Ruth 2 - Krio Fɔs Oli Baybul

Ruth Go Wok Na Boaz In Fam

¹ Wan man bin de we na Naomi in man in fambul. Na bin jɛntriman ɛn i bin nem Boaz.

² Wande, Ruth we na Moabayt uman tɛl Naomi se i wan go na di fam ɛn sɔntɛm pɔsin go sɔri fɔ am ɛn mek i pik di af af dɛn we kin lɛf afta dɛn dɔn avɛst dɔn. Naomi insɛf tɛl am mek i go.

³ Na so Ruth tek lɛf fɔ go pik di af af we kin lɛf afta dɛn avɛst. I kam bi se na Boaz we na Ɛlimɛlɛk in fambul gɛt di fil we i go.

⁴ I te lilibit nain Boaz kɔmɔt Bɛtliɛm, ɛn we i de tɛl in wokman dɛn adu, i pre mek PAPA GƆD blɛs dɛm. Dɛnsɛf pre mek PAPA GƆD blɛs am.

⁵ Dɔn i aks di edman fɔ di wokman dɛn udat di yɔŋgyal bi we de na di fil.

⁶ Di man tɛl am se na di Moabayt uman dat we fala Naomi tɔn bak we i kɔmɔt na Moab.

⁷ I tɛl am se i beg fɔ mek dɛn gri lɛ i de pik pik di af af dɛn we de lɛf biɛn wɛn dɛn de avɛst. I tɛl Boaz se, i bin dɔn de pik frɔm ali mɔnin ɛn i nɔ blo sɛf.

⁸ So Boaz kɔl Ruth ɛn tɛl am se i nɔ fɔ kɔmɔt de go na ɛni ɔda fam. I se i fɔ de nia in wokuman dɛn.

⁹ I tɛl am se, i nɔ fɔ pul yay kɔmɔt pan dɛn ɛn wetin dɛn de du so dat i go de wit dɛn ɔltɛm. I tɛl am se i dɔn tɛl di yɔŋman dɛn nɔ fɔ ambɔg am ɛn ɛnitɛm we i wan drink wata, i fɔ go drink pan di wata we in man dɛn dɔn tot.

¹⁰ Ruth baw to Boaz wit in fes na grɔn ɛn aks am wetindu i fɔ trit am so ɛn in na fɔrina.

¹¹ Boaz ansa am se, i dɔn yɛri bɔt ɔl wetin i dɔn du fɔ in mɔdɛnlɔ afta in man day ɛn aw i lɛf in papa ɛn mama ɛn usay i bɔn fɔ kam tap wit pipul na ples we i nɔ wande tap.

¹² I pre mek PAPA GƆD blɛs am ɛn mek PAPA GƆD we nain i abop pan fɔ kɔba am, gi am ɔl di gud tin we i fɔ gɛt fɔ dat.

¹³ Ruth se i dɔn tɔk to am fayn pan ɔl we in nɔto wan pan in wokuman dɛn.

¹⁴ We Boaz rɛdi fɔ it i kɔl am mek insɛf it. I se mek i it sɔm pan di bred ɛn dɔk am insay di wayn. So insɛf sidɔm nia di wokman dɛn, it; ɛn i gi am sɔm sid we dɔn pach fɔ it. I it te i bɛlful ɛn ivin lɛf sɔm.

¹⁵ Wɛn i grap fɔ go gɛda in af af sid, Boaz tɛl in yɔŋman dɛn fɔ lɛf am lɛ i pik sɔm pan di wan dɛn we dɛn de avɛst.

¹⁶ I se bay wilful, dɛn fɔ ib sɔm na grɔn lɛ i go pik.

¹⁷ So i de de te ivintɛm. I bit ɔl wetin i gɛda fɔ mek flawa ɛn i bi lɛkɛ twɛnti fayv pawns wet so.

¹⁸ I kɛr am go na di siti go sho in mɔdɛnlɔ wetin i gɛda, dɔn i gi am di balans it we i bin gɛt pan di it we lɛf afta i bin dɔn bɛlful.

¹⁹ In mɔdɛnlɔ aks am usay i go gɛda da de de ɛn udat gɛt di fil we i go. I pre mek PAPA GƆD blɛs di man we gɛt di fil fɔ we i trit am fayn. Ruth tɛl Naomi se na di man we nem Boaz gɛt di fil we i wok da de de.

²⁰ We Naomi yɛri dat nain i ala se mek dɛn blɛs PAPA GƆD fɔ we i nɔ de fɔgɛt in pipul dɛn wɛda dɛn liv ɔ dɛn day. I tɛl Ruth se Boaz na dɛn fambul. I se in na wan pan dɛn gud gud fambul.

²¹ Ruth we na Moabayt uman tɛl am se nɔto dat nɔmɔ, i se di man tɛl am fɔ de nia in wokman dɛn te dɛn dɔn gɛda wetin dɛn fɔ gɛda.

²² Naomi tɛl in dɔtɛnlɔ se i fɔ lɛf de wit di man in wokuman dɛn, lɛ i nɔ go na ɔda fam dɔn dɛn go ambɔg am.

²³ So Ruth de de wit Boaz in wokuman dɛn ɛn gɛda di af af te di tɛm fɔ avɛst dɔn ɛn na wit in mɔdɛnlɔ i bi tap.