mared Ruth.

¹⁴ So insɛf lidɔm bay in fut te ali mɔnin bifo do klin ɛn grap kwik we nɔbɔdi nɔ go no se nain bikɔs Boaz nɔ bin want ɛnibɔdi fɔ no se uman go slip na di milos.

¹⁵ We i grap fɔ go, Boaz mɛzhɔ bɔt sɔm twɛnti-fayv kɔp bali, rap am insay di klos we i bin wɛr ɛn gi am fɔ tot. Dɔn i ol rod go bak na di siti.

¹⁶ We Ruth rich, in mɔdɛnlɔ aks am wetin apin. Nain Ruth tɛl am ɔl wetin di man du fɔ am,

¹⁷ ɛn gi am di bali we i mɛzhɔ fɔ am ɛn se in nɔ fɔ go ɛmti an.

¹⁸ Naomi tɛl am se lɛ i bia wet bikɔs Boaz go mek shɔ se ɔltin dɔn da de de.