Lɛta Fɔ Rom 15 - Krio Fɔs Oli Baybul

Wi Fɔ Mek Ɔda Pipul Gladi

¹ Wi we biliv Gɔd gud gud fɔ ɛp dɛn wan we nɔ biliv bɛtɛ fɔ mek dɛn biliv mɔ ɛn mɔ se Gɔd go ɛp dɛn pan ɔl wetin de mɔna dɛn. Wi nɔ fɔ jɛs de du wetin wi want fɔ wisɛf.

² Wi ɔl fɔ de du wetin gud fɔ wi kɔmpin Kristiɛn dɛn we go mek dɛn gladi, so dat dɛn go biliv pan Krays gud.

³ Krays nɔ bin du ɔl wetin i du fɔ pliz insɛf, bɔt dɛn rayt na Gɔd in Buk se, i se, “Wɛn pipul kɔs yu, na mi dɛn kɔs.”

⁴ Ɔltin we rayt na Gɔd in Buk na fɔ lan wi sɔntin, so dat, we di tin we rayt de, de mek wi ebul bia ɛn mek wi gɛt kɔrej, wi go no se Gɔd nɔ go lɛf wi.

⁵ Ɛn lɛ Gɔd we de mek pipul ebul bia ɛn gɛt kɔrej, mek una ɔl gri, bikɔs una de fala Jizɔs Krays in yon we,

⁶ so dat una ɔl go prez Gɔd, we na wi Masta Jizɔs Krays in Papa, wit wan at.

Di Gud Nyuz De Semwe fɔ dɛn Pipul we nɔto Ju

⁷ So una fɔ ol una kɔmpin lɛkɛ aw Krays ol una, so dat pipul go prez Gɔd.

⁸ A de tɛl una se Krays kam fɔ ɛp di Ju pipul dɛn fɔ sho se Gɔd go du wetin i bin dɔn prɔmis Ebraam, Ayzak ɛn Jekɔb,

⁹ ɛn igen, i kam fɔ mek dɛn pipul we nɔto Ju prez Gɔd fɔ we i sɔri fɔ dɛn ɛn briŋ dɛn kam to insɛf. Lɛkɛ aw dɛn rayt na Gɔd in Buk, we dɛn se, “So a go tɛl yu tɛnki wɛn a de wit dɛn pipul we nɔto Ju; a go siŋ ɛn prez yu nem.”

¹⁰ Dɛn rayt igen na Gɔd in Buk se, “Una we nɔto Ju, una fɔ gladi wit dɛn pipul we Gɔd dɔn pik.”

¹¹ Ɛn igen, “Una we nɔto Ju, fɔ prez di Masta; ɔlman fɔ prez am!”

¹² Ayzaya tɔk igen se, “Wan pɔsin we go kɔmɔt na Jɛsi in fambul layn, go kam; Gɔd go mek i rul dɛn pipul we nɔto Ju, ɛn dɛn go abop pan am.”

¹³ Lɛ Gɔd we de mek wi abop, mek una gladi bad ɛn gi una kol at bikɔs una biliv pan am, so dat in Spirit go mek una abop pan am mɔ ɛn mɔ.

Pɔl Ɛksplen Wetin Mek I Rayt di Tin we I Rayt

¹⁴ Mi kɔmpin Kristiɛn dɛn, a shɔ se una gud, una no ɔl wetin una fɔ du ɛn una ebul advays una kɔmpin dɛn.

^15-16 A nɔ ayd natin na dis lɛta, a mɛmba una bɔt sɔm tin dɛn we a bin dɔn tɛl una bɔt. A nɔ ayd natin bikɔs na Gɔd gi mi dis wɔndaful wok fɔ du fɔ Jizɔs Krays fɔ ɛp dɛn pipul we nɔto Ju. Wɛn a de tɛl pipul di Gud Nyuz we Gɔd gi wi, a de du di sem wok we dɛn man we de mek sakrifays fɔ pipul sin de du, so dat dɛn pipul we nɔto Ju go tan lɛkɛ sakrifays we go mek Gɔd gladi; we Gɔd in Spirit dɔn mek dɛn klin we mek Gɔd luk se dɛn fit fɔ bi in yon.

