Ruth 1 - Krio Fɔs Oli Baybul

Ɛlimɛlɛk Ɛn In Famili Dɛn Muf Go Tap Na Moab

¹ Di tɛm we na Jɔj dɛn bin de rul Izrɛl, aŋri bin de na di land. Wan man we kɔmɔt Bɛtliɛm insay Juda muf go tap na Moab fɔs wit in wɛf ɛn in tu bɔypikin.

² Di man bin nem Ɛlimɛlɛk, in wɛf nem Naomi, ɛn di tu bɔypikin nem na Malɔn ɛn Kiliɔn; dɛn na bin Ɛfratayt we kɔmɔt Bɛtliɛm insay Juda. Dɛn ɔl go na Moab ɛn tap de fɔs.

³ Bɔt Ɛlimɛlɛk we na Naomi in man, day lɛf am wit di tu bɔypikin.

⁴ Di bɔypikin dɛn mared Moabayt uman dɛn; wan nem Ɔpa ɛn di ɔda wan nem Ruth. Dɛn bin dɔn mared fɔ lɛkɛ tɛn ia so,

⁵ we Malɔn ɛn Kiliɔn day, di uman lɔs in tu bɔypikin ɛn in man.

Naomi Ɛn Ruth Go Bak Na Bɛtliɛm

⁶ In naw wit in dɔtɛnlɔ dɛn lɛf Moab bikɔs bay da tɛm de, i bin dɔn yɛri se PAPA GƆD dɔn sɔri fɔ in pipul ɛn gi dɛn tin fɔ it.

⁷ So in ɛn in tu dɔtɛnlɔ kɔmɔt usay dɛn bin de ɛn lɛf fɔ go bak na Juda.

⁸ As dɛn de go, Naomi tɛl in tu dɔtɛnlɔ se, lɛ dɛn tɔn bak go to dɛn mami. I pre se mek PAPA GƆD blɛs dɛn ɛn du gud to dɛn lɛkɛ aw dɛnsɛf dɔn du gud to di wan dɛn we bin dɔn day ɛn insɛf.

⁹ I se mek PAPA GƆD mek dɛn mared bak ɛn gɛt dɛn yon mared-os. Dɔn i kis dɛn ɛn dɛn bɔskray lawd wan.

¹⁰ Dɛn tɛl am se, dɛn wan fala am go bak to in pipul dɛn.

¹¹ Bɔt Naomi nɔ gri. I se i go bɛtɛ if dɛn tɔn bak. I se dɛn nɔ gɛt fɔ go wit am bikɔs i nɔ go ebul bɔn ɔda bɔypikin dɛn we go bi dɛn man.

¹² I beg dɛn fɔ tɔn bak. I se in dɔn ol fɔ gɛt man ɛn ivin if i de op se in go gɛt man da nɛt de ɛn mek i bɔn bɔypikin dɛn,

¹³ dɛn nɔ go ebul wet te dɛn big fɔ mared dɛn ɛn dat nɔ fɔ mek dɛn nɔ mared ɔda pɔsin. I se, duya, lɛ dɛn nɔ biev so, bikɔs i de fil am fɔ dɛn we PAPA GƆD dɔn mek i tan so fɔ am.

¹⁴ Dat mek di dɔtɛnlɔ dɛn bɔskray bak; ɛn Ɔpa in kis in mɔdɛnlɔ babay, bɔt Ruth in fasin am lɛk krab lɔs.

¹⁵ Naomi tɛl Ruth se mek i fala in sistɛnlɔ as in dɔn go bak to in pipul dɛn ɛn di gɔd dɛn we dɛn de wɔship.

¹⁶ Ruth beg am mek i nɔ fos am fɔ tɔn bak bikɔs na usay in go, insɛf go go, usay i tap insɛf go tap, in pipul go bi insɛf yon pipul ɛn na di PAPA GƆD we i de wɔship insɛf go wɔship;

¹⁷ i se na usay Naomi day na de insɛf go day ɛn na de dɛn go bɛr am. I swɛ se mek PAPA GƆD pɔnish am if i nɔ du wetin i se.

¹⁸ Wɛn Naomi si aw i dɔn tawa fɔ fala am, i nɔ se natin igen

¹⁹ So dɛn ɔltu waka te dɛn rich Bɛtliɛm. We dɛn rich Bɛtliɛm, di wanol siti tɔnoba dɔn di uman dɛn bigin aks if fɔ tru na Naomi dis.

²⁰ Naomi tɛl dɛn se dɛn nɔ fɔ kɔl am Naomi igen, we min se i gladi, dɛn fɔ kɔl am Mara bikɔs in layf bita. PAPA GƆD Ɔlmayti nɔ mek i gladi igen

²¹ I se di tɛm we i bin de go i bin jɛntri bɔt naw PAPA GƆD dɔn mek i tɔn bak ɛmti an. I se dɛn nɔ fɔ kɔl am Naomi igen, we min gladi, naw we PAPA GƆD dɔn mek in yay si trɔbul.

²² So Naomi tɔn bak wit Ruth we nain Moabayt dɔtɛnlɔ, kɔmɔt na Moab. Di tɛm we dɛn rich Bɛtliɛm, na di tɛm we dɛn bin de bigin fɔ avɛst bali.