Lɛta Fɔ Rom 7 - Krio Fɔs Oli Baybul

Fɔ Waka wit Krays na Lɛkɛ Wɛn Pɔsin Dɔn Mared

¹ Mi kɔmpin Kristiɛn dɛn, a no se una go ɔndastand wetin a de kam tɔk bɔt, bikɔs una ɔl no bɔt di lɔ. Di lɔ de kɔntrol pɔsin di tɛm nɔmɔ we di pɔsin nɔ day yet.

² A go gi una wan ɛgzampul: Di lɔ se mare du man fɔ de wit in man te in man day; bɔt if in man day, di lɔ se da tɛm de di uman dɔn fri.

³ Bɔt if di uman go liv wit ɔda man wɛn in maredman nɔ day yet, dat min se da uman de dɔn sin bikɔs i dɔn brok mared; bɔt di lɔ se if di uman in man dɔn day, di uman fri fɔ go mared to ɔda man, ɛn if i du dat i nɔ go sin.

⁴ Mi kɔmpin Kristiɛn dɛn, na semwe so fɔ una bikɔs di day we Krays day dɔn mek wi kɔmɔt ɔnda di Lɔ in pawa. Naw una na Krays yon pipul, Krays we Gɔd mek rayz frɔm di grev, na dat mek wi ɔl fɔ du gud wok we wi de sav Gɔd.

⁵ Di tɛm we wi bin jɛs de du ɛnitin we wi at gi wi fɔ du, wi bin de fala wi at fɔ du plɛnti bad tin, bikɔs nɔmɔ di lɔ bin se wi nɔ fɔ du dɛn; ɛn dɛn tin ya we wi bin de du bin de kil wi.

⁶ Bɔt naw di Lɔ nɔ gɛt pawa fɔ rul wi igen bikɔs to di Lɔ yon pat, we na bin wi masta, wi dɔn day. Wi nɔ de fala di Lɔ we dɛn rayt igen fɔ sav Gɔd lɛkɛ aw wi bin de du fɔstɛm, bɔt naw wi de sav Gɔd lɛkɛ aw in Spirit de mek wi du.

Di Lɔ Kin Mek Pipul Want fɔ Sin

⁷ Wetin wi fɔ se? Di Lɔ bad? Di Lɔ nɔ bad atɔl! Na di Lɔ bin mek a no wetin na sin. A nɔ bin fɔ no wetin na tifyay if di Lɔ nɔ bin se, “Yu nɔ fɔ gɛt tifyay.”

⁸ Di lɔ we tɔk bɔt tifyay mek sin tek chans fɔ mek mi yay go pan ɔl kayn tin we nɔto mi yon. Sin go day if Lɔ nɔ de.

⁹ Misɛf bin fil se mi layf gud bifo di Lɔ kam ɛn sho mi wetin fɔ du ɛn wetin nɔ fɔ du, bɔt wɛn di lɔ we tɔk bɔt tifyay, kam, dat mek a want fɔ sin bad.

¹⁰ Fɔseka dat, a bin tan lɛkɛ pɔsin we dɔn day. So di lɔ we bin fɔ mek a gɛt layf, mek day kam pan mi.

¹¹ Di lɔ mek sin gɛt chans fɔ mek mi ful, ɛn na di lɔ sin tek kil mi.

¹² Na Gɔd gi wi di Lɔ, ɛn ɛni wan pan dɛn lɔ ya nɔ gɛt ɛnitin we bad pan dɛn, dɛn rayt fɔ ɔlman, ɛn dɛn gud fɔ ɔlman.

¹³ Dat min se na di Lɔ we gud mek a day? Nɔto di Lɔ du dat! Na sin tek di Lɔ we gud fɔ kil mi so dat pipul go no aw sin tan fɔ tru, ɛn bikɔs di lɔ se pɔsin nɔ fɔ sin, dat mek sin kam wɔs pas aw i bin tan.

Di Fɛt we de Insay Wi

¹⁴ Wi no se di lɔ kɔmɔt to Gɔd, bɔt mi na mɔtalman, mi na sin in slev.

¹⁵ A nɔ ɔndastand aw a de du: a nɔ de du wetin a want fɔ du, bifo dat, a de du dɛn tin we a nɔ lɛk fɔ du.

¹⁶ Wɛn a du wetin a nɔ want fɔ du, dat sho se a gri se di Lɔ rayt.

¹⁷ So nɔto bay misɛf a de du dɛn tin ya, na sin we de na mi at de mek a du dɛn.

¹⁸ A no se nɔ gud tin nɔ de na mi at, bikɔs mi na mɔtalman. Bikɔs pan ɔl we a want fɔ du gud, a nɔ ebul du am.

¹⁹ A nɔ de du di gud we a want du, na di bad we a nɔ want du, a de du.

²⁰ So if a de du dɛn tin we a nɔ want du, nɔto bay misɛf a de du dɛn, bɔt na di sin we de na mi at de mek a du am.

²¹ Na di tin dis we a si se de bi na mi layf: Wɛn a want du gud, na bad nɔmɔ a kin ebul du.

²² Insay mi at, a lɛk fɔ du wetin Gɔd in lɔ se mɔtalman fɔ du.

²³ Bɔt di lɔ we mi bɔdi de fala difrɛn frɔm di lɔ we mi at tɛl mi se na di rayt wan. Na dat mek a tan lɛkɛ jelman to di lɔ we mi bɔdi de fala, we de mek a sin.

²⁴ A sɔri fɔ misɛf! Udat go pul dis bɔdi, we de mek a day, kɔmɔt pan mi?

²⁵ A tɛl Gɔd tɛnki we mek wi Masta Jizɔs Krays sev mi. Na so tin de go wit mi: A no se a want du wetin Gɔd in lɔ se, bɔt bikɔs mi na mɔtalman a jɛs de fala mi at fɔ sin lɛkɛ slev.