Rɛvɛleshɔn 3 - Krio Fɔs Oli Baybul

Di Mɛsej we Jizɔs Krays Sɛn to di Kristiɛn dɛn na Sadis

¹ “Rayt dis mɛsej ya sɛn am go to di enjɛl we de gyad di Kristiɛn dɛn na Sadis: “Na dis mɛsej ya di pɔsin we gɛt Gɔd in sɛvin spirit dɛn ɛn we ol dɛn sɛvin sta, sɛn: A no di tin dɛn we una de du, pipul tink se una gɛt layf, bɔt una nɔ gɛt layf, una dɔn day.

² So una grap, una tray mek di lili layf we una stil gɛt nɔ dɔn ɔltogɛda. A si se di tin dɛn we una de du nɔ tan yet lɛkɛ aw dɛn fɔ tan na Gɔd yay.

³ So una mɛmba dɛn tin we dɛn dɔn lan una we una bin biliv, ɛn una nɔ lɛf fɔ biliv dɛn wit ɔl una at, una lɛf fɔ du dɛn bad tin we una de du. If una nɔ grap wantɛm ɛn bigin du dɛn tin we a tɛl una, a go kam lɛkɛ tifman kam mit una ɛn una nɔ go no di tɛm we a go kam mit una.

⁴ Bɔt te naw sɔm pan una de na Sadis we nɔ dɔti una klos, bɔt una nɔ plɛnti. Dɛn pipul de go waka wit mi, dɛn go wɛr wayt klos bikɔs dɛn fit fɔ wɛr am, bay aw dɛn de du.

⁵ Dɛn pipul we go stil tinap traŋa afta Setan dɔn tray dɛn, dɛnsɛf go wɛr wayt klos. Ɛn a nɔ go pul dɛn nem kɔmɔt na di buk we dɛn pipul we gɛt layf, dɛn nem rayt. A go tɔk bifo mi Papa ɛn bifo in enjɛl dɛn se dɛn pipul de na mi yon.

⁶ “Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples.

Di Mɛsej we Jizɔs Krays Sɛn to di Kristiɛn dɛn na Filadɛlfia

⁷ “Rayt dis mɛsej ya sɛn am go to di enjɛl we de gyad di Kristiɛn dɛn na Filadɛlfia: “Na di mɛsej dis we Krays we na di tru wan, sɛn. Nain ol di ki we Devid bin ol. If i opin ɛni do, nɔbɔdi nɔ de we go ebul lɔk am. If i lɔk ɛni do, nɔbɔdi nɔ de we go ebul opin am:

⁸ A no di tin dɛn we una de du. Una lisin, a dɔn opin do fɔ una we nɔbɔdi nɔ ebul lɔk. A no se pan ɔl we una nɔ gɛt plɛnti trɛnk una dɔn du wetin a tɛl una fɔ du, wande una nɔ dinay se una de waka wit mi.

⁹ As fɔ dɛn wan we de fala Setan, we de lay se dɛn na Ju, a go mek dɛn kam fɔdɔm na una fut ɛn a go mek dɛn ɔl no se a lɛk una.

¹⁰ Una dɔn du wetin a tɛl una fɔ du una dɔn tinap traŋa ɛn una dɔn bia; fɔseka dat a nɔ go mek una sɔfa wɛn di tɛm kam we tin go traŋa na wɔl, fɔ tray ɔlman we de na di wɔl fɔ si if dɛn biliv pan Gɔd, fɔ tru.

¹¹ A go kam bak, i nɔ go te igen. Una nɔ lɛf fɔ biliv wit ɔl una at dɛn tin we una dɔn lan, so dat nɔbɔdi nɔ go jɔg una blɛsin we una go gɛt bikɔs una dɔn tinap traŋa.

¹² Ɛnibɔdi we go stil tinap traŋa afta Setan dɔn tray am, a go mek i bi lɛkɛ post we go mek Gɔd in Os tinap, i go tinap de sote go. A go rayt mi Gɔd in nem pan am, ɛn di tɔŋ we i bil, in sɛf yon nem pan am, dat na ‘di Nyu Jerusɛlɛm’, we go kɔmɔt to Gɔd na ɛvin kam dɔŋ. Ɛn a go rayt mi yon nyu nem pan am.

¹³ “Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples.

Di Mɛsej we Jizɔs Krays Sɛn to di Kristiɛn dɛn na Laodisya

¹⁴ “Rayt dis mɛsej ya sɛn am go to di enjɛl we de gyad di Kristiɛn dɛn na Laodisya: “Na di mɛsej dis we di wan we de se ‘Emɛn’ fɔ ɔl Gɔd in wok, sɛn. Nain na di Wan we de tɔk tru ɔltɛm ɛn wɛn i tɔk pipul fɔ biliv wetin i se, nain an ɔl dɛn tin we Gɔd mek, bigin:

¹⁵ A no ɔl wetin una de du. Una tan lɛkɛ it we nɔ kol ɛn we nɔ ɔt we nɔ gɛt tes. A wish una bin de fala mi wit ɔl una at ɔ una bin lɛf fɔ fala mi ɔltogɛda.

¹⁶ So bikɔs una tan lɛkɛ it we nɔ ɔt ɛn we nɔ kol, a go pit una kɔmɔt na mi mɔt.

¹⁷ Una de tɔk se una jɛntri, di tin dɛn we una gɛt, dɔn plɛnti, ɛn natin nɔ de we una fɔ gɛt we una nɔ gɛt. Bɔt una nɔ kechɔp se una po, ɛn pipul de sɔri fɔ una, una de nekɛd ɛn una yay blɛn.

¹⁸ So a de advays una mek una kam to mi kam bay gold, we dɛn dɔn bɔn na faya te i klin so dat una go jɛntri fɔ tru; ɛn a de advays una igen mek una kam bay wayt klos fɔ wɛr, so dat una nɔ go shem bikɔs una de nekɛd, ɛn mek una kam bay mɛrɛsin fɔ rɔb na una yay mek una go si.

¹⁹ Dɛn pipul we a lɛk na dɛn a kin tɛl se dɛn de du rɔŋ tin ɛn a kin pɔnish dɛn mek dɛn go gɛt sɛns fɔ du wetin rayt. So una kechɔp unasɛf, ɛn lɛf fɔ sin.

²⁰ Una lisin, a tinap nia di do, a de nak pan am; if ɛnibɔdi we yɛri mi vɔys opin di do, a go kam insay in os, mi ɛn in go sidɔm ɛn it togɛda.

²¹ Ɛnibɔdi we go stil tinap traŋa afta Setan dɔn tray am, a go mek i sidɔm wit mi na di say we a sidɔm fɔ rul jɛs lɛkɛ aw misɛf bin stil tinap traŋa afta Gɔd dɔn tray mi ɛn a kam sidɔm wit mi Papa na di say we i sidɔm de rul.

²² “Ɛnibɔdi we gɛt yes, mek i yɛri dɛn wɔd ya we Gɔd in Spirit de tɛl di Kristiɛn dɛn na dɛn difrɛn ples.”