Lɛta Fɔ Rom 11 - Krio Fɔs Oli Baybul

Gɔd Dɔn Sɔri fɔ dɛn Ju Pipul

¹ So mek a aks una sɔntin: Gɔd bin se i nɔ want in yon pipul dɛn igen? I nɔ tɔk dat! Misɛf na Ju we kɔmɔt Izrɛl, Ebraam na mi grampapa papa ɛn na Bɛnjamin in fambul a kɔmɔt.

² Nɔ, Gɔd nɔ se in nɔ want in yon pipul dɛn we i bin dɔn pik lɔntɛm. Una no wetin rayt na Gɔd in Buk, da say we Ilayja tɔk traŋa wan bɔt di Ju pipul dɛn, we i tɔk to Gɔd se:

³ “Masta, dɛn dɔn kil yu prɔfɛt dɛn, dɛn dɔn pwɛl yu ɔlta dɛn; mi na di wangren prɔfɛt we lɛf, ɛn dɛn de tray fɔ kil misɛf.”

⁴ Wetin Gɔd bin ansa Ilayja se? Gɔd bin se, “A dɔn kip sɛvin tawzin man dɛn we nɔ nil dɔŋ bifo Beal fɔ misɛf, pipul min se Beal na Gɔd, bɔt nɔto Gɔd.”

⁵ Na di sem tin de bi naw; sɔm pipul de we i bin dɔn pik fɔ sev bikɔs i bin sɔri fɔ dɛn, dɛn nɔ plɛnti.

⁶ Gɔd pik dɛn pipul de bikɔs i sɔri fɔ dɛn, nɔto fɔseka ɛnitin we dɛn du. If na wetin mɔtalman de du bin de mek Gɔd pik dɛn, dat nɔto tru sɔri Gɔd bin fɔ de sɔri fɔ dɛn.

⁷ Wetin igen? Di pipul dɛn na Izrɛl nɔ bin fɛn wetin dɛn bin de luk fɔ. Na dɛn pipul we nɔ plɛnti, we Gɔd pik, fɛn am. Gɔd mek di ɔda pipul dɛn nɔ ebul yɛri wɛn i kɔl dɛn.

⁸ Lɛkɛ aw dɛn rayt na Gɔd in Buk se, “Gɔd mek dɛn nɔ ebul fil ɛn tink; te tide dɛn yay nɔ de si ɛn dɛn yes nɔ de yɛri.”

⁹ Ɛn Kiŋ Devid se: “Mek dɛn tin we dɛn de it ɛn ɛnjɔy tɔn trap fɔ kech dɛn; lɛ Gɔd mek dɛn fɔdɔm ɛn mek i pɔnish dɛn!

¹⁰ Lɛ Gɔd mek dɛn yay dak so dat dɛn nɔ go si; ɛn lɛ i mek dɛn sɔfa fɔ di trɔbul we dɛn de mek.”

¹¹ So, mek a aks una ɔda kwɛshɔn: Wɛn di Ju pipul dɛn bin bɔk dɛn fut, dɛn bin fɔdɔm ɛn dɛn nɔ bin ebul rayz igen? Natin lɛkɛ dat nɔ bi! Bikɔs di Ju dɛn bin sin, Gɔd tɔn to dɛn pipul we nɔto Ju ɛn sev dɛn, so di Ju dɛn de jɛlɔs dɛn pipul we nɔto Ju.

¹² Di sin we di Ju dɛn sin briŋ big blɛsin kam na di wɔl, ɛn bikɔs di Ju dɛn nɔ gri fɔ du wetin Gɔd want fɔ mek i sev dɛn, dat briŋ big blɛsin kam to dɛn pipul we nɔto Ju. Bɔt di blɛsin dɛn go big pas dat wɛn ɔl di Ju dɛnsɛf go kam bak to Gɔd ɛn du wetin i want fɔ mek i sev dɛn.

Gɔd Sev dɛn Pipul we Nɔto Ju

¹³ Naw a de tɔk to una we nɔto Ju: Wans mi na apɔsul to una we nɔto Ju, a go tɛl Gɔd tɛnki fɔ di wok we i dɔn gi mi fɔ du.

¹⁴ Sɔntɛm, we a de du dat, a go mek mi yon Ju kɔntri man dɛn jɛlɔs una, so da we de a kin mek Gɔd sev sɔm pan dɛn.

¹⁵ Di tɛm we Gɔd nɔ bin gri tek dɛn fɔ bi in yon pipul igen, i bin mek dɛn ɔda pipul na di wɔl bi in padi dɛn. Wɛn Gɔd go tek dɛn fɔ bi in yon pipul dɛn, dɛn go jɛs tan lɛkɛ dayman we gɛt layf bak.

¹⁶ If ɛnibɔdi gi Gɔd di fɔs af bred we i kɔt, dat min se di wan ol bred blant Gɔd; ɛn if ɛnibɔdi gi Gɔd tik in rut, dat min se ɔl di an dɛn pan di tik blant Gɔd.

¹⁷ Dɛn dɔn brok sɔm pan di an dɛn pan di ɔliv tik we pɔsin plant, ɛn dɛn dɔn jɔyn di wayl ɔliv tik in an pan di ɔliv tik we pɔsin plant. Una we nɔto Ju jɛs tan lɛkɛ di wayl ɔliv tik, ɛn naw una de ɛnjɔy pan di Ju pipul dɛn blɛsin lɛkɛ aw di wayl ɔliv tik in an we dɛn jɔyn, de gɛt pan di wata we de kɔmɔt pan di ɔliv tik we pɔsin plant.

¹⁸ Na dat mek, una nɔ fɔ tink se una bɛtɛ pas dɛn pipul we tan lɛkɛ tik an we Gɔd kɔt. Una nɔ fɔ prawd! Una jɛs tan lɛkɛ an pan tik nɔmɔ, nɔto una de mek di rut tinap traŋa, na di rut de mek una tinap traŋa.

