Lɛta Fɔ Rom 14 - Krio Fɔs Oli Baybul

Una Nɔ fɔ Jɔj Una Kɔmpin Kristiɛn

¹ Una fɔ trit di pɔsin we nɔ biliv gud yet lɛkɛ una brɔda, una nɔ fɔ agyu wit am bɔt wetin i tink se rayt fɔ du.

² Sɔm pipul biliv se dɛn kin it ɔltin, bɔt ɔda pipul de we nɔ biliv yet se dɛn kin it ɔltin, dɛn biliv se dɛn nɔ fɔ it bif.

³ Dɛn pipul we de it ɛni kayn tin nɔ fɔ tink se dɛn bɛtɛ pas dɛn pipul we nɔ de it bif; ɛn dɛn pipul we nɔ de it bif nɔ fɔ kɔndɛm dɛn pipul we de it ɔltin, bikɔs Gɔd dɔn tek dɛn pipul we de it ɔltin lɛkɛ in yon.

⁴ Udat na una fɔ jɔj ɔda pɔsin savant? Na di pɔsin we i de wok to fɔ tɛl am, if i du gud ɔ if i du bad. Di savant go ebul du wetin i fɔ du bikɔs Gɔd we na di Masta ebul fɔ mek i du wetin i fɔ du.

⁵ Sɔm pipul fil se wande bɛtɛ pas dɛn ɔda de, ɛn ɔda pipul fil se nɔ de nɔ bɛtɛ pas in kɔmpin. Una ɔl fɔ shɔ se wetin una de tink, rayt.

⁶ Ɛnibɔdi we tek wande pas dɛn ɔda de, de du am fɔ ɔna di Masta. Ɛnibɔdi we de it ɔltin, de du am fɔ ɔna di Masta, bikɔs i de tɛl Gɔd tɛnki fɔ di it. Semwe so, ɛnibɔdi we nɔ gri it bif ɛn ɔda tin dɛn, de du dat fɔ ɔna di Masta semwe so, ɛn i de tɛl Gɔd tɛnki.

⁷ Nɔn pan wi nɔ fɔ liv fɔ insɛf nɔmɔ; ɛn nɔn nɔ go jɛs day fɔ insɛf nɔmɔ.

⁸ Wɛn wi liv, wi liv fɔ di Masta; wɛn wi day, wi day fɔ di Masta. So, wɛda wi liv ɔ wɛda wi day, wi na di Masta yon.

⁹ Na di rizin dat we mek Krays day ɛn rayz frɔm di grev fɔ mek i bi di Masta fɔ dɛn pipul we dɔn day ɛn dɛn wan we nɔ day yet.

¹⁰ So wetindu sɔm pan una de jɔj una kɔmpin Kristiɛn, ɛn sɔm ɔda wan dɛn de fil se dɛn bɛtɛ pas dɛn kɔmpin Kristiɛn? Wi ɔl gɛt fɔ tinap bifo Gɔd we go jɔj wi.

¹¹ Dɛn rayt na Gɔd in Buk se, “Di Masta se, wans nɔmɔ a gɛt layf, a prɔmis se ɔlman go nil dɔŋ bifo mi, ɛn ɔlman go tɔk ɔlɔbɔt se, mi na Gɔd.”

¹² So ɔlman go gɛt fɔ ansa fɔ insɛf to Gɔd fɔ wetin i du na wɔl.

Nɔ Mek Yu Kɔmpin Kristiɛn Sin

¹³ So wi fɔ lɛf fɔ jɔj wi kɔmpin, wi fɔ mekɔp nɔ fɔ du ɛnitin we go mek wi kɔmpin Kristiɛn sin.

¹⁴ Di wanwɔd we a gɛt wit Masta Jizɔs mek a no gud gud se natin nɔ de we bad fɔ it, na bay aw pɔsin luk am nɔmɔ; bɔt if pɔsin biliv se sɔntin bad fɔ am fɔ it, dɛn di tin bad fɔ di pɔsin fɔ it.

¹⁵ If una fos fɔ it wan tin we de mek una kɔmpin Kristiɛn dɛn fil bad, dat min se una nɔ lɛk una kɔmpin Kristiɛn dɛn lɛkɛ aw una fɔ lɛk dɛn. Una nɔ fɔ it wetin una fil fɔ it if dat go mek di pɔsin we Krays day fɔ, tap fɔ biliv am.

¹⁶ Una nɔ fɔ mek pipul tɔk bad bɔt ɛnitin we una luk se na gud tin.

¹⁷ Wɛn pɔsin de tɔk bɔt di rul we Gɔd de rul, i nɔ de tɔk bɔt tin fɔ it ɛn tin fɔ drink, bɔt i de tɔk bɔt aw Gɔd de mek ɔltin rayt bitwin in ɛn mɔtalman, di kol at we Gɔd de gi, ɛn di gladi we Gɔd in Spirit de put na pɔsin in at.

¹⁸ Ɛnibɔdi we de sav Krays lɛkɛ dis go mek Gɔd gladi ɛn i go mek mɔtalman sɛf lɛk wetin i de du.

¹⁹ So, wi fɔ tray ɔltɛm fɔ de du dɛn tin we go briŋ kol at, ɛn dɛn tin we go mek ɔda pipul ɛn wisɛf biliv Gɔd mɔ ɛn mɔ.

²⁰ Una nɔ mek di tin we Gɔd dɔn du pwɛl, fɔseka it. Una kin it ɔltin, bɔt una nɔ fɔ it ɛnitin we go mek ɔda pɔsin sin.

²¹ Di rayt tin we una fɔ du, nain dis: una nɔ fɔ it bif, ɔ drink wayn, ɔ du ɛni ɔda tin we go mek una kɔmpin Kristiɛn sin.

²² Ɛni tin we una biliv bɔt wetin fɔ drink ɔ it fɔ lɛf bitwin una ɛn Gɔd. Wɛn pɔsin de du tin we i biliv se rayt ɛn i nɔ dawt insɛf, da pɔsin de, api.

²³ Bɔt if pɔsin de dawt nain at wɛn i de it sɔntin, Gɔd go kɔndɛm am bikɔs i nɔ biliv se wetin i de du, rayt. If wi du ɛnitin we wi nɔ biliv se rayt, dat na sin.