Rɛvɛleshɔn 15 - Krio Fɔs Oli Baybul

Di Bad Bad Tin dɛn we di Enjɛl dɛn Fes Kam Las

¹ A si wan ɔda wɔndaful tin na di klawd we mek a bin jɛs de wɔnda. Sɛvin enjɛl dɛn bin de wit sɛvin bad bad tin dɛn, we na di las wan dɛn, bikɔs na di las tin dɛn dat, we Gɔd go tek sho mɔtalman se in vɛks pan dɛn.

² Dɛn a si sɔntin we fiba big wata we tan lɛkɛ se dɛn tek glas mek am, faya bin de bɔn insay am. Pantap dat, a si dɛn pipul we bin dɔn win di wayl bif, we na nɔmba tinap fɔ in nem, ɛn di tin we pipul bin mek fɔ tek de mɛmba ɛn rɛspɛkt am. Dɛn bin tinap klos di big glas wata ɛn dɛn bin ol ap fɔ tek ple myuzik, we Gɔd bin dɔn gi dɛn.

³ Dɛn bin de siŋ di siŋ we Mozis, we de wok fɔ Gɔd, bin siŋ lɔntɛm. Da siŋ de na di Ship in siŋ; di siŋ se, “Masta, Gɔd we gɛt pawa pas ɔl, yu wok dɛn big ɛn dɛn wɔndaful! Na yu na di kiŋ we de rul oba ɔl dɛn neshɔn, yu de du wetin rayt, yu de tɔk wetin tru ɔltɛm!

⁴ Masta, udat de we nɔ go fred yu? Udat nɔ go gri fɔ tɛl ɔda pipul bɔt yu pawa? Na yu wangren na Gɔd. Ɔl dɛn pipul na ɔl dɛn neshɔn go kam fɔdɔm bifo yu ɛn prez yu, bikɔs ɔlman dɔn si se di jɔj we yu de jɔj, gud.”

⁵ Wɛn dat dɔn, a luk bak, na de a si di ples we Gɔd sidɔm nain bafa na ɛvin opin, dat na di ples we dɛn de kip di agrimɛnt we Gɔd mek wit mɔtalman.

⁶ Dɔn dɛn sɛvin enjɛl we bin gɛt dɛn sɛvin bad bad tin dɛn kɔmɔt insay de; dɛn bin wɛr klin linin klos, na so i bin de shayn, ɛn gold strap bin tay rawnd dɛn chɛst.

⁷ Dɛn wan pan di fo tin dɛn we gɛt layf gi di sɛvin enjɛl dɛn sɛvin gold kɔp; di pɔnish we Gɔd, we de sote go, go pɔnish di wɔl, nain bin ful insay di sɛvin kɔp dɛn.

⁸ Smok we sho Gɔd in pawa ɛn we sho aw i wɔndaful bin ful di ples, ɛn nɔbɔdi nɔ bin ebul go insay di ples te di sɛvin bad bad tin dɛn we di enjɛl dɛn bin briŋ, bin dɔn dɔn.