¹⁷ Bikɔs a gɛt wanwɔd wit Jizɔs Krays, a kin fil prawd fɔseka di wok we a de du fɔ Gɔd.

¹⁸ A nɔ go tɔk bɔt ɛnitin pas wetin Krays mek a ebul du fɔ mek dɛn pipul we nɔto Ju du wetin Gɔd tɛl dɛn fɔ du. Na di wɔd dɛn we a tɔk, di tin dɛn we a du,

¹⁹ di wɔndaful wok dɛn we sho se Gɔd gɛt pawa, ɛn di pawa we Gɔd in Spirit gɛt mek dɛn du wetin Gɔd bin want dɛn fɔ du. Ɛni say we a tap wɛn a bin kɔmɔt Jerusɛlɛm de go Ilirikum, a tɛl pipul di Gud Nyuz bɔt Krays.

²⁰ Di tin we a want du na layf, na fɔ tɛl pipul we nɔ yɛri bɔt Krays yet di Gud Nyuz, so dat a nɔ go du wok we ɔda pɔsin bin dɔn bigin du.

²¹ Lɛkɛ aw dɛn rayt na Gɔd in Buk, we dɛn se, “Dɛn pipul we dɛn nɔ bin tɛl bɔt Krays go luk ɔp to am, ɛn dɛn wan we nɔ yɛri bɔt am yet go sabi bɔt am.”

Pɔl Rayt Se In Want Go Rom

²² Na dat mek, plɛnti tɛm we a kin want kam fɛn una, sɔntin kin bi we kin mek a nɔ ebul kam.

²³ Bɔt naw a dɔn du ɔl wetin a fɔ du na dɛn ples ya we dɛn nɔ bin yɛri bɔt Krays yet, ɛn we a bin dɔn want fɔ kam fɛn una lɔntɛm,

²⁴ a go lɛk fɔ pas to una naw we a de go Spen, ɛn afta a go dɔn de wit una fɔ sɔm tɛm, a go want mek una gi mi sɔm mɔni we go ɛp mi fɔ pe go de.

²⁵ Bɔt naw a de kɛr sɔm mɔni go Jerusɛlɛm fɔ ɛp Gɔd in pipul dɛn de.

²⁶ Bikɔs di chɔch mɛmba dɛn na Masidonia ɛn Gris dɔn mekɔp fɔ gi dɛn Kristiɛn we nɔ gɛt natin na Jerusɛlɛm sɔm mɔni.

²⁷ Na di mɛmba dɛnsɛf mekɔp fɔ du dat. Ɛn, fɔ tru, dɛn fɔ ɛp dɛn Kristiɛn pipul we nɔ gɛt natin na Jerusɛlɛm. Di Ju dɛn bin dɔn gi dɛn pipul we nɔto Ju pan Gɔd in blɛsin we dɛn mek dɛn yɛri di Gud Nyuz bɔt Krays, so dɛn Kristiɛn we nɔto Ju, dɛnsɛf fɔ ɛp dɛn Ju Kristiɛn wit dɛn tin lɛkɛ mɔni so.

²⁸ Wɛn a dɔn gi ɔl di kɔpɔ we di pipul dɛn na Masidonia ɛn Gris dɔn gɛda fɔ dɛn, a go kɔmɔt de ɛn a go pas to una wɛn a de go Spen.

²⁹ Wɛn a kam to una, a go kam wit ɔl di blɛsin we Krays gi mi fɔ gi una.

³⁰ Mi kɔmpin Kristiɛn dɛn, fɔseka di biliv we wi biliv pan wi Masta Jizɔs Krays, ɛn di lɛk we Gɔd in Spirit put na wi at, a de beg una mek una pre fɔ mi wit ɔl una at lɛkɛ aw misɛf de pre fɔ misɛf.

³¹ Una pre mek dɛn pipul na Judia we nɔ biliv pan Jizɔs Krays nɔ du mi bad, ɛn mek Gɔd in pipul dɛn na Jerusɛlɛm gladi fɔ wetin a de go du fɔ dɛn.

³² So if Gɔd gri, a go kam to una wit gladi na mi at, ɛn a go ɛnjɔy di tɛm we a go de to una, bikɔs a go blo ɛn wi go de kɔrej wi kɔmpin.

³³ Mek Gɔd, we de gi kol at, de wit una ɔl! Emɛn.