Rɛvɛleshɔn 18 - Krio Fɔs Oli Baybul

Da Tɔŋ, we dɛn Kɔl Babilɔn, dɔn Pwɛl

¹ Wɛn dat dɔn, a si wan ɔda enjɛl kɔmɔt na ɛvin kam dɔŋ na wɔl, i bin gɛt wɔndaful pawa. Di layt we bin de shayn pan am, layt ɔl dɛn ples na wɔl.

² I ala lawd wan se, “Babilɔn, da tɔŋ we ɔlman no, dɔn pwɛl, i dɔn pwɛl pata pata; na ɔl kayn bad spirit tap de naw, ɔl dɛn wan we kɔmɔt to Setan; dɛn bad bɔd we pipul nɔ lɛk na dɛn dɔn go gɛda de.

³ Na so i bi, bikɔs ɔl dɛn pipul na ɔl dɛn neshɔn dɔn drink in wayn, dat na di fri layf we dɛn dɔn liv wit am; dɛn wan we de rul na di wɔl dɛnsɛf dɔn liv di sem fri layf wit am, ɛn bikɔs i lɛk fɔ bay plɛnti plɛnti tin dɛn, dɛn wan we de tredin na dis wɔl dɛnsɛf dɔn jɛntri bikɔs i de bay to dɛn.”

⁴ Dɛn a yɛri wan ɔda vɔys de tɔk na ɛvin se, “Mi pipul dɛn, una mekes kɔmɔt na da tɔŋ de so dat unasɛf nɔ go bigin du di bad tin dɛn we i de du, ɛn unasɛf nɔ go sɔfa lɛkɛ aw i gɛt fɔ sɔfa.

⁵ Una fɔ no se Gɔd nɔ fɔgɛt di bad bad tin dɛn we i dɔn du, we dɔn payl te dɛn dɔn rich ɔp na ɛvin.

⁶ Lɛ di bad we i dɔn du tɔn pan am. Mek i sɔfa tu tɛm pas di sɔfa we i mek ɔda pipul sɔfa; da kɔp we i kin tek gi pipul in wayn fɔ drink, ful am wit wayn we trɔŋ pas in yon wayn, ɛn gi am mek i drink.

⁷ Mek i pɔnish gud fashin ɛn mek in at ebi lɛkɛ aw i bin mek insɛf impɔtant ɛn i bin de ɛnjɔy layf. I de tɔk to insɛf se, ‘Mi na kwin, mi nɔto uman we in man dɔn day; kray nɔ go de na mi yay.’

⁸ Bikɔs na dat i de mɛmba, di big waala we fɔ mit am go fɔdɔm pan am. Wan gren de, i go sik, in at go ebi, i nɔ go gɛt natin fɔ it, ɛn faya go bɔn am. Bikɔs Gɔd we na wi Masta, gɛt pawa ɛn nain dɔn kɔndɛm am.”

⁹ Dɛn wan we de rul na dis wɔl we bin dɔn liv fri layf ɛn ɛnjɔy layf wit am go si di smok we de kɔmɔt na di faya we de bɔn am, dɛn dɛn go put dɛn an na dɛn ed, ɛn bɔs kray.

¹⁰ Dɛn go fred wɛn dɛn si di big waala we mit di tɔŋ, dɛn go tinap fawe, de tɔk se, “Oya, da big tɔŋ, Babilɔn, we bin gɛt pawa, dɔn pwɛl; na wan awa nɔmɔ i tek fɔ bɔn kam dɔŋ na grɔn.”

¹¹ Dɛn wan we de tredin na di wɔl go kray ɛn dɛn at go ebi bikɔs di tɔŋ dɔn pwɛl, ɛn nɔbɔdi nɔ go de igen fɔ bay dɛn tin we dɛn de sɛl;

¹² nɔbɔdi nɔ go bay ɔl dɛn tin we dɛn de sɛl, lɛkɛ gold ɛn silva, dɛn shayn shayn ston ɛn fayn fayn bid; dɛn fayn fayn klos, rɛd wan ɛn mov wan, silk ɛn linin; ɛn dɛn wud we gɛt fayn sɛnt, dɛn tin we dɛn tek ɛlifant tit ɛn dia wud mek ɛn dɛn tin we dɛn tek bras ɔ ayɛn ɔ mabul mek;

¹³ dɛn tin we de smɛl swit lɛkɛ sinamɔn, spays, insɛns, ɛn dɛn tin we dɛn kɔl ma ɛn frankinsɛns; wayn, ɔyl we dɛn de tek kuk, fayn flawa, kɔn, kaw ɛn ship, dɛn ɔs ɛn dɛn chariɔt, ɛn dɛn pipul we dɛn tek mek slev.