¹⁹ Bɔt una go se, “Wetin yu tɔk na tru, bɔt Gɔd brok di an dɛn so dat wi go de na di ples we dɛn bin de.”

²⁰ Dat na tru! Gɔd brok dɛn kɔmɔt bikɔs dɛn nɔ bin biliv, ɛn i lɛf una na di ples we dɛn bin de, bikɔs una biliv. Bɔt una nɔ fɔ prawd bikɔs una dɔn tek di ples we dɛn bin de, una fɔ fred Gɔd.

²¹ If Gɔd nɔ lɛf di Ju dɛn we tan lɛkɛ dɛn an we de gro pan tik, una min se i go lɛf una we i tek kam jɔyn pan dɛn?

²² Dat fɔ mek una si aw Gɔd gud, bɔt igen aw i kin ol pɔsin wit traŋa an. Gɔd kin ol dɛn pipul we bin biliv bɔt we dɔn tap fɔ biliv ɛn bigin du bad, wit traŋa an, bɔt i go gud to una if una stil de du dɛn tin we go mek i sho una aw i gud; bɔt if una nɔ du dɛn tin de, Gɔd go kɔt unasɛf kɔmɔt pan insɛf.

²³ Ɛn if di Ju dɛn chenj ɛn bigin biliv Gɔd bak, Gɔd go put dɛn bak na di ples we dɛn bin de, bikɔs Gɔd ebul fɔ du dat.

²⁴ Una we nɔto Ju, una tan lɛkɛ dɛn an we pipul brok kɔmɔt pan wayl ɔliv tik, ɛn we dɛn dɔn jɔyn pan ɔliv tik we pɔsin plant, pan ɔl we nɔto so dat fɔ bi. Bɔt di Ju pipul dɛn tan lɛkɛ tik we dɛn plant; i go izi fɔ mek Gɔd jɔyn dɛn an we dɛn bin brok pan di tik we dɛn bin dɔn de pan, pas fɔ tek dɛn an we dɛn bin brok kɔmɔt pan di wayl ɔliv tik, jɔyn dɛn pan di tik we pɔsin bin plant.

Gɔd de Sɔri fɔ Ɔlman

²⁵ Mi kɔmpin Kristiɛn dɛn, wan tru tin de we a want mek una no, we na sikrit. I go mek una nɔ tink se una gɛt sɛns tumɔs. Na di sikrit dis: Nɔto fɔɛva di pipul dɛn na Izrɛl nɔ go gri fɔ biliv, na sote di tɛm nɔmɔ we ɔl dɛn pipul we nɔto Ju we Gɔd dɔn mak, go kam ɔnda in rul.

²⁶ Na di we dis we Gɔd go sev ɔl dɛn Izrɛl pipul. Lɛkɛ aw dɛn rayt na Gɔd in Buk we dɛn se, “Di pɔsin we de sev pipul go kɔmɔt na Zayɔn, ɛn i go pul bad kɔmɔt na Jekɔb in granpikin-pikin dɛn at.”

²⁷ Ɛn Gɔd se, “A go mek dis agrimɛnt wit dɛn wɛn a dɔn padin dɛn sin.”

²⁸ Bikɔs di Ju dɛn tɔn dɛn bak pan di Gud Nyuz, dɛn na pipul we nɔ lɛk Gɔd, ɛn di et we dɛn et di Gud Nyuz dɔn mek Gɔd ɛp una we nɔto Ju. Bɔt bikɔs Gɔd bin dɔn pik di Ju pipul dɛn, dɛn nain padi dɛn bikɔs i bin dɔn prɔmis Ebraam, Ayzak ɛn Jekɔb se dɛn grampikin pikin dɛn go bi in padi dɛn sote go.

²⁹ Dɛn pipul we Gɔd dɔn pik, i dɔn pik dɛn; ɛn di blɛsin we i dɔn gi dɛn, i dɔn gi dɛn. Gɔd nɔ de chenj.

³⁰ Fɔs tɛm una we nɔto Ju nɔ bin de du wetin Gɔd tɛl una fɔ du, bɔt naw Gɔd dɔn sɔri fɔ una bikɔs di Ju dɛn nɔ du wetin i tɛl dɛn fɔ du.

³¹ Di Ju pipul dɛn nɔ de du wetin Gɔd want naw, bɔt we Gɔd bin sɔri fɔ una, i go sɔri fɔ dɛnsɛf.

³² Bikɔs ɔlman nɔ bin gri fɔ du wetin i tɛl dɛn fɔ du, Gɔd mek dɛn ɔl nɔ ebul fɔ lɛf dɛn sin igen so dat i go sɔri fɔ dɛn.

Pipul fɔ Prez Gɔd

³³ Gɔd de sho se in sɔri bad fɔ ɔlman! Gɔd gɛt bɔku bɔku sɛns we nɔn mɔtalman nɔ gɛt ɛn i sabi ɔltin! Udat ebul ɛksplen wetindu Gɔd mekɔp fɔ du dɛn tin we i de du, ɔ ɔndastand wetin i de du?

³⁴ Na di tin dat we dɛn de tɔk we dɛn rayt na Gɔd in Buk se, “Udat go no wetin di Masta de tink? Udat ebul fɔ advays am?

³⁵ Udat dɔn gi di Masta ɛnitin wande, so dat di Masta gɛt kɔz fɔ gi am ɔda tin bak?”

³⁶ Na Gɔd mek ɔltin, nain de mek ɔltin wok lɛkɛ aw dɛn fɔ wok, ɛn na fɔ am ɔltin de. Mek ɔlman prez Gɔd sote go! Emɛn.