Rɛvɛleshɔn 14 - Krio Fɔs Oli Baybul

Di Siŋ we Gɔd In Pipul dɛn de Siŋ

¹ Wɛn dat dɔn, a si di Ship tinap pantap di ay il we dɛn kɔl Zayɔn. Wan ɔndrɛd ɛn fɔti-fo tawzin pipul bin tinap de wit am. Di Ship in nem ɛn in Papa in nem bin rayt pan dɛn fɔrɛd.

² Dɛn a yɛri vɔys kɔmɔt na ɛvin; di vɔys big lɛkɛ dɛn big wata we de fɔdɔm kɔmɔt ɔp dɛn il kam dɔŋ ɛn lɛkɛ wɛn tɛnda de krak. Di vɔys swit lɛkɛ di sawnd we kin kɔmɔt wɛn pipul de ple ap.

³ Di wan ɔndrɛd ɛn fɔti-fo tawzin pipul dɛn tinap bifo di ay chia we Gɔd sidɔm pan, bifo di fo tin dɛn we gɛt layf, ɛn bifo di bigman dɛn. Dɛn bin de siŋ wan nyu siŋ we na dɛn wan nɔmɔ, we Krays bin dɔn pe fɔ na wɔl wit in blɔd, bin ebul lan ɛn siŋ am.

⁴ Dɛn na man dɛn we nɔ bin miks pan uman biznɛs; dɛn bin de fala di Ship ɛni say i go. Na di Ship bin pik dɛn kɔmɔt to dɛn ɔda mɔtalman wɛn i bay dɛn, ɛn na dɛn fɔs i put wansay fɔ insɛf nɔmɔ ɛn fɔ Gɔd.

⁵ Wande nɔbɔdi nɔ yɛri dɛn lay; dɛn nɔba du ɛnitin we go mek pipul blem dɛn.

Dɛn Tri Enjɛl dɛn

⁶ Dɛn a si wan ɔda enjɛl de flay ɔp ɔp, i bin de tɛl pipul di Gud Nyuz we go de sote go, dɛn pipul ya kɔmɔt na ɔl dɛn trayb, ɔl dɛn neshɔn ɛn dɛn de tɔk ɔl dɛn difrɛn laŋwej, blakman o, wetman o, ɔl de pan dɛn.

⁷ I tɔk lawd wan se, “Una fred Gɔd, ɛn prez am bikɔs i wɔndaful! Di tɛm dɔn kam fɔ mek i jɔj mɔtalman. Una fɔdɔm bifo am ɛn prez am, nain mek ɛvin, nain mek di dray grɔn, di big wata we de rawnd di dray grɔn ɛn dɛn wata we de bɔs na grɔn!”

⁸ Wan ɔda enjɛl bin de fala di fɔs wande tɔk se, “Babilɔn dɔn pwɛl! Da big tɔŋ, Babilɔn, dɔn pwɛl! Nain bin de gi ɔlman in wayn fɔ drink; da wayn de na di fri layf we pipul dɛn bin de pan, ɛn we kin mek dɛn du ɛni bad tin we dɛn at gi dɛn fɔ du.”

⁹ Wan ɔda enjɛl we mek tri, kam, i bin de ala lawd wan se, “Ɛnibɔdi we de pre to di wayl bif ɛn di tin we dɛn mek fɔ de tek mɛmba ɛn rɛspɛkt am, ɛn we gri mek dɛn put in mak pan in fɔrɛd ɔ pan in an,

¹⁰ insɛf go drink Gɔd in yon wayn, dat na di pɔnish we i go pɔnish bikɔs Gɔd vɛks pan am, da pɔnishmɛnt de tan lɛkɛ bita wayn we nɔ miks wit wata we i gɛt fɔ drink. Ɔl dɛn pipul we de du dɛn tin ya go pɔnish bifo Gɔd in enjɛl dɛn ɛn Gɔd in Ship insay faya we sɔlfa de bɔn.

¹¹ Di faya nɔ go tap fɔ mek smok we go de tɔmɛnt dɛn sote go, so dɛn pipul we de pre to di wayl bif ɛn di tin we dɛn mek fɔ tek mɛmba ɛn rɛspɛkt am, ɛn we gɛt in mak nɔ go gɛt blo; de ɛn nɛt, dɛn go de pan tɔmɛnt.”

¹² So mek Gɔd in pipul dɛn tinap traŋa, dat na dɛn wan we de du wetin Gɔd tɛl dɛn fɔ du ɛn dɛn nɔ lɛf fɔ biliv pan Jizɔs.

¹³ Dɛn a yɛri vɔys na ɛvin de tɔk se, “Rayt wetin a de kam tɛl yu naw: Dɛn pipul we go day fɔseka di Masta, go gladi!” Di Spirit ansa se, “Na tru yu de tɔk, dɛn dɔn dɔn di big wok we dɛn bin de du so, dɛn go blo naw ɛn dɛn go gladi bikɔs dɛn dɔn si wetin di wok we dɛn bin de du, dɔn briŋ.”

Dɛn Tin we de Bia na Wɔl Dɔn Rɛdi fɔ Kɔt

¹⁴ Wɛn dat dɔn, a luk bak, na de a si wan big wayt klawd. A si lɛkɛ wan mɔtalman sidɔm pan di klawd. I bin wɛr wan gold krawn nain ed ɛn i bin ol sɔntin nain an, dat na da nɛf we fɔ tek kɔt dɛn tin we dɛn plant wɛn dɛn dɔn rɛdi fɔ kɔt.

¹⁵ Wan ɔda enjɛl kɔmɔt na Gɔd in Os, i ala lawd wan tɛl di pɔsin we sidɔm pan di klawd se, “Tek yu nɛf kɔt dɛn tin we dɔn rɛdi fɔ kɔt, di rayt tɛm dɔn rich, di tin dɛn we dɛn bin plant na wɔl dɔn rɛdi fɔ kɔt!”

¹⁶ Di pɔsin we bin sidɔm pan di klawd swiŋ in nɛf pan di wɔl; di nɛf kɔt ɔl di tin dɛn we bin dɔn rɛdi fɔ kɔt.

¹⁷ Dɛn a si wan ɔda enjɛl insɛf kɔmɔt na Gɔd in Os na ɛvin, insɛf bin ol wan nɛf.

¹⁸ Dɛn wan ɔda enjɛl we bin de gyad di faya, kɔmɔt klos di tebul we dɛn bin de mek sakrifays to Gɔd, kam. I ala lawd wan tɛl di enjɛl we ol di nɛf se, “Tek yu nɛf, kɔt dɛn greps we dɛn go tek mek wayn, dɛn dɔn rɛp!”

¹⁹ Na de di enjɛl tek in nɛf swiŋ am rawnd pan di greps, i kɔt dɛn kɔmɔt pan di an dɛn, ɛn ib dɛn insay di ol we dɛn de kwis dɛn fɔ mek wayn. Dis sho aw Gɔd vɛks bad ɛn aw i go pɔnish dɛn wan we i vɛks pan.

²⁰ Di ol we dɛn bin kwis di wata kɔmɔt pan di greps nɔ bin de insay di tɔŋ; plɛnti blɔd kɔmɔt insay di ol ɛn rɔn te i rich tu ɔndrɛd mayl ɛn na fayv fut di blɔd bin dip.