¹⁴ Dɛn wan we de tredin go tɛl am se, “Ɔl di tin dɛn we yu bin put yu at pan nɔ de igen; ɔl yu jɛntri dɔn dɔn, yu nɔ go si am igen, ɛn di fayn layf we yu bin liv bikɔs yu bin jɛntri dɔn dɔn, yu nɔ go liv so igen.”

¹⁵ Dɛn pipul we jɛntri bikɔs dɛn de sɛl dɛn tin ya go fred wɛn dɛn si di trɔbul we mit di tɔŋ, dɛn go tinap fawe, de kray ɛn wit ebi at, dɛn go se,

¹⁶ “Eya, oya! Da tɔŋ de we bin gɛt pawa, dɔn pwɛl, i bin tan lɛkɛ uman we drɛs wit fayn fayn linin, mov ɛn rɛd klos ɛn we kin tek gold ɛn dɛn shayn shayn ston ɛn fayn fayn bid drɛs insɛf!

¹⁷ Na wan awa nɔmɔ ɔl in jɛntri lɔs!” Ɔl dɛn kapten, ɔl dɛn wan we de go ɔp ɛn dɔŋ na dɛn big bot, wit ɔl dɛn siman, ɔl dɛn wan we de go si fɔ tredin, dɛn ɔl tinap fawe;

¹⁸ wɛn dɛn si di smok we bin de kɔmɔt na di faya we bin de bɔn di tɔŋ, dɛn ala se, “Nɔ tɔŋ nɔ de lɛkɛ dis wande!”

¹⁹ Dɛn ib dɔti na dɛn ed bikɔs dɛn at ebi, dɛn ala se, “Oya o! Oya, una fɔ sɔri fɔ da tɔŋ we bin gɛt pawa. Di jɛntri we dis tɔŋ bin jɛntri fɔs tɛm bin mek ɔl dɛn wan we bin gɛt bot we bin de go si fɔ tredin, jɛntri. Bɔt naw, wan awa nɔmɔ, i dɔn pwɛl pata pata.”

²⁰ Mek ɔl dɛn wan we de na ɛvin gladi, mek ɔl Gɔd in pipul dɛn, in apɔsul dɛn, ɛn dɛn wan we de tɔk in mɛsej gladi bikɔs Gɔd dɔn pɔnish am fɔ di bad we i bin de du dɛn.

²¹ Wɛn dat dɔn, wan enjɛl we gɛt plɛnti pawa pik wan big big ston lɛkɛ pɛpɛ ston ib am insay di wata, i se, “Na semwe so dɛn go ib da big tɔŋ we nem Babilɔn dɔŋ ɛn brok am, ɛn nɔbɔdi nɔ go si am igen.

²² Insay da tɔŋ de, pipul nɔ go yɛri ɛnibɔdi de ple ap igen, dɛn nɔ go yɛri pɔsin de ple flut ɔ blo trɔmpɛt igen, dɛn nɔ go yɛri pipul de siŋ igen; ɔl dɛn pipul we de du ɔl kayn tin wit dɛn an, lɛkɛ dɛn wan we de mek dɛn pɔt ɛn dɛn fita dɛn so, nɔ go wok insay de igen. Nɔbɔdi nɔ go yɛri pɔsin de bit kɔn de igen;

²³ lamp nɔ go layt de igen; man ɛn uman nɔ go mared de igen. Dɛn wan we bin de tredin insay de na bin dɛn bigman we ɔlman na wɔl, no. I bin de tek wich mek ɔl dɛn pipul na ɔl dɛn neshɔn ful.”

²⁴ Ɛn i go sɔfa bikɔs nainsay de blɔd bin kɔmɔt pan dɛn wan we bin de tɔk Gɔd in mɛsej, pan ɔl Gɔd in pipul dɛn, ɛn pan ɔl dɛn pipul na wɔl we dɛn dɔn kil.