Rɛvɛleshɔn 4 - Krio Fɔs Oli Baybul

Jɔn Si Insay Ɛvin

¹ Wɛn dat dɔn dɔn a si ɔda tin; a si do opin na ɛvin: a yɛri di vɔys bak we bin sawnd lɛkɛ trɔmpɛt de tɔk to mi. Di vɔys se, “Kam ɔp ya, so dat a kin sho yu dɛn tin we mɔs apin bambay.”

² Wantɛm, Gɔd in Spirit kam pan mi; na de a si wan ay chia we kiŋ kin sidɔm pan, a si sɔmbɔdi sidɔm pan am.

³ Di pɔsin in fes bin de shayn lɛkɛ dayamɔn ɛn lɛkɛ wan ɔda shayn ston we dɛn kɔl rubi. Rembo we de shayn lɛkɛ da fayn ston we dɛn kɔl ɛmirald bin de rawnd di ay chia.

⁴ Twɛnti-fo ɔda ay chia we kiŋ kin sidɔm pan bin de rawnd di fɔs ay chia; a si twɛnti-fo bigman dɛn sidɔm pan di chia dɛn; dɛn bin wɛr wayt klos; ɛn dɛn tin we kiŋ kin wɛr we dɛn kɔl krawn, bin de na dɛn ed, na gold dɛn bin tek mek di krawn dɛn.

⁵ Laytin bin de flash, tɛnda bin de rol, plɛnti nɔys bin de na di say we di fɔs ay chia bin de, di sɛvin lamp dɛn bin layt frɔnt di chia, dɛn lamp ya na Gɔd in sɛvin spirit dɛn.

⁶ Bifo di sem ay chia a si sɔntin lɛkɛ wata we tan lɛkɛ se dɛn tek glas mek am. Ɔlɔbɔt klos di chia, frɔnt, bak ɛn sayd, fo tin we gɛt layf bin tinap, dɛn bin gɛt yay ɔlɔbɔt na dɛn bɔdi; bifo ɛn biɛn.

⁷ Di fɔs tin we gɛt layf bin fiba layɔn, di sɛkɛn wan bin fiba kaw pikin, di tɔd wan bin gɛt fes we fiba mɔtalman fes, di wan we mek fo bin tan lɛkɛ igul we de flay.

⁸ Dɛn ɔl fo bin gɛt siks siks wiŋ dɛn; soso yay bin kɔba dɛn ɔlɔbɔt. Ol de ol nɛt dɛn nɔ de tap fɔ siŋ se, “Gɔd na di Masta we gɛt pawa pas ɔl, nain wangren na Gɔd, i nɔ sin wande, i gud pas ɔl. I bin de bifo di wɔl mek, i de naw ɛn i go kam bak.”

⁹ Wɛn dɛn fo tin ya we gɛt layf de prez di wan we go de sote go, we sidɔm pan di ay chia we kiŋ kin sidɔm, wɛn dɛn de sho am di rɛspɛkt we dɛn gɛt fɔ am ɛn tɛl am tɛnki,

¹⁰ di twɛnti-fo bigman dɛnsɛf kin fɔdɔm bifo di wan we go de sote go, we bin sidɔm pan di ay chia we kiŋ kin sidɔm pan, ɛn dɛn kin bigin prez am; dɛn kin pul dɛn krawn na dɛn ed ib dɛn bifo di ay chia; dɔn dɛn kin siŋ se,

¹¹ “Wi Masta ɛn wi Gɔd! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